ଭୁବନେଶ୍ୱର,୨୮/୧୧: ଶୁକ୍ରବାର ଅପରାହ୍ନ ୪ଟା ୧୫ରେ ଭୁବନେଶ୍ୱର ବିମାନବନ୍ଦରରେ ପହଞ୍ଚିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେଠାରେ ତାଙ୍କୁ ଦଳ ପକ୍ଷରୁ ଭବ୍ୟ ସ୍ୱାଗତ କରାଯିବ । ବିମାନବନ୍ଦର କ୍ୟାମ୍ପସ୍ ପାଖରେ ଏକ ସଭା କରିବେ ମୋଦି । ସେଠାରୁ ରାଜଭବନ ଯିବେ । ସନ୍ଧ୍ୟା ସାଢ଼େ ୬ଟାରେ ବିଜେପି ରାଜ୍ୟ କାର୍ଯ୍ୟାଳୟକୁ ଆସିବେ । ଦଳୀୟ ଅଫିସରେ ସାଂସଦ ଓ ବିଧାୟକଙ୍କଠାରୁ ରିପୋର୍ଟ କାର୍ଡ ନେବେ ମୋଦି । ଗତ ୫ ମାସରେ ସେମାନଙ୍କ ପ୍ରଦର୍ଶନ କିଭଳି ରହିଛି, ତାହା ସେ ପଚାରି ବୁଝିବେ ।
ପ୍ରଧାନମନ୍ତ୍ରୀଙ୍କ ଗସ୍ତ ପାଇଁ ରାଜ୍ୟ କାର୍ଯ୍ୟାଳୟରେ ଚାଲିଥିବା ପ୍ରସ୍ତୁତିର ତଦାରଖ କରିଛନ୍ତି ମୁଖ୍ୟମନ୍ତ୍ରୀ ମୋହନ ମାଝି ଓ ବିଜେପି ରାଜ୍ୟ ସଭାପତି ମନମୋହନ ସାମଲ । ଭିତ୍ତିଭୂମି ସୁବିଧା ଓ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି । ତାଙ୍କ ସହିତ ବରିଷ୍ଠ ପୁଲିସ ଓ ପ୍ରଶାସନିକ ଅଧିକାରୀଙ୍କ ସହିତ ଏସ୍ପିଜିର ଅଧିକାରୀମାନେ ସାମିଲ ହୋଇ ସୁରକ୍ଷା ବ୍ୟବସ୍ଥାର ତଦାରଖ କରିଥିଲେ ।
ମୋଦି ବିଜେପି କାର୍ଯ୍ୟାଳୟରେ ପହଞ୍ଚିବା ପରେ ତାଙ୍କୁ ପାରମ୍ପରିକ ନାଚ ଓ ଗୀତରେ ସ୍ୱାଗତ କରାଯିବ । କେନ୍ଦ୍ରମନ୍ତ୍ରୀ ଓ ମୁଖ୍ୟମନ୍ତ୍ରୀଙ୍କ ସହ ବରିଷ୍ଠ ନେତାମାନେ ତାଙ୍କୁ ସ୍ୱାଗତ କରିବେ । ଏହାପରେ ସେ ସାଂସଦ, ବିଧାୟକଙ୍କ ସହ ଆଲୋଚନା କରିବେ । ରାଜ୍ୟରେ ନୂଆ ସରକାର ଗଢ଼ା ହେବା ପରେ ବିଧାୟକ ନିଜ ନିର୍ବାଚନମଣ୍ଡଳୀ ପାଇଁ କେଉଁ କେଉଁ କାମକୁ ପ୍ରାଥମିକତା ଦେଇଛନ୍ତି? ବିଧାୟକ ଭାବେ ସେମାନଙ୍କ ପ୍ରଦର୍ଶନ କିଭଳି ରହିଛି? ସମସ୍ତେ ମୋଦିଙ୍କୁ ନିଜ ରିପୋର୍ଟ କାର୍ଡ ଦେବେ । ଅନୁରୂପ ଭାବେ ସାଂସଦମାନେ ବି ସେମାନଙ୍କ ରିପୋର୍ଟ କାର୍ଡ ଧରାଇବେ । ଏହାପରେ ସରକାର କିଭଳି ଆହୁରି ଅଧିକ ଲୋକପ୍ରିୟ ହେବ ଓ ଦଳୀୟ ସଂଗଠନ କେମିତି ସୁଦୃଢ଼ ହେବ, ତା ଉପରେ ସାଂସଦ ଓ ବିଧାୟକଙ୍କୁ ମନ୍ତ୍ର ଦେବେ ପ୍ରଧାନମନ୍ତ୍ରୀ । ଏହାପରେ ଦଳୀୟ ପଦାଧିକାରୀଙ୍କ ସହ ମଧ୍ୟ ବୈଠକ କରିବେ । ବୈଠକ ପରେ ଉପସ୍ଥିତ ନେତାଙ୍କ ସହ ମିଶି ରାତ୍ରିଭୋଜନ କରିବେ ମୋଦି ।
ରାଜ୍ୟ ସଭାପତି ଶ୍ରୀ ସାମଲ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଓଡ଼ିଶା ଦିନକୁ ଦିନ ବିକଶିତ ହେଉଛି । ବିଜେପି ପ୍ରଥମଥର ପାଇଁ ଏକାକୀ ରାଜ୍ୟରେ ସରକାର ଗଢ଼ିଛି । ପ୍ରଧାନମନ୍ତ୍ରୀ ଦ୍ୱିତୀୟ ଥର ପାଇଁ ୩ ଦିନିଆ ଓଡ଼ିଶା ଗସ୍ତରେ ଆସୁଛନ୍ତି । ୨୯ ତାରିଖ ଦଳୀୟ କାର୍ଯ୍ୟକ୍ରମ ପରେ ୩୦ ତାରିଖରେ ସେ ପୁଲିସ ଡିଜି ସମ୍ମିଳନୀରେ ଯୋଗ ଦେବେ । ୧ ତାରିଖରେ ସେ ଦିଲ୍ଲୀ ଫେରିଯିବେ ।
