ନୂଆଦିଲ୍ଲୀ: ସୋମବାର ଲୋକସଭା ବାଚସ୍ପତି ଓମ ବିର୍ଲା କିଛି ରାଜନୈତିକ ଦଳର ନେତାଙ୍କୁ ଭେଟିଛନ୍ତି। ଏହି ସର୍ବଦଳୀୟ ବୈଠକରେ ସଂସଦରେ ଜାରି ରହିଥିବା ହଟ୍ଟଗୋଳକୁ ଶେଷ କରିବାର ଉପାୟ ଉପରେ ଆଲୋଚନା ହୋଇଛି । ଗୃହର ପ୍ରକ୍ରିୟା ସୁରୁଖୁରୁରେ ଚାଲିବାକୁ ସେ ସମସ୍ତ ସଦସ୍ୟଙ୍କୁ ନିବେଦନ କରିଛନ୍ତି। ଏହି ବୈଠକରେ ସମସ୍ତ ଦଳର ପ୍ରତିନିଧୀ ମାନେ ଡିସେମ୍ବର ୩ ରୁ ଲୋକସଭା ପ୍ରକ୍ରିୟାକୁ ସୁରୁଖୁରୁରେ ଚଳାଇବାକୁ ସହମତ ହୋଇଛନ୍ତି।

ଏଥି ସହ ଏହି ବୈଠକରେ ୧୩ ଏବଂ ୧୪ ଡିସେମ୍ବରରେ ସମ୍ବିଧାନ ଉପରେ ଏକ ସ୍ୱତନ୍ତ୍ର ଆଲୋଚନା ଆୟୋଜନ କରିବାକୁ ନିଷ୍ପତ୍ତି ନିଆଯାଇଛି। ଏହି ସମୟରେ, ସମ୍ବିଧାନର ଗୁରୁତ୍ୱ ଏବଂ ଏହାର ଅନେକ ଦିଗ ଗୃହରେ ଗଭୀର ଭାବରେ ଆଲୋଚନା ହେବ । ଏଥି ସହିତ ୧୬ ଏବଂ ୧୭ ଡିସେମ୍ବରରେ ରାଜ୍ୟସଭାରେ ସମାନ ପ୍ରସଙ୍ଗରେ ଆଲୋଚନା ହେବ।

ତେବେ ସୋମବାର ଅନୁଷ୍ଠିତ ଏହି ବୈଠକରେ କେନ୍ଦ୍ର ମନ୍ତ୍ରୀ କିରନ ରିଜିଜୁ, ଅର୍ଜୁନ ରାମ ମେଘୱାଲ, କଂଗ୍ରେସ ସାଂସଦ ଗୌରବ ଗୋଗୋଇ, ଏନସିପି ନେତା ସୁପ୍ରିୟା ସୁଲେ, ଟିଏମସି ସାଂସଦ କଲ୍ୟାଣ ବାନାର୍ଜୀଙ୍କ ସହ ବହୁ ବିଶିଷ୍ଟ ନେତା ଯୋଗ ଦେଇଥିଲେ। ଏହି ସଭାରେ ସମାଜବାଦୀ ପାର୍ଟି ସାଂସଦ ଧର୍ମେନ୍ଦ୍ର ଯାଦବ ମଧ୍ୟ ଉପସ୍ଥିତ ଥିଲେ। ଏହା ବ୍ୟତୀତ ରାଧାକୃଷ୍ଣନ୍ (ସିପିଆଇ) ଅରବିନ୍ଦ ସାଓ୍ବନ୍ତ (ଶିବସେନା-UBT) ଅଭୟ କୁଶବାହ (RJD) ଦିଲେଶ୍ବର କାମୌତ(JDU) ଉପସ୍ଥିତ ଥିଲେ ।