ଚନ୍ଦନେଶ୍ଵର, ୨୩|୫(ଆ.ପ୍ର): ପିଲା ଜନ୍ମ ଦେବା ପରେ ଜଣେ ପ୍ରସୂତୀଙ୍କ ମୃତ୍ୟୁ ହୋଇଛି। ଡାକ୍ତରଙ୍କ ଭୁଲ ଅସ୍ତ୍ରୋପଚାର ପାଇଁ ଏଭଳି ଘଟିଥିବା ସାଧାରଣରେ ଚର୍ଚ୍ଚା ହେଉଛି। ଏନେଇ ଡାକ୍ତରଙ୍କ ଉପରେ ବିଭାଗୀୟ ତଦନ୍ତ ସହ ବିହିତ ପଦକ୍ଷେପ ନେବା ପାଇଁ ଦାବୀ ହେଉଛି।
ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ବାଲେଶ୍ବର ଜିଲ୍ଲା ଭୋଗରାଇ ବ୍ଲକରେ। ମୃତକ ଜଣକ ନିମାତପୁର ପଞ୍ଚାୟତ ଅଧୀନ ସେହି ଗାଁର ଉତମ ଦଳାଇଙ୍କ ସ୍ତ୍ରୀ ବାସନ୍ତି ଦଳାଇ (୩୦)ବୋଲି ଜଣାପଡିଛି। ମିଳିଥିବା ସୃଚନା ଅନୁଯାୟୀ, ବାସନ୍ତୀ ଦଳାଇଙ୍କର ଏକ ୮ବର୍ଷର ପୁଅ ରହିଛି। ଦ୍ବିତୀୟ ସନ୍ତାନ ପାଇଁ ଗର୍ଭବତୀ ହେବା ପରେ ସେ ଡାକ୍ତର ଶକ୍ତିଧର ପରିଡାଙ୍କ ନିକଟରେ ମାସିକିଆ ଚିକିତ୍ସା କରୁଥିଲେ। ସବୁକିଛି ଠିକ ଥିଲା। ପିଲା ଜନ୍ମ ହେବାର ସମୟ ହେବାରୁ ଜଳେଶ୍ଵରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ନ ଯିବାକୁ ଡାକ୍ତର ପରିଡା ପରାମର୍ଶ ଦେଇଥିଲେ। ଏଥିପାଇଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଠାରୁ ପ୍ରାୟ ଅଧ କି.ମି ଦୂର ଦେହୁର୍ଦ୍ଦା ସ୍ଥିତ ଭବାନୀ ନର୍ସିଂ ହୋମକୁ ନେଇ ଥିଲେ। ସେଠାରେ ଡାକ୍ତର ଶକ୍ତିଧର ପରିଡା ଅସ୍ତ୍ରୋପଚାର କରି ଏକ କନ୍ୟା ସନ୍ତାନର ପ୍ରସବ କରାଇ ଥିଲେ। ମାତ୍ର ପ୍ରସୂତୀଙ୍କ ରକ୍ତସ୍ରାବ ଆଉ ବନ୍ଦ ହୋଇ ନଥିଲା। ନିରୁପାୟ ହୋଇ ଡାକ୍ତର ପରିଡା ପ୍ରସୂତୀଙ୍କୁ କଟକର ଏକ ଘରୋଇ ନର୍ସିଂହୋମକୁ ପଠାଇ ଦେଇଥିଲେ।
ବାସନ୍ତୀ ସେଠାରେ ଆଇସିୟୁରେ ଚିକିତ୍ସାଧିନ ଥିବା ବେଳେ ମୃତ୍ୟୁବରଣ କରିଥିଲେ। ଏନେଇ ନର୍ସିଂହୋମର ମୁଖ୍ୟ ଡାକ୍ତର ପ୍ରମୋଦ ବେହେରା କହନ୍ତି ୧୯୮୦ ମସିହାରୁ ନର୍ସିଂହୋମରେ ଚିକିତ୍ସା କରି ଆସୁଛନ୍ତି। ବହୁ ରୋଗୀ ସୁସ୍ଥ ହେଉଛନ୍ତି। ଜଣେ ଅଧେ ଗୋଗୀର ମୃତ୍ୟୁ ହେଲେ କଣ କରାଯିବ। ତେବେ ଏଥିରେ ଡାକ୍ତରଙ୍କର ଭୁଲ ଥିବ, ଆମ୍ଭେ କଣ କରିବୁ। ସେହିଭଳି ବିଧାୟକ ଜଳେଶ୍ଵରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଚିକିତ୍ସାଧିକାରୀ ଡାକ୍ତର କମଳାକାନ୍ତ ଜେନା କହନ୍ତି ଏଠାକୁ ଆସିଥିଲେ ଆମେ ଚିକିତ୍ସା କରିଥାନ୍ତୁ। ଅସୁବିଧା ଥିଲେ ଅନ୍ୟତ୍ର ସ୍ଥାନାନ୍ତର କରିଥାନ୍ତୁ। ତେବେ ଏନେଇ ତଦନ୍ତ ହୋଇ ରିପୋର୍ଟ ଦିଆଯିବ। ତେବେ ନର୍ସିଂହୋମ ମାଲିକ ଓ ପ୍ରସୂତୀଙ୍କ ଜୀବନ ନେଇ ଥିବା ଡାକ୍ତରଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ସାଧାରଣରେ ଦାବୀ ହେଉଛି।
