ନୂଆଦିଲ୍ଲୀ: ପାଲେଷ୍ଟାଇନକୁ ସ୍ୱୀକୃତି ଦେବାକୁ ଘୋଷଣା କରିବା ପରେ ବ୍ରିଟେନ ଏକ ସଂଶୋଧିତ ମାନଚିତ୍ର ପ୍ରକାଶ କରିଛି । ଏହି ମାନଚିତ୍ରରେ ପାଲେଷ୍ଟାଇନକୁ ଇସ୍ରାଏଲ ନିକଟରେ ଅବସ୍ଥିତ ଏକ ପୃଥକ ଦେଶ ଭାବରେ ଦର୍ଶାଯାଇଛି। ସେହିପରି, ଫ୍ରାନ୍ସର ରାଜଧାନୀ ପ୍ୟାରିସର ପ୍ରସିଦ୍ଧ ଆଇଫେଲ ଟାୱାର ଉପରେ ପାଲେଷ୍ଟାଇନ ପତାକା ଲଗାଯାଇଛି। ଫ୍ରାନ୍ସର ଏକ ଭାଇରାଲ ଭିଡିଓରେ ଗୋଟିଏ ପାର୍ଶ୍ୱରେ ପାଲେଷ୍ଟାଇନ ପତାକା ଏବଂ ଅନ୍ୟ ପାର୍ଶ୍ୱରେ ଇସ୍ରାଏଲୀ ପତାକା ଦେଖାଯାଉଛି। ପ୍ରଥମ ଥର ପାଇଁ ଯେତେବେଳେ ୟୁରୋପରେ ଜାତିସଂଘ ବୈଠକ ପୂର୍ବରୁ ଇସ୍ରାଏଲ ଏବଂ ପାଲେଷ୍ଟାଇନ ପ୍ରସଙ୍ଗକୁ ଗୁରୁତ୍ୱ ଦିଆଯାଇଛି।
ଗତ ୨୪ ଘଣ୍ଟା ମଧ୍ୟରେ, ବ୍ରିଟେନ, କାନାଡା, ଅଷ୍ଟ୍ରେଲିଆ ଏବଂ ପର୍ତ୍ତୁଗାଲ ପାଲେଷ୍ଟାଇନକୁ ଏକ ସ୍ବାଧୀନ ରାଷ୍ଟ୍ର ଭାବରେ ମାନ୍ୟତା ଦେଇଛନ୍ତି। ଏହି ୪ଟି ଦେଶର ସମର୍ଥନ ଇସ୍ରାଏଲକୁ ଏକ ବଡ଼ ଝଟକା ଦେଇଛି। ବର୍ତ୍ତମାନ, ଅଧିକାଂଶ ୟୁରୋପୀୟ ଦେଶ ପାଲେଷ୍ଟାଇନକୁ ସମର୍ଥନ କରୁଛନ୍ତି। ଏହା ବ୍ୟତୀତ ଜାତିସଂଘର ୫ ସ୍ଥାୟୀ ସଦସ୍ୟଙ୍କ ମଧ୍ୟରୁ ୪ ରାଷ୍ଟ୍ର ପାଲେଷ୍ଟାଇନକୁ ଏକ ରାଷ୍ଟ୍ର ଭାବରେ ମାନ୍ୟତା ଦେଇଛନ୍ତି। କେବଳ ଆମେରିକା ପାଲେଷ୍ଟାଇନର ବିରୋଧ କରୁଛି। ଏହି ୪ ସ୍ଥାୟୀ ସଦସ୍ୟ ବ୍ୟତୀତ ୧୫୦ ରୁ ଅଧିକ ଦେଶ ପାଲେଷ୍ଟାଇନକୁ ମାନ୍ୟତା ଦେଇଛନ୍ତି ।
ସାଉଦି ଆରବ ଏବଂ ଫ୍ରାନ୍ସ ଏହି ଅଧିବେଶନରେ ହିଁ ପାଲେଷ୍ଟାଇନ ସହ ଜଡିତ ବିଲକୁ ଜାତିସଂଘରେ ଆଗତ କରିବାକୁ ଚେଷ୍ଟା କରୁଛନ୍ତି। ଇସ୍ରାଏଲ ଏବଂ ପାଲେଷ୍ଟାଇନ ମଧ୍ୟରେ ୧୯୪୮ ମସିହାରୁ ବିବାଦ ଚାଲିଛି। ଦୁଇ ଦେଶ ମଧ୍ୟରେ ଜେରୁସାଲେମର ପବିତ୍ର ଅଲ-ଆକସା ମସଜିଦ ଏବଂ ଭୂମିକୁ ନେଇ ବିବାଦ ଜାରି ରହିଛି। ଆମେରିକାର ସମର୍ଥନରେ ଇସ୍ରାଏଲ ପାଲେଷ୍ଟାଇନରେ ନିଜର କାୟା ବିସ୍ତାର କରୁଛି। ଏହାର ମୁକାବିଲା ପାଇଁ, ସାଉଦି ଆରବ ଦୁଇ-ରାଷ୍ଟ୍ର ତତ୍ତ୍ୱକୁ ଆଗକୁ ବଢାଇଛି। ସାଉଦି ଆରବ କହିଛି ଯେ, ଯଦି ଦୁଇ ଦେଶ ମଧ୍ୟରେ ସୀମା ସମାଧାନ ହେବ ଏବଂ ପାଲେଷ୍ଟାଇନ ଏକ ରାଷ୍ଟ୍ର ହେବ, ତେବେ ସେଠାରେ ଅଚଳାବସ୍ଥାର ଅନ୍ତ ହେବ। ବର୍ତ୍ତମାନ, ପାଲେଷ୍ଟାଇନରେ କୌଣସି ସରକାର ନାହିଁ। ହମାସ ପ୍ରଶାସନକୁ ନିୟନ୍ତ୍ରଣ କରିଆସୁଛି। ହମାସକୁ ଇରାନର ଏକ ପ୍ରକ୍ସି ସଂଗଠନ ଭାବରେ ବିବେଚନା କରାଯାଏ ।
