ନୂଆଦିଲ୍ଲୀ, ୦୯/୦୫ : ଦୁବାଇରେ ଖେଳାଯିବ ପାକିସ୍ତାନ ସୁପର ଲିଗ୍ (PSL) ୨୦୨୫ର ବାକି ମ୍ୟାଚ୍। ରାୱଲପିଣ୍ଡି ଷ୍ଟାଡିୟମରେ ଡ୍ରୋନ୍ ଆଟାକ୍ ପରେ ପାକିସ୍ତାନ କ୍ରିକେଟ୍ ବୋର୍ଡର ନିଷ୍ପତ୍ତି। PSL ଦଶମ ସିଜିନ୍ର ୮ଟି ମ୍ୟାଚ୍ ଏବେ ବାକି ଅଛି। ଏଥିରୁ ୪ଟି ପ୍ଲେ-ଅଫ୍ ମ୍ୟାଚ୍ ଏବଂ ୪ଟି ଲିଗ୍ ମ୍ୟାଚ୍ ରହିଛି। ଭାରତ-ପାକିସ୍ତାନ ମଧ୍ୟରେ ଉତ୍ତେଜନା ଯୋଗୁଁ ପାକିସ୍ତାନ କ୍ରିକେଟ୍ ବୋର୍ଡ ବାକି ଟୁର୍ଣ୍ଣାମେଣ୍ଟ ୟୁଏଇ ସିପ୍ଟ କରିବାକୁ ନିଷ୍ପତ୍ତି ନେଇଛି। ପାକିସ୍ତାନ କ୍ରିକେଟ୍ ବୋର୍ଡ ଗୁରୁବାର ଇସଲାମାବାଦରେ ଏକ ଜରୁରୀକାଳିନ ବୈଠକ କରିଥିଲା। ପିସିବି ଅଧ୍ୟକ୍ଷ ମୋହସିନ ନକୱି ବିଦେଶୀ ଖେଳାଳିଙ୍କ ସହ ବୈଠକରେ ଆଲୋଚନା କରିଥିଲେ। କାରଣ ବିଦେଶୀ ଖେଳାଳିମାନେ ପାକିସ୍ତାନ ଛାଡ଼ିବାକୁ ଚାହୁଁଛନ୍ତି।
ସୂଚନାନୁଯାୟୀ, ପିଏସଏଲ-୨୦୨୫ର ବାକି ମ୍ୟାଚ୍ ରାୱଲପିଣ୍ଡି, ମୁଲତାନ ଏବଂ ଲାହୋରରେ ଖେଳାଯିବାର ଥିଲା। ହେଲେ ଭାରତ-ପାକିସ୍ତାନ ଟେନସନ୍ ଯୋଗୁଁ ମେ ୮ରେ ରାୱଲପିଣ୍ଡିରେ ହେବାକୁ ଥିବା ମ୍ୟାଚ୍କୁ ପୋଷ୍ଟପଣ୍ଡ୍ କରାଯାଇଥିଲା। ପିସିବି ଚେୟାରମ୍ୟାନ୍ ମୋହସିନ ନକୱି ଏନେଇ କହିଛନ୍ତି ଯେ, ସମସ୍ତ ଖେଳାଳିଙ୍କ ମାନସିକ ସ୍ଥିତି ଠିକ୍ ରଖିବା ପାଇଁ ଏହି ନିଷ୍ପତ୍ତି ନିଆଯାଇଛି। ଆମର ଖେଳାଳି, ପ୍ରଶଂସକଙ୍କ ସୁରକ୍ଷାକୁ ଦୃଷ୍ଟିରେ ରଖି ଏଭଳି କରାଯାଇଛି।
ଅପର ପକ୍ଷରେ ଗୁରୁବାର ବ୍ଲାକଆଉଟ୍ ଯୋଗୁଁ ଆଇପିଏଲ୍-୨୦୨୫ ମ୍ୟାଚ୍ ବାତିଲ କରାଯାଇଛି। ବର୍ତ୍ତମାନର ସ୍ଥିତିକୁ ଦୃଷ୍ଟିରେ ରଖି ପଞ୍ଜାବ କିଙ୍ଗ୍ସ ଏବଂ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ମ୍ୟାଚ୍ ମଧ୍ୟ ବାତିଲ କରାଯାଇଛି। ସମସ୍ତ ବିଦେଶୀ ଖେଳାଳିଙ୍କୁ ଫେରାଇ ଦିଆଯାଇପାରେ। ବିସିସିଆଇ ଏହାକୁ ନେଇ ଏକ ଜରୁରୀକାଳୀନ ବୈଠକ ଡାକିଛି।
ଏହି ଖବରଟିକୁ ପଢନ୍ତୁ-ଭାରତ-ପାକ୍ ଉତ୍ତେଜନା ମଧ୍ୟରେ ବାତିଲ ହେବ IPL ? ବିସିସିଆଇ ଡାକିଲା ଜରୁରୀକାଳୀନ ବୈଠକ
