ନୂଆଦିଲ୍ଲୀ: ୱାକଫ୍ ବିଲ୍ କୁ ନେଇ ସାରା ଦେଶରେ ଚର୍ଚ୍ଚା ଥମି ନଥିବା ବେଳେ କଂଗ୍ରେସ ସାଂସଦ ରାହୁଲ ଗାନ୍ଧୀ ଆଉ ଏକ ବିଷୟ ଉଠାଇ ସମଗ୍ର ଦେଶର ଧ୍ୟାନ ଆକର୍ଷଣ କରିଛନ୍ତି। ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟ ଜାରି କରି ରାହୁଲ ଗାନ୍ଧୀ କହିଛନ୍ତି ଯେ ଆରଏସଏସର ପରବର୍ତ୍ତୀ ଟାର୍ଗେଟ ହେଉଛନ୍ତି ଖ୍ରୀଷ୍ଟିୟାନ ସମ୍ପ୍ରଦାୟ। କାରଣ ନିକଟରେ ପ୍ରକାଶିତ ଏକ ରିପୋର୍ଟରେ କୁହାଯାଇଛି କି କ୍ୟାଥଲିକ୍ ଚର୍ଚ୍ଚ ଗୁଡିକ ନିକଟରେ ଦେଶର ସର୍ବାଧିକ ଜମି ରହିଛି।
ଜାତୀୟ ଗଣମାଧ୍ୟମ ଇଣ୍ଡିଆ ଟୁଡେ ଖବର ପ୍ରକାଶ କରିଛି ଯେ, ଅର୍ଗାନାଇଜର ନାମକ ଏକ ୱେବସାଇଟ୍ ରେ ନିକଟରେ ଏକ ରିପୋର୍ଟ ପ୍ରକାଶ ପାଇଥିଲା। ଯେଉଁଥିରେ ଭାରତରେ ଥିବା କ୍ୟାଥଲିକ୍ ସଂସ୍ଥାନଗୁଡିକ ନିକଟରେ ୭ କୋଟି ହେକ୍ଟରର ଜମି ଥିବା ଦର୍ଶାଯାଇଥିଲା। ଯାହା ଏହି ସଂସ୍ଥାନକୁ ଭାରତର ସର୍ବବୃହତ ଅଣ-ସରକାରୀ ଜମି ମାଲିକ ଭାବେ ଦର୍ଶାଇଥିଲା। ତେବେ ପରେ ଏହି ୱେବସାଇଟ୍ ରୁ ଏହି ରିପୋର୍ଟଟିକୁ ହଟାଇ ଦିଆଯାଇଥିଲା।
ଅର୍ଗାନାଇଜରରେ ପ୍ରକାଶିତ ରିପୋର୍ଟକୁ ନେଇ ପ୍ରକାଶିତ ହୋଇଥିବା ଏକ ଖବରର ଲିଙ୍କଙ୍କୁ ସେୟାର କରି ରାହୁଲ ଗାନ୍ଧୀ ସାମାଜିକ ଗଣମାଧ୍ୟମ ଏକ୍ସରେ ସେୟାର କରି ଲେଖିଛନ୍ତି ଯେ “ମୁଁ କହିଥିଲି ଯେ ୱାକଫ ବିଲ୍ ବର୍ତ୍ତମାନ ମୁସଲମାନମାନଙ୍କ ଉପରେ ଆକ୍ରମଣ କରୁଛି କିନ୍ତୁ ଭବିଷ୍ୟତରେ ଏହା ଅନ୍ୟ ସମ୍ପ୍ରଦାୟକୁ ଟାର୍ଗେଟ କରିବା ପାଇଁ ଏକ ଉଦାହରଣ ସୃଷ୍ଟି କରିବ। ଖ୍ରୀଷ୍ଟିଆନଙ୍କ ପ୍ରତି ଆରଏସଏସ ଧ୍ୟାନ ଦେବା ପାଇଁ ଅଧିକ ସମୟ ଲାଗିଲା ନାହିଁ | ସମ୍ବିଧାନ ହେଉଛି ଏକମାତ୍ର ଢାଲ ଯାହା ଆମ ଲୋକଙ୍କୁ ଏହିପରି ଆକ୍ରମଣରୁ ରକ୍ଷା କରିଥାଏ। ତେବେ ଏହାକୁ ରକ୍ଷା କରିବା ଆମର ସାମୂହିକ କର୍ତ୍ତବ୍ୟ।”
