ନୂଆଦିଲ୍ଲୀ ୨୫/୦୮: ପ୍ରେକ୍ଷାଳୟକୁ ଆସିବା ଆଗରୁ ବିବାଦରେ ଫସିଛି ଫିଲ୍ମ ‘ପରମ ସୁନ୍ଦରୀ’। ଜାହ୍ନବୀ କପୁର ଏବଂ ସିଦ୍ଧାର୍ଥ ମଲହୋତ୍ରାଙ୍କ ଅଭିନୀତ ଏହି ଫିଲ୍ମର ଗୀତଗୁଡିକୁ ଇତିମଧ୍ୟରେ ଦର୍ଶକ ପସନ୍ଦ କରିଛନ୍ତି। କିନ୍ତୁ ଖ୍ରୀଷ୍ଟ ଧର୍ମାବଲମ୍ବୀଙ୍କ ଗୋଟିଏ ଗୋଷ୍ଠୀ ଫିଲ୍ମଟିକୁ ନେଇ ଆପତ୍ତି ଉଠାଇଛନ୍ତି। ଧର୍ମୀୟ ଭାବବେଗରେ ଆଘାତର ଅଭିଯୋଗ ଉଠିଛି ଏହି ଫିଲ୍ମ ବିରୁଦ୍ଧରେ। ବିଶେଷ କରି ଗୋଟିଏ ଗୀତର ଦୃଶ୍ୟକୁ ନେଇ ସେମାନେ ଆପତ୍ତି କରିଛନ୍ତି। ଚର୍ଚ୍ଚ ଭିତରେ ପ୍ରେମରେ ମଜ୍ଜି ଯାଇଛନ୍ତି ଜାହ୍ନବୀ ଓ ସିଦ୍ଧାର୍ଥ । କିଭଳି ଭାବରେ ଧର୍ମୀୟ ସ୍ଥାନରେ ଘନିଷ୍ଠ ଦୃଶ୍ୟର ପ୍ରଦର୍ଶନ କରାଯାଇଛି, ସେ ନେଇ ସେ ଗୋଷ୍ଠୀ ପ୍ରଶ୍ନ ଉଠାଇଛନ୍ତି।
ଏକ ଖ୍ରୀଷ୍ଟିୟ ସଂଗଠନ ‘ଦ ୱାଚଡଗ୍ ଫାଉଣ୍ଡେସନ୍’ ତରଫରୁ ସେଣ୍ଟ୍ରାଲ ବୋର୍ଡ ଅଫ୍ ଫିଲ୍ମ ସାର୍ଟିଫିକେସନକୁ ଚିଠି ଲେଖିଛି। ମୁମ୍ବାଇ ପୁଲିସ, ତଥ୍ୟ ଓ ପ୍ରସାରଣ ମନ୍ତ୍ରଣାଳୟ ଓ ମହାରାଷ୍ଟ୍ର ସରକାରଙ୍କ ପାଖରେ ଏହି ସଙ୍ଗଠନ ତରଫରୁ ଚିଠି ପଠାଯାଇଛି। ଏପରିକି ଫିଲ୍ମର ନିର୍ଦ୍ଦେଶକଙ୍କୁ ମଧ୍ୟ ସଂଗଠନ ତରଫରୁ ଚିଠି ପଠାଯାଇଛି। ଚିଠି ଜରିଆରେ ସେମାନେ ଅନୁରୋଧ କରିଛନ୍ତି ଫିଲ୍ମଟିରୁ ଏକ ବିଶେଷ ଦୃଶ୍ୟ ବାଦ୍ ଦିଆଯାଉ। ସଂଗଠନ ତରଫରୁ ଉଲ୍ଲେଖ କରାଯାଇଛି, ବର୍ତ୍ତମାନ ସମୟରେ ଇଚ୍ଛାକୃତ ଭାବେ ଫିଲ୍ମରେ ଏମିତି କିଛି ସିନ୍ ରଖାଯାଏ ଯାହାନେଇ ବିତର୍କ ସୃଷ୍ଟି ହୋଇପାରେ। ଦର୍ଶକମାନଙ୍କୁ ଆକର୍ଷିତ କରିବା ଉଦ୍ଦ୍ୟେଶ୍ୟରେ କିଛି ପ୍ରଯୋଜକ ଏବଂ ନିର୍ଦ୍ଦେଶକ ଏପରି କରିଥାନ୍ତି। ଏସବୁ ବନ୍ଦ ହେବା ଦରକାର ବୋଲି ଉକ୍ତ ସଂଗଠନ ଦାବି କରିଛି।
