ଭୁବନେଶ୍ୱର ୩୦/୮ (ଆଇଜଲରୁ ସମ୍ବିତ କୁମାର ବେହେରା) :‘ପାହାଡି଼ ରାଇଜ’ ମିଜୋରାମରେ ଯୁଆଡ଼େ ଅନେଇବ ଖାଲି ପାହାଡ଼ ଆଉ ଘଞ୍ଚ ଜଙ୍ଗଲ । ଝରଣା ଆଉ ନଦୀ ନାଳରେ ଭରପୂର ଚତୁର୍ଦ୍ଦିଗ । ସେଇ ଦୁର୍ଗମ ପାହାଡ଼ମାଳାର ବୁକୁ ଚିରି ଏବେ ଗଡ଼ିବ ଟ୍ରେନ୍ ।
ମିଜୋରାମବାସୀଙ୍କ ବହୁ ଦଶନ୍ଧିର ସ୍ୱପ୍ନ ସାକାର ହୋଇଛି । ଭାରତୀୟ ରେଳ ମ୍ୟାପ୍ରେ ସ୍ଥାନ ପାଇଛି ମିଜୋରାମ ରାଜଧାନୀ ତଥା ନିରବ ସହର ‘ଆଇଜଲ’ । ଏହି ନିରବ ସହରର ଲାଇଫ୍ଲାଇନ୍ ସାଜିବ ସାଇରଙ୍ଗ-ବଇରବି ରେଳପଥ । ସୁଉଚ୍ଚ ବ୍ରିଜ୍, ମାଳମାଳ ସୁଡ଼ଙ୍ଗରେ ଭରପୂର ଏହି ଗଗନଚୁମ୍ବି ରେଳପଥକୁ ଆସନ୍ତା ସେପ୍ଟେମ୍ବର ୧୩ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦ୍ଘାଟନ କରିବେ ।
ଭାରତୀୟ ରେଳବାଇର ବିଶ୍ୱକର୍ମାମାନଙ୍କ ଦକ୍ଷତା, ସମର୍ପଣ ଏବଂ ସଂକଳ୍ପର ଏହି ପ୍ରତୀକ ହେଉଛି ଏହି ରେଳ ପ୍ରକଳ୍ପ । ପୂର୍ବରୁ ଏଠି ସ୍ଥିତି କ’ଣ ଥିଲା? ଏବେ କ’ଣ ବଦଳିଛି? ଉତ୍ତର-ପୂର୍ବ ଭାରତରେ କିଭଳି ବିକାଶର ସୂର୍ଯ୍ୟ ଉଇଁବାରେ ଲାଗିଛି? ତାହା ପରଖିବା ପାଇଁ ଗ୍ରାଉଣ୍ଡ ଜିରୋରେ ପହଞ୍ଚିଥିଲା ‘ପ୍ରମେୟ’ ।
ଆଇଜଲ ସହରଠୁ ୧୫ କିମି ଦୂର ସାଇରଙ୍ଗ ରେଳଷ୍ଟେସନରୁ ଆମ ଯାତ୍ରା ଆରମ୍ଭ ହେଲା । ଟ୍ରାଏଲ ରନ୍ ପାଇଁ ଥିବା ଟ୍ରେନ୍ରେ ୩ଟି ବଗି ଖଞ୍ଜାଯାଇଥିଲା । ଆମେ ଭେଷ୍ଟାଡୋମ୍ ବଗିରେ ବସିଲୁ । କିଛି ବାଟ ରେଳ ଗଡି଼ବା ପରେ ଆସିଲା ସେତୁ ନଂ-୧୯୬ । ସୁଉଚ୍ଚ ସେତୁର ସ୍ଥିତି ପରଖିବାକୁ ଆମେ ଭେଷ୍ଟାଡୋମ୍ରୁ ତଳକୁ ଓହ୍ଲାଇଲୁ । ଯୁଆଡ଼େ ଅନେଇବ, ଖାଲି ପର୍ବତମାଳା ଆଉ ଘଞ୍ଚ ଜଙ୍ଗଲ । ବ୍ରିଜ୍ ତଳକୁ ଆଖି ପାଉନଥିଲା । ୧୦୦ ମିଟର ତଳେ ଏକ ଝରଣାରୁ ପାଣି ବହୁଥିଲା ।
