ପାଟଣାଗଡ଼, ୦୧/୦୭ : ବଲାଙ୍ଗୀର ଜିଲ୍ଲା ପାଟଣାଗଡ଼ ବ୍ଲକ୍ ଓ ଏନଏସିରେ ଆଠ ମାସ ହେଲା ଉନ୍ନୟନମୂଳକ କାମ ଠପ୍ ରହିଛି। ଏହାର ପ୍ରତିବାଦରେ ୫ଦିନ ହେଲା ବ୍ଳକର ମୁଖ୍ୟ ପ୍ରବେଶ ଦ୍ଵାର ସମ୍ମୁଖରେ ସମିତି ସଭ୍ୟସଭ୍ୟାମାନେ ଧାରଣାରେ ବସିଛନ୍ତି। ସେପଟେ ଧାରଣାରତ କାଉନସିଲରମାନେ ଏନଏସି କାର୍ଯ୍ୟାଳୟ ସମେତ ଅନ୍ୟାନ୍ୟ ବିଭାଗରେ ମଧ୍ୟ ତାଲା ବନ୍ଦ କରିଦେଇଛନ୍ତି। ବ୍ଳକ ସମ୍ମୁଖରେ ପୁଲିସ ପହଞ୍ଚି ସମିତି ସଭ୍ୟସଭ୍ୟାମାନଙ୍କୁ ମୁଖ୍ୟ ଦ୍ଵାର ସମ୍ମୁଖରେ ନବସିବାକୁ ଚାପ ପକାଇଛି। ହେଲେ ସେମାନେ ନିଜ ଜିଦ୍ରେ ଅଟଳ ଅଛନ୍ତି। ଉଭୟ ପକ୍ଷ ମଧ୍ୟରେ କଥା କଟାକଟି ହୋଇଛି। ଅନ୍ୟପଟେ ଏନଏସି କାର୍ଯ୍ୟାଳୟ ସମ୍ପୂର୍ଣ୍ଣ ଅଚଳ ହୋଇଯିବାରୁ ସେଠାରେ କିଛି ପୁଲିସ କର୍ମଚାରୀ ମୁତୟନ ଅଛନ୍ତି।
ସରକାରୀ ଅନୁଦାନକୁ ପାଟଣାଗଡ଼ ବିଧାୟକ ହସ୍ତକ୍ଷେପ କରୁଥିବା ନେଇ ସମିତି ସଭ୍ୟସଭ୍ୟାମାନେ ଅଭିଯୋଗ ଆଣିଛନ୍ତି। ଏପରିକି ତାଙ୍କ ଚାପରେ ବିଡିଓ ଏବଂ ଏନଏସି କାର୍ଯ୍ୟନିର୍ବାହୀ ଅଧିକାରୀ ଚୁପ୍ ରହୁଛନ୍ତି ବୋଲି ଗଣମାଧ୍ୟମ ଆଗରେ କହିଛନ୍ତି। ବ୍ଳକ୍ କାର୍ଯ୍ୟାଳୟ ସମ୍ମୁଖରେ ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀ, ସମିତି ସଭ୍ୟ ସଙ୍ଘର ସଭାପତି ଗୋବିନ୍ଦ ମେହେର, ଫଟାମୁଣ୍ଡା ସମିତି ସଭ୍ୟ ଜୟନ୍ତ କୁମ୍ଭାର, ଖୁଣ୍ଟସମଲାଇ ସମିତି ସଭ୍ୟା ସାବିତ୍ରୀ ନାଗ, ଶଙ୍କର ବାଗ ମଞ୍ଜୁରୀ ଭୋଇ, କଳ୍ପନା ବାରିକ, ଭୂମିସୁତା ଧରୁଆ, ଗାୟତ୍ରୀ ସା, ଚନ୍ଦ୍ର ଛତର, ସଗିତା ମିର୍ଦ୍ଧା, ସୁବର୍ଣ୍ଣ ସାହୁ, କୁମ୍ବଦିନୀ ସେଠ, ରଞ୍ଜନୀ ଧରୁଆ , ଗାୟତ୍ରୀ ସା, ଜୟନ୍ତୀ ସେଠଙ୍କ ସହ ଅନ୍ୟ ସମିତି ସଭ୍ୟ ସଭ୍ୟାମାନେ ଧାରଣାରେ ବସିଥିବା ବେଳେ ଏନଏସି କାର୍ଯ୍ୟାଳୟ ସମ୍ମୁଖରେ ଏନଏସି ଅଧ୍ୟକ୍ଷା ମାନସୀ ବିଶ୍ଵାଳଙ୍କ ସମେତ ଅନ୍ୟ କାଉନସିଲରମାନେ ଧାରଣାରେ ବସିଛନ୍ତି।
