ଫୁଲବାଣୀ,୨୮/୧୦: କନ୍ଧମାଳ ଜିଲ୍ଲା ଫୁଲବାଣୀସ୍ଥିତ ଜିଲ୍ଲା ମୁଖ୍ୟ ଚିକିତ୍ସାଳୟର ସ୍ତ୍ରୀ ଓ ପ୍ରସୂତି ରୋଗ ବିଭାଗରେ ଶିଶୁ ଅଦଳବଦଳ ହୋଇଛି । ଡାକ୍ତରଖାନା କର୍ତ୍ତୃପକ୍ଷଙ୍କ ତ୍ରୁଟିରୁ ଏଭଳି ଅଭାବନୀୟ ଘଟଣା ଘଟିଛି । ତଦନ୍ତରୁ ତ୍ରୁଟି ଧରାପଡ଼ିବା ପରେ ମା’କୋଳକୁ ଫେରିଛି ପୁଅ ।
ଅଭିଯୋଗ ଅନୁଯାୟୀ, ଶୁକ୍ରବାର ରାତିରେ ଫୁଲବାଣୀ କାଚରା ସାହିର ଦୀପକ ଖଟୁଆଳଙ୍କ ସ୍ତ୍ରୀ ଲିଜା ଏକ ସନ୍ତାନ ଜନ୍ମ ଦେଇଥିଲେ । ତାଙ୍କର ପୁଅ ହୋଇଥିବା ମେଡିକାଲ କର୍ତ୍ତୃପକ୍ଷ କହିଥିଲେ । ଶିଶୁଟିର ସ୍ୱାସ୍ଥ୍ୟାବସ୍ଥା ଠିକ୍ ନ ଥିବାରୁ ଏସ୍ଏନ୍ସିୟୁରେ ରଖାଯାଇଥିଲା । ରବିବାର ସକାଳେ ଶିଶୁର ସ୍ୱାସ୍ଥ୍ୟାବସ୍ଥା ଗୁରୁତର ଥିବା କହି ବ୍ରହ୍ମପୁର ନେବା ପାଇଁ ପରାମର୍ଶ ଦିଆଯାଇଥିଲା । ଏହାପରେ ଦୀପକ ଏବଂ ଲିଜା ଶିଶୁକୁ ଆମ୍ବୁଲାନ୍ସରେ ବ୍ରହ୍ମପୁର ବଡ଼ ମେଡିକାଲକୁ ନେଇଯାଇଥିଲେ । ସେଠାରେ ସ୍ୱାସ୍ଥ୍ୟାବସ୍ଥା ଯାଞ୍ଚ ବେଳେ ଶିଶୁଟି ଝିଅ ବୋଲି ଜଣାପଡ଼ିଥିଲା । ଏହା ଜାଣିବା ପରେ ପରିବାର ଲୋକଙ୍କ ଅକଲଗୁଡ଼ମ ହୋଇଯାଇଥିଲା ।
ପୁଅ କେମିତି ଝିଅ ହେଲା ବୋଲି ଭାବି ସେମାନେ ଚିନ୍ତାରେ ପଡ଼ିଯାଇଥିଲେ । ଘଟଣା ସମ୍ପର୍କରେ ସୂଚନା ପାଇ ସମ୍ପର୍କୀୟମାନେ ଫୁଲବାଣୀ ଡାକ୍ତରଖାନାରେ ପହଞ୍ଚି ତନାଘନା କରିଥିଲେ । ଏହାକୁ ନେଇ ଡାକ୍ତରଖାନାର ମାତୃ ଓ ଶିଶୁ ସ୍ୱାସ୍ଥ୍ୟ କେନ୍ଦ୍ରରେ ଚାପା ଉତ୍ତେଜନା ସୃଷ୍ଟି ହୋଇଥିଲା । ଟାଉନ୍ ପୁଲିସ ପହଞ୍ଚି ସ୍ଥିତି ସମ୍ଭାଳି ଥିଲା । ରେଜିଷ୍ଟାର ଯାଞ୍ଚ ବେଳେ ଶିଶୁକନ୍ୟା ରାଇକିଆ ବାଲିଗାଡା ଅଞ୍ଚଳର କିରଣ ପ୍ରଧାନ ଓ ଶାମୁକା ପ୍ରଧାନଙ୍କର ବୋଲି ଜଣାପଡ଼ିଥିଲା । ଶାମୁକା ଶୁକ୍ରବାର କ. ନୂଆଗାଁ ଡାକ୍ତରଖାନାରେ ଏକ କନ୍ୟା ସନ୍ତାନ ଜନ୍ମ ଦେଇଥିଲେ । ଶିଶୁର ସ୍ୱାସ୍ଥ୍ୟାବସ୍ଥା ଠିକ୍ ନ ଥିବାରୁ ତାକୁ ଫୁଲବାଣୀ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲା ।
ଶିଶୁ ଅଦଳବଦଳ ହୋଇଥିବା ସ୍ପଷ୍ଟ ହେବା ପରେ ତ୍ରୁଟି ସୁଧାରିବାକୁ ପ୍ରୟାସ କରିଛନ୍ତି ଡାକ୍ତରଖାନା କର୍ତ୍ତୃପକ୍ଷ । କିରଣ ଓ ଶାମୁକାଙ୍କୁ ଝିଅକୁ ଆଣିବା ପାଇଁ ବ୍ରହ୍ମପୁର ପଠାଯାଇଛି । ସେହିପରି ଦୀପକ ଏବଂ ଲିଜା ସନ୍ଧ୍ୟାରେ ଫୁଲବାଣୀ ଫେରି ପୁଅକୁ ପାଇଛନ୍ତି । ଶିଶୁପୁତ୍ରର ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସୁ ନ ଥିବାରୁ ତାକୁ ବ୍ରହ୍ମପୁର ସ୍ଥାନାନ୍ତର କରିବାକୁ ଡାକ୍ତର ପରାମର୍ଶ ଦେଇଛନ୍ତି ।
