ଭୁବନେଶ୍ୱର,୦୪/୦୪: ରାଜ୍ୟ ବାହାରୁ ଆସି ରାଜଧାନୀରେ ଲୁଟ୍ପାଟ୍, ଛିନତାଇ, ଚୋରି କରି ଆତଙ୍କ ଖେଳାଉଥିବା ଅପରାଧୀମାନେ ହୁସିଆର... । ପୁଲିସ୍ ଗୁଳିରେ ଘାଇଲା ହେବା ଏକରକମର ଥୟ । କମିଶନରେଟ୍ ପୁଲିସର ଏହି ସିରିଜ୍ ଏନ୍କାଉଣ୍ଟରର ୨ କୁଖ୍ୟାତ ବିହାରୀ ଲୁଟେରା ଶିକାର ହୋଇଛନ୍ତି । ରାଜଧାନୀ ଉପକଣ୍ଠ ବାଙ୍କୁଆଳ ନଈପଠାରେ ସ୍ପେଶାଲ ସ୍କ୍ୱାଡ୍ ଉଭୟଙ୍କୁ ଗୁଳି କରି ଘାଇଲା କରିଛି ।
ଲୁଟେରା ଦ୍ୱୟ ହେଲେ, ମନୀଷ କୁମାର ଯାଦବ (୨୪) ଓ ସୋନୁ କୁମାର ଯାଦବ(୨୭) । ଉଭୟଙ୍କ ଘର ବିହାରର କଠିଆର ଜିଲ୍ଲାରେ । ଏମାନେ ବିହାରର କୁଖ୍ୟାତ ଖୋରା ଗ୍ୟାଙ୍ଗ ସଦସ୍ୟ । ଉଭୟଙ୍କ ବାମ ଗୋଡ଼ ଆଣ୍ଠୁରେ ଗୁଳି ବାଜିଛି । ସେମାନଙ୍କ ଠାରୁ ପୁଲିସ୍ ୨ଟି ବନ୍ଧୁକ, ଫୁଟା ଗୁଳି, ଗୋଟିଏ ଚୋରା ବାଇକ୍ ଓ ସୁନା ଚେନ୍ ଜବତ କରିଛି ।
ଡବଲ ଏନ୍କାଉଣ୍ଟର ପରେ ରାଜ୍ୟ ବାହାର ଅପରାଧୀଙ୍କୁ ପୁଲିସ କମିଶନର ଡ. ସୁରେଶ ଦେବଦତ୍ତ ସିଂ ଚେତାବନୀ ଦେଇ କହିଛନ୍ତି, ପୁଲିସ କୋ ଫ୍ଲାୱାର ସମଝେ କ୍ୟା । ଫ୍ଲାୱାର ନହିଁ, ଫାୟାର ହେଁ ପୁଲିସ୍... । ଶ୍ରୀ ସିଂଙ୍କ କହିବା ମୁତାବକ, ଗତ ୨୦ ତାରିଖରେ ରାଜଧାନୀରେ ସିରିଜ୍ ଲୁଟ୍ ହୋଇଥିଲା । ଗୋଟିଏ କି ଦୁଇଟି ନୁହେଁ, ସହରରୁ ଏକାବେଳକେ ୬ଟି ଜାଗାରେ ସୁନା ଚେନ୍ ଲୁଟ୍ ହୋଇଥିଲା । ମଞ୍ଚେଶ୍ୱର ଥାନା ଅଞ୍ଚଳର ପଳାଶୁଣୀଠାରେ ଏକ ଫଚ୍ୟୁନର କାର ଭିତରୁ ଅମୂଲ୍ୟ ଚମ୍ପତ୍ତିଙ୍କ ସ୍ତ୍ରୀଙ୍କଠାରୁ ସୁନା ଚେନ୍ ଲୁଟି ନେଇଥିଲେ । ବଡ଼ଗଡ଼ ଥାନାରୁ ୨ଟି ଜାଗାରୁ ସୁନା ଲୁଟ୍ ହୋଇଥିଲା । ଏହାଛଡ଼ା ଶ୍ରୀଲିଙ୍ଗରାଜ, ଚନ୍ଦ୍ରଶେଖରପୁର ଓ କ୍ୟାପିଟାଲ ଥାନା ଅଞ୍ଚଳରେ ୬ଟି ସୁନା ଚେନ୍ ଲୁଟ କରି ସହର ପାର୍ ହୋଇଯାଇଥିଲେ ।