୨ଟି ବିଶାଳକାୟ କଂକ୍ରିଟ୍ ସ୍ପାନ୍ ଛାତିରେ ଛିଡ଼ା ହୋଇଥିଲା ୧୧୪ ମିଟର ଉଚ୍ଚ ଏହି ବ୍ରିଜ । ଗୋଟିଏ ସ୍ପାନ୍ ତଳେ ନଈ ପାଣି ବହିଯାଉଥିଲା। ୩ଟି ଛୋଟ ସ୍ପାନ୍ ସେତୁକୁ ସପୋର୍ଟ ଦେଉଥିଲା । ରେଳ କର୍ତ୍ତୃପକ୍ଷଙ୍କଠୁ ପଚାରି ବୁଝୁବୁଝୁ ଜଣାପଡି଼ଲା, ଭାରତୀୟ ରେଳପଥର ତୃତୀୟ ଉଚ୍ଚ ବ୍ରିଜ୍ ଏଇଟା । ଦିଲ୍ଲୀର କୁତବ୍ମିନାରଠୁ ବି ୪୨ ମିଟର ଉଚ୍ଚ । ଏହି ସେତୁ ଭୂସ୍ଖଳନ ଓ ଭୂକମ୍ପ ନିରୋଧୀ ।
ପୁଣି ଚଢ଼ିଲୁ ଭେଷ୍ଟାଡୋମ୍ରେ । ଆକାଶରେ ବାଦଲ ଭାସିବା ଭଳି ଟ୍ରେନ୍ଟି ପାହାଡ଼ ଶିଖରରେ ମାଡ଼ି ଚାଲିଲା ଆଗକୁ । ୧୦ କିମି ପରେ ପଡି଼ଲା ରେଳ ଲାଇନ୍ର ସବୁଠୁ ବଡ଼ ତଥା ସୁଡ଼ଙ୍ଗ ନଂ ୪୦ ଯାହାର ଲମ୍ବ ୧୩୭୨ ମିଟର । ସୁଡ଼ଙ୍ଗ ଭିତରେ ଅନ୍ଧାର ନ ଥିଲା । ଲାଇଟ୍ ଖଞ୍ଜାଯାଇଥିଲା । ପାହାଡ଼ରୁ ମାଟି ଅତଡ଼ା ନ ଧସିବା ପାଇଁ ଟନେଲ୍ର ୨ଟି ପାଶ୍ୱର୍ରେ ପ୍ରଶସ୍ଥ କଂକ୍ରିଟ୍ ଢଳେଇ ଦିଆଯାଇଥିଲା କିନ୍ତୁ ସୁଡ଼ଙ୍ଗରେ ଅଘଟଣ ଘଟିବାର ଆଶଙ୍କା ଆମ ମନରେ ଉଠିଲା ।
ରେଳବାଇ କର୍ତ୍ତୃପକ୍ଷ କହିଲେ, ଅନ୍ଧାରିଆ ଟନେଲ୍ରେ ମୋବାଇଲ୍ ନେଟୱର୍କ ମିଳେନି । ଯୋଗାଯୋଗ ପାଇଁ ଟନେଲ୍ରେ ସିମ୍ ଲେସ କନେକ୍ସନ୍ ବା ସୁଡ଼ଙ୍ଗ ରେଡ଼ିଓ ବ୍ୟବସ୍ଥା ରହିଛି । ଭିତରେ ଟ୍ରେନ୍ ଅଟକିଗଲେ କିମ୍ବା କୌଣସି ଅଘଟଣ ଘଟିଲେ ଟନେଲକୁ ଏମିତି ନିର୍ମାଣ କରାଯାଇଛି ଯେ ଭିତରର ଶଦ୍ଦ ବାହାରକୁ ଶୁଣାଯିବ ।
