ନୂଆଦିଲ୍ଲୀ,୦୧/୦୯: ଚୀନ୍ ତିଆନଜିନ୍ ଅନୁଷ୍ଠିତ ଏସସିଓ ସମ୍ମିଳନୀରେ, ତିନି ପ୍ରମୁଖ ଶକ୍ତି ଭାରତ, ଚୀନ୍ ଏବଂ ରୁଷକୁ ଗୋଟିଏ ମଞ୍ଚରେ ଏକାଠି ଦେଖିବାକୁ ମିଳିଛି । ପ୍ରଧାନମନ୍ତ୍ରୀ ମୋଦି, ରୁଷ ରାଷ୍ଟ୍ରପତି ପୁଟିନ୍ ଏବଂ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ପରସ୍ପରକୁ ଭେଟି ଏକ ବୈଠକ କରିଥିଲେ । ଏସସିଓ ସମ୍ମିଳନୀ କାର୍ଯ୍ୟକ୍ରମ ପରେ, ପ୍ରଧାନମନ୍ତ୍ରୀ ମୋଦି ଏବଂ ରାଷ୍ଟ୍ରପତି ପୁଟିନ୍ ମଧ୍ୟରେ ଦ୍ୱିପାକ୍ଷିକ ଆଲୋଚନା ହୋଇଥିଲା । ଗୋଟିଏ ପଟେ ଆମେରିକା ଭାରତ ଉପରେ ଅତିରିକ୍ତ ଶୁଳ୍କ ଲାଗୁ କରୁଛି ଏବଂ ରୁଷରୁ ତେଲ କିଣିବା ପାଇଁ ଏହାକୁ ଟାର୍ଗେଟ କରୁଛି, ଦୁଇ ଦେଶ ମଧ୍ୟରେ ଏହି ଆଲୋଚନା ବହୁତ ଗୁରୁତ୍ୱପୂର୍ଣ୍ଣ ଥିଲା । ଦୁଇ ବିଶ୍ୱ ନେତାଙ୍କ ମଧ୍ୟରେ ରୁଷ-ୟୁକ୍ରେନ ଯୁଦ୍ଧ ଶୀଘ୍ର ସମାପନ ହେଉ ବୋଲି ଆଶା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଭାରତ ସର୍ବଦା ଶାନ୍ତି ସପକ୍ଷରେ, ସଂଘର୍ଷ ସମାପ୍ତ ମାନବିକତା ପାଇଁ ଭଲ ବୋଲି କହିଛନ୍ତି ପ୍ରଧାନମନ୍ତ୍ରୀ ।
"ଉଭୟ ଦେଶ କାନ୍ଧରେ କାନ୍ଧ ମିଶାଇ ଚାଲିଛନ୍ତି"- ଦ୍ୱିପାକ୍ଷିକ ବୈଠକ ନେଇ ପ୍ରଧାନମନ୍ତ୍ରୀ ମୋଦି କହିଛନ୍ତି, ''ମୁଁ ସର୍ବଦା ଅନୁଭବ କରେ ଯେ ଆପଣଙ୍କ ସହିତ ସାକ୍ଷାତ ବେଶ୍ ସ୍ମରଣୀୟ । ଆମକୁ ଅନେକ ବିଷୟ ଉପରେ ସୂଚନା ଆଦାନପ୍ରଦାନ କରିବାର ସୁଯୋଗ ମିଳିଛି । ଆମେ ନିରନ୍ତର ଯୋଗାଯୋଗରେ ରହିଛୁ । ଅନେକ ସମୟରେ ଦୁଇ ପକ୍ଷ ମଧ୍ୟରେ ଉଚ୍ଚସ୍ତରୀୟ ବୈଠକ ହୋଇଛି । ୧୪୦ କୋଟି ଭାରତୀୟ ଡିସେମ୍ବରରେ ହେବାକୁ ଥିବା ୨୩ତମ ଶିଖର ସମ୍ମିଳନୀ ପାଇଁ ଉତ୍ସାହର ସହିତ ଅପେକ୍ଷା କରିଛନ୍ତି । ଏହା ଆମର ବିଶେଷ ସହଭାଗୀରକୁ ପ୍ରତିଫଳିତ କରେ । ଭାରତ ଏବଂ ରୁଷ ସବୁବେଳେ କଷ୍ଟକର ପରିସ୍ଥିତିରେ ମଧ୍ୟ କାନ୍ଧରେ କାନ୍ଧ ମିଶାଇ ଠିଆ ହୋଇଛନ୍ତି । ଆମର ଘନିଷ୍ଠ ସହଯୋଗ କେବଳ ଉଭୟ ଦେଶର ଲୋକଙ୍କ ପାଇଁ ନୁହେଁ ବରଂ ବିଶ୍ୱ ଶାନ୍ତି ଏବଂ ସ୍ଥିରତା ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ । ୟୁକ୍ରେନରେ ଚାଲିଥିବା ସଂଘର୍ଷ ବିଷୟରେ ନିରନ୍ତର ଆଲୋଚନା କରି ଆସୁଛି । ଶାନ୍ତି ପାଇଁ ଆମେ ସାମ୍ପ୍ରତିକ ସମସ୍ତ ପ୍ରୟାସକୁ ସ୍ୱାଗତ କରୁଛୁ । ଯଥାଶୀଘ୍ର ସଂଘର୍ଷର ଅନ୍ତ କରି ସ୍ଥାୟୀ ଶାନ୍ତି ପ୍ରତିଷ୍ଠା କରିବା ପାଇଁ ଏକ ଉପାୟ ଖୋଜିବାକୁ ପଡିବ। ଏହା ସମଗ୍ର ମାନବଜାତିର ଆହ୍ୱାନ ।''
'ମୁଁ ବହୁତ ଖୁସି' - ଦ୍ବିପାକ୍ଷିକ ଆଲୋଚନା ଅବସରରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ୍ ପ୍ରଧାନମନ୍ତ୍ରୀ ମୋଦିଙ୍କ ସହ ତାଙ୍କର ସାକ୍ଷାତ ପାଇଁ ଖୁସି ପ୍ରକାଶ କରିଛନ୍ତି । ସେ କହିଛନ୍ତି, ପ୍ରଧାନମନ୍ତ୍ରୀ ମୋଦିଙ୍କୁ ଭେଟି ମୁଁ ବହୁତ ଖୁସି । ଏହା ଗୁରୁତ୍ୱପୂର୍ଣ୍ଣ ଯେ ଆମେ ସିଏସ୍ସିଓ ଶିଖର ସମ୍ମିଳନୀ ସମୟରେ ସାକ୍ଷାତ କରୁଛୁ । ଏହା ଏକ ପ୍ଲାଟଫର୍ମ ଯାହା ବିଶ୍ୱ ଦକ୍ଷିଣ ଏବଂ ପୂର୍ବର ଦେଶଗୁଡ଼ିକୁ ଏକତ୍ର କରେ ।