କଂଗ୍ରେସର ବରିଷ୍ଠ ନେତା ରମେଶ ଛେନ୍ନିଥାଲା ଗଣମାଧ୍ୟମକୁ ସାକ୍ଷାତକାର ଦେଇ ଏହି ଆର୍ଟିକିଲକୁ ଅତ୍ୟନ୍ତ ଦୁଃଖଦାୟକ ବୋଲି କହିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, “ଅର୍ଗାନାଇଜର ଦ୍ୱାରା ଜାରି କରାଯାଇଥିବା ଆର୍ଟିକିଲରେ କ୍ୟାଥଲିକ୍ ଗୋଷ୍ଠୀ ପାଖରେ ଭାରତରେ ୭ କୋଟି ଏକରରୁ ଅଧିକ ସମ୍ପତ୍ତି ରହିଥିବା ସୂଚନା ରହିଛି। ୱାକଫ୍ ବିଲ୍ ପାରିତ ହେବା ସମୟରେ ରାହୁଲ ଗାନ୍ଧୀ ବିଜେପିର ପରବର୍ତ୍ତୀ ଟାର୍ଗେଟ ଖ୍ରୀଷ୍ଟିଆନ ବୋଲି କହିଥିଲେ। ଏବେ କ୍ୟାଥଲିକ୍ ଗୋଷ୍ଠୀଦ୍ୱାରା ମାଲିକାନାରେ ଥିବା ସମସ୍ତ ସମ୍ପତ୍ତିକୁ ବିଜେପି ଏବେ କଣ୍ଟ୍ରୋଲ କରିବାକୁ ଚାହିଁବ।“
ସୂଚନା ମୁତାବକ, ଅର୍ଗାନାଇଜର ୱେବସାଇଟରେ ପ୍ରକଶ ପାଇଥିବା ଆର୍ଟିକିଲର ଟାଇଟଲ “ହୁ ହାଜ୍ ମୋର ଲ୍ୟାଣ୍ଡ ଇନ ଇଣ୍ଡିଆ? ଦ କ୍ୟାଥୋଲିକ ଚର୍ଚ୍ଚ ଭର୍ସେସ ୱାକଫ୍ ବୋର୍ଡ” ରହିଥିଲା। ବ୍ରିଟିଶ ଶାସନ ସମୟରେ ଭାରତରେ ପାରିତ ହୋଇଥିବା ‘ଭାରତୀୟ ଚର୍ଚ୍ଚ ଅଧିନିୟମ ୧୯୨୭’ ଆଧାରରେ କ୍ୟାଥଲିକ୍ ସଂସ୍ଥାନ ଗୁଡିକ ବହୁ ଜମି ହାତେଇଥିଲେ ବୋଲି ଏହି ଆର୍ଟିକିଲରେ ଉଲ୍ଲେଖ ରହିଥିଲା। ତେବେ ୧୯୬୫ ମସିହାରେ ପାରିତ ହୋଇଥିବା ଏକ ସରକାରୀ ଆଦେଶରେ ଦର୍ଶାଇଥିଲା ଯେ ଔପନିବେଶିକ ସମୟରେ ଲିଜ୍ ପାଇଥିବା ଜମି ଆଉ ଚର୍ଚ୍ଚର ସମ୍ପତ୍ତି ଭାବରେ ମାନ୍ୟତା ପାଇବ ନାହିଁ।
