ମାଲକାନଗିରି : ଦଖଲ ଜମିପଟ୍ଟା, ଜଙ୍ଗଲ ଜମି ପଟ୍ଟା ଯୋଗାଇ ଦେବା ଓ ପାଟିସନ ଅନ୍ୟ ଜମିଜମା ମାମଲା ଫଇସଲା କରିବା ପାଇଁ, ମାଥିଲି ତହସିଲର ରାଜସ୍ୱ ନିରୀକ୍ଷକ କାହ୍ନୁଚରଣ ସ୍ୱାଇଁ ଶତାଧିକ ଗରିବ ଆଦିବାସୀ ଚାଷୀଙ୍କ ଠାରୁ ଲକ୍ଷାଧିକ ଟଙ୍କା ଲାଞ୍ଚ ନେବାର ଅଭିଯୋଗ ହୋଇଛି। ଏଥିନେଇ ତଦନ୍ତ କରିବା ଓ ଆରଆଇଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଜିଲ୍ଲାପାଳଙ୍କୁ ଦରଖାସ୍ତ ଦେଇଛନ୍ତି ଜିଲ୍ଲା ଆଦିବାସୀ ସଂଘର କର୍ମକର୍ତ୍ତା ମାନେ।
ଜିଲ୍ଲା ଆଦିବାସୀ ସଂଘ ସଭାପତି ବାଲରାଜୁ ଗେମେଲ, ସମ୍ପାଦକ କମଲ ସାଇ ମାଝୀଙ୍କ ନେତୃତ୍ୱରେ କିଛି ଗ୍ରାମବାସୀ ମାଲକାନଗିରି ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସି ଜିଲ୍ଲାପାଳ ଓ ଅତିରିକ୍ତ ଜିଲ୍ଲାପାଳଙ୍କ ନିକଟରେ ରାଜସ୍ୱ ନିରୀକ୍ଷକ ଶ୍ରୀ ସ୍ୱାଇଁଙ୍କ ଲାଞ୍ଚ ନେବା କାରବାର ସମ୍ପର୍କରେ ଅଭିଯୋଗ କରିଛନ୍ତି, ଅଭିଯୋଗ ପତ୍ରରେ ଉଲ୍ଲେଖ୍ୟ ରହିଛି ଯେ, ମାଲକାନଗିରି ଜିଲ୍ଲା ମାଥିଲି ତହସିଲ ଅନ୍ତର୍ଗତ ମହୁପଦର, ଗୁରୁଗୁଡା, ପ୍ରେମାଗୁଡା, କସରା ଭଟା ବିଭିନ୍ନ ଗ୍ରାମର ଶତାଧିକ ଆଦିବାସୀ ଲୋକଙ୍କୁ ଜଙ୍ଗଲ ଜମି ପଟ୍ଟା, ଦଖଲ ଜମି ପଟ୍ଟା, ଘରବାଡି ପଟ୍ଟା, ପାଟିସନ କେସ୍ ଫୈସଲା ପାଇଁ ଜଣଙ୍କ ପିଛା ୫ହଜାର ୭ହଜାର ପର୍ଯ୍ୟନ୍ତ, ଏପରି ୬ଲକ୍ଷରୁ ଉର୍ଦ୍ଧ୍ୱ ଟଙ୍କା ଲାଞ୍ଚ ନେଇ ଥିଲେ, ଏହା ବ୍ୟତୀତ ଗାଁକୁ ଗଲେ ପେଟ୍ରୋଲ ଖର୍ଚ୍ଚ, କୁକୁଡ଼ା ମାଂସ ଭୋଜି ମଧ୍ୟ ଖାଉ ଥିବାର ଗ୍ରାମବାସୀ ମାନେ ଅଭିଯୋଗ କରିଛନ୍ତି।
ଏହି ଘଟଣାର ଠିକ୍ ଭାବେ ତଦନ୍ତ କରି ଗରିବ ଲୋକଙ୍କ ଟଙ୍କା ଫେରାଇ ଦେବା ସହିତ ଆରଆଇଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଜିଲ୍ଲାପାଳଙ୍କୁ ଆଦିବାସୀ ସଂଘ ଦରଖାସ୍ତ ଦେଇଛନ୍ତି। ଏ ସମ୍ପର୍କରେ ତଦନ୍ତ କରାଯାଇ ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଜିଲ୍ଲାପାଳ ଆଦିବାସୀ ସଂଘର କର୍ମକର୍ତ୍ତାଙ୍କୁ ପ୍ରସ୍ତୁତି ଦେଇ ଥିବାର ଜଣା ପଡିଛି।