ଏମାନଙ୍କୁ ଧରିବାକୁ ସ୍ପେଶାଲ୍ ସ୍କ୍ୱାଡ୍କୁ ନିର୍ଦ୍ଦେଶ ଦେଇଥିଲେ ଡିସିପି ଜଗମୋହନ ମୀନା । ସ୍ପେଶାଲ ସ୍କ୍ୱାଡ୍ ମୁଖିଆ ଏସିପି ହିମାଂଶୁ ସ୍ୱାଇଁ ଏହି ସମସ୍ତ ଅପରାଧସ୍ଥଳର ସିସି କ୍ୟାମେରା ଯାଞ୍ଚରୁ ତଦନ୍ତ ପ୍ରକ୍ରିୟା ଆରମ୍ଭ କଲେ । ସୋନୁ ଓ ମନିଷକୁ ଚିହ୍ନଟ କରିଥିଲେ ସତ । କିନ୍ତୁ ବାଇକ୍ଟି ଚୋରା ହୋଇଥିବାରୁ ସେମାନଙ୍କ ପରିଚୟ ମିଳି ପାରିନଥିଲା । ଏହାବାଦ୍ ବିଭିନ୍ନ ଜେଲ୍ରୁ ଫେରିଥିବା ପେସାଦାର ଲୁଟେରା ଓ ଅନ୍ୟ ଅପରାଧୀଙ୍କୁ କୁଣ୍ଡଳି ବାହାର କରିଥିଲେ ।
ବୁଧବାର ବିଳମ୍ବିତ ରାତିରେ ଏମାନେ ଭୁବନେଶ୍ୱର ରେଳଷ୍ଟେସନ ଦେଇ ସହରରେ ପଶିଥିବାର ଖବର ପାଇଥିଲେ ହିମାଂଶୁ । ଏମାନଙ୍କୁ ଧରିବା ପାଇଁ ସେ ଜାଲ ବିଛାଇଥିଲେ । ତାଙ୍କ ନିର୍ଦ୍ଦେଶକ୍ରମେ ବିଭିନ୍ନ ସମ୍ବେଦନଶୀଳ ଛକରେ ପୁଲିସ ଭ୍ୟାନ୍ ପଇଁତରା ମାରୁଥିଲା । ଗୁରୁବାର ରାତି ପ୍ରାୟ ୮ଟାରେ ଏମାନେ ବଡ଼ଗଡ଼ ଥାନା ପୁରୀ-କଟକ ବାଇପାସ୍ ରାସ୍ତାରେ ଚକ୍କର କାଟୁଥିବା ଅଟୋମେଟିକ୍ ନମ୍ବର ପ୍ଲେଟ୍ ରେକଗନାଇଜେସନ କ୍ୟାମେରା (ଏଏନ୍ପିଆର) ଫୁଟେଜରୁ ଜଣାପଡି଼ଥିଲା । ହିମାଂଶୁ ତାଙ୍କ ଟିମ୍ ସହ ପୁରୀ ବାଇପାସ୍ କେଶୁରା ଛକରେ ପହଞ୍ଚିଥିଲେ । ଉକ୍ତ ରାସ୍ତାରେ ପୁଲିସ ଭ୍ୟାନ୍ ଦେଖି ମନୀଷ ଓ ସୋନୁ ବାଇକ୍ରେ ଦ୍ରୁତ ଗତିରେ ସାଇମନ୍ଦିର ଦେଇ ବାଙ୍କୁଆଳ ରାସ୍ତା ଆଡ଼େ ପଳାଇଥିଲେ । ହିମାଂଶୁଙ୍କ ସନ୍ଦେହ ହେବାରୁ ସେମାନଙ୍କୁ ପିଛା କରିଥିଲେ । ବାଙ୍କୁଆଳସ୍ଥିତ କୁଆଖାଇ ନଦୀ ବନ୍ଧରେ ଦ୍ରୁତଗତିରେ ଯିବାବେଳେ ଏକ ସିମେଣ୍ଟ ଚଟାଣରେ ବାଇକ୍ଟି ପିଟି ହୋଇଗଲା । ଉଭୟେ ତଳେ ପଡି଼ଗଲେ । ସୋନୁ ପୁଲିସ୍କୁ ଗୁଳି ଚଳାଇ ଖସିଯିବାକୁ ଉଦ୍ୟମ କରିଥିଲା । ସ୍ପେଶାଲ ସ୍କ୍ୱାଡ୍ର ଅଧିକାରୀମାନେ ପାଲଟା ଫାୟାରିଂ କରିଥିଲେ । ପୁଲିସ୍ର ମାଡ଼ରେ ମନୀଷ ଓ ସୋନୁ ଆହତ ହୋଇଥିଲେ । ଗୁଳି ଉଭୟଙ୍କ ବାମ ଗୋଡ଼ ଆଣ୍ଠୁରେ ବାଜିଥିଲା । ଉଭୟଙ୍କଠାରୁ ୯ ଏମ୍ଏମ୍ ଓ ୭.୬୫ ଏମ୍ଏମ୍ର ୨ଟି ପିସ୍ତଲ ଜବତ କରାଯାଇଛି । ପୁଲିସ୍ ସେମାନଙ୍କୁ କାବୁ କରି କ୍ୟାପିଟାଲ୍ ହସ୍ପିଟାଲ୍କୁ ଆଣିଥିଲା । ପ୍ରାଥମିକ ଚିକିତ୍ସା ପରେ କଟକ ବଡ଼ମେଡିକାଲ୍କୁ ପଠାଇ ଦିଆଯାଇଛି । ଶୁକ୍ରବାର ଦୁଇ ଜଣଙ୍କର ଅସ୍ତ୍ରୋପଚାର ହେବ ବୋଲି ପୁଲିସ୍ କହିଛି ।
ଡିସିପି ଶ୍ରୀ ମୀନା କହିଛନ୍ତି, ଏହି ଦୁଇ ଜଣ ବିହାର ‘ଖୋରା’ ଗ୍ୟାଙ୍ଗ୍ର ପ୍ରମୁଖ ସଦସ୍ୟ । ‘ଖୋରା’ ଗ୍ୟାଙ୍ଗ୍ ଲୁଟେରାମାନେ ବିହାର, ପଶ୍ଚିମବଙ୍ଗ ସମେତ ଅନ୍ୟାନ୍ୟ ରାଜ୍ୟରେ ସୁନା ଚେନ୍ ଲୁଟ୍ପାଟ କରନ୍ତି । ଏମାନେ ଟ୍ରେନ୍ରେ କୌଣସି ଏକ ସହରରେ ପହଞ୍ଚିବା ପରେ ସେଠାରୁ ଏକ ବାଇକ୍ ଚୋରି କରିଥାନ୍ତି । ଉକ୍ତ ଚୋରା ବାଇକ୍ରେ ସହର ସାରା ବୁଲି ବୁଲି ସିରିଜ୍ ସୁନା ଚେନ୍ ଲୁଟ୍ କରନ୍ତି । ଲୁଟ୍ପାଟ୍ ସାରି ଉକ୍ତ ସହରର ରେଳଷ୍ଟେସନର ପାର୍କିଂରେ ବାଇକ୍କୁ ରଖି ବିହାର ପଳାନ୍ତି । ସେଠାରେ ଲୁଟ୍ ସୁନା ଚେନକୁ ବିକି ଦିଅନ୍ତି । ସୂଚନାଯୋଗ୍ୟ, ଗତ ଦୁଇ ମାସରେ ଭୁବନେଶ୍ୱର ୟୁପିଡିର ଏହା ତୃତୀୟ ଏନ୍କାଉଣ୍ଟର । ଫେବ୍ରୁଆରୀ ୨୭ରେ କୁଖ୍ୟାତ ଆପାର୍ଟମେଣ୍ଟ ଲୁଟେରା ଅର୍ଜୁନ ଅନାରେକୁ ବାଲିଅନ୍ତା କେନାଲ ରୋଡରେ ଏନ୍କାଉଣ୍ଟର କରିଥିଲା ସ୍ପେଶାଲ୍ ସ୍କ୍ୱାଡ୍ । ମାର୍ଚ୍ଚ ୯ରେ ସ୍ପେଶାଲ ସ୍କ୍ୱାଡ୍ ଗୁଳିରେ ବିହାରର କୁଖ୍ୟାତ ଏଟିଏମ୍ ଲୁଟେରା ଦିପକ କୁମାର ଘାଇଲା ହୋଇଥିଲା ।