୫୧.୩୮ କିମିର ଯାତ୍ରା ପରେ କୋଲାସିଭ ଜିଲ୍ଲାର ବଇରବି ରେଳଷ୍ଟେସନରେ ପହଞ୍ଚିଲା ଭେଷ୍ଟାଡୋମ୍ । ମଝିରେ ପଡ଼ିଥିଲା ହରତକି, କଂପୁଇ, ମଅଲଖଙ୍ଗ ନାମକ ୩ଟି ଷ୍ଟେସନ । ଏସବୁ ଷ୍ଟେସନ ପ୍ଲାଟଫର୍ମରେ କେହି ଯାତ୍ରୀ ନଥିଲେ କିନ୍ତୁ ଟ୍ରେନ୍କୁ ଦେଖି ଉତ୍ସାହିତ ହୋଇଯାଉଥିଲେ ସ୍ଥାନୀୟ ଲୋକ । କାହାରି ଆଖିର ପଲକ ପଡୁନଥିଲା । ଦୃଶ୍ୟଟି ଦେଖି ଲାଗିଲା, ଯେମିତି ଏହି ପ୍ରକଳ୍ପ ସେମାନଙ୍କ ପାଇଁ ଆଗକୁ ଲାଇଫ୍ଲାଇନ୍ ପାଲଟିବ ।
ରେଳଲାଇନ୍ର ଶୋଭାକୁ ଦ୍ୱିଗୁଣିତ କରୁଛି ଛୋଟ ବଡ଼ ୪୮ଟି ସୁଡ଼ଙ୍ଗ । ଭିତରେ ଟ୍ରେନ ଗଡ଼ିବା ବେଳେ ଛାତି ଧକ୍ଧକ୍ ହେଉଥିଲା । ଏସବୁ ସୁଡ଼ଙ୍ଗର ଲମ୍ବ ପାଖାପାଖି ୧୩ କିମି । ରେଳଲାଇନ୍ରେ ୮୭ ଟି ଛୋଟ ଓ ୫୫ ବଡ଼ ସେତୁ ରହିଛି । ସୁଉଚ୍ଚ ସେତୁ ଉପରୁ ତଳକୁ ଅନେଇବା ବେଳକୁ ମୁଣ୍ଡ ଚକ୍କର କାଟୁଥିଲା । ରେଳପଥର ରାସ୍ତା ଉପରେ ୫ଟି, ରାସ୍ତା ତଳେ ୬ଟି ସେତୁ ନିର୍ମାଣ ହେଇଛି । ଆଉ ଭିଷ୍ଟାଡୋମ୍ ଟ୍ରେନର କାଚ ଝରକାରୁ ମନଲୋଭା ପ୍ରାକୃତିକ ସୌନ୍ଦର୍ଯ୍ୟର ଝଲକ ଭୁପୃଷ୍ଠରେ ଦ୍ୱିତୀୟ ସ୍ୱର୍ଗର ଅନୁଭୂତି ଦେଉଥିଲା ।
ରେଳବାଇ ବିଶ୍ୱକର୍ମାଙ୍କ ଏହି ବିଶ୍ୱସ୍ତରୀୟ ନିର୍ମାଣ ଆମକୁ ଯେତିକି ଆଶ୍ଚର୍ଯ୍ୟ ଚକିତ କରିଥିଲା, ପ୍ରାକୃତିକ ସୌନ୍ଦର୍ଯ୍ୟ ସେତିକି ବିମୋହିତ କରୁଥିଲା । ସତରେ ରେଳଲାଇନ୍ଟି ଥିଲା ଅନନ୍ୟ ଆଉ ଅଦ୍ୱିତୀୟ । ଯେଉଁଠି ଦିନେ ସାତ ସପନ ଲାଗୁଥିଲା ସେତୁ କି ସୁଡ଼ଙ୍ଗ ନିର୍ମାଣ, ସେଇଠି ନିର୍ମାଣ ହୋଇଛି ୫୧.୩୮ କିମିର ସୁଉଚ୍ଚ ରେଳଲାଇନ୍ । ଯେଉଁ ସହରରେ କେହି ବି ଗାଡ଼ି ହର୍ଣ୍ଣ ବଜାନ୍ତିନି ସେଇଠି ଏବେ ଟ୍ରେନର ପଁ ପଁ ଶଦ୍ଦ ଶୁଭୁଛି ।
ମିଜୋରାମ୍ ପର୍ଯ୍ୟଟନକୁ ବୁଷ୍ଟର୍ ଡୋଜ୍
ସାତ ଭଉଣୀର ରାଜ୍ୟ ମିଜୋରାମ ପର୍ଯ୍ୟଟନ ପାଇଁ ବୁଷ୍ଟର ଡୋଜ୍ ସାଜିବ ଏହି ପ୍ରକଳ୍ପ । ଏହା କହିଛନ୍ତି ଅବସରପ୍ରାପ୍ତ ରାଜସ୍ୱ ଅଧିକାରୀ ଭେନ୍ ହୁଇଲିଆନା ସାଇଲୋ । ତାଙ୍କ ମତରେ ଦେଶ ବିଦେଶର ପର୍ଯ୍ୟଟକକୁ ଟାଣିବା ପାଇଁ ରେଳବାଇ କର୍ତ୍ତୃପକ୍ଷ ଭିଷ୍ଟାଡୋମ୍ ଟ୍ରେନ୍ ଚଳାଇବା ଯୋଜନାରେ ଅଛନ୍ତି । ଭିଷ୍ଟାଡୋମ୍ ଟ୍ରେନ୍ରୁ ପର୍ଯ୍ୟଟକମାନେ ସୁଉଚ୍ଚ ପର୍ବତମାଳା ଓ ଜଳପ୍ରପାତର ମଜା ନେଇପାରିବେ । ୫-୬ ଲକ୍ଷ ଆଇଜଲବାସୀଙ୍କ ଜୀବନଯାତ୍ରାର ମୁଖ୍ୟ ଅଙ୍ଗ ପାଲଟିବ ଏହି ରେଳ ଲାଇନ୍ । ବିପଦପୂର୍ଣ୍ଣ ସଡ଼କପଥ ଯନ୍ତ୍ରଣାରୁ ମୁକ୍ତି ମିଳିବ । ସାତଭଉଣୀର ଗେଟ୍ୱେ ଗୌହାଟୀକୁ ସିଧା ଟ୍ରେନ୍ରେ ଯାତ୍ରା କରିହେବ । ଦିଲ୍ଲୀ, ମୁମ୍ବାଇ, କୋଲକାତାକୁ ବି ଯାଇହେବ ।
ଆଗକୁ ୨୦୦ କିମିର ରେଳପଥ
ପୂର୍ବରୁ ମିଜୋରାମର ମାତ୍ର ୫ କିମି (ଆସାମ ସୀମାରୁ ବଇରବି ରେଳଷ୍ଟେସନ ପର୍ଯ୍ୟନ୍ତ) ରେ ରେଳ ଗଡୁଥିଲା । ବଇରବିରୁ ଆଇଜଲକୁ ଛୁଇଁନଥିଲା ରେଳପଥ । ୮୬୦୫ କୋଟି ଖର୍ଚ୍ଚରେ ନିର୍ମିତ ଏହି ଗଗନଚୁମ୍ବୀ ରେଳପଥ ଜାତୀୟ ରେଳ ନେଟ୍ୱର୍କ ସହ ଆଇଜଲକୁ ଯୋଡ଼ିଛି। ତ୍ରିପୁରାର ଅଗରତାଲାରୁ ମଣିପୁରର ଇମ୍ଫାଲକୁ ଲମ୍ବିଥିବା ରେଳ ରୁଟ୍କୁ ଏହି ରେଳ ଲାଇନ ବଇରବିଠାରେ ଛୁଇଁଛି ।୨୦୦୯ ମସିହାରେ ରେଳ ପ୍ରୋଜେକ୍ଟକୁ ସ୍ୱୀକୃତି ମିଳିଥିଲା । ୨୦୧୪ ନଭେମ୍ବରରେ ମୋଦି ଶିଳାନ୍ୟାସ କରିଥିଲେ । ଆଗକୁ ବଇରବିରୁ ମିଆଁମାର ସୀମା ଯାଏ ୨୦୦ କିମି ରେଳପଥ ନିର୍ମାଣ ଯୋଜନା ରହିଛି ।
