ମୁମ୍ବାଇ,୨୬ \୭ : ବଲିଉଡର ପ୍ରଥମ ସୁପରଷ୍ଟାର ରାଜେଶ ଖାନ୍ନା ଏବଂ ଡିମ୍ପଲ କାପାଡିଆଙ୍କ ପ୍ରେମ କାହାଣୀ ଯେତିକି ଚର୍ଚ୍ଚିତ ଥିଲା, ସେମାନଙ୍କ ବ୍ୟକ୍ତିଗତ ଜୀବନ ମଧ୍ୟ ସେତିକି ଲାଇମଲାଇଟ୍ ରେ ଥିଲା । ୧୯୭୩ ମସିହାରେ ଦୁହେଁ ବିବାହ କରିଥିଲେ। ସେତେବେଳେ ରାଜେଶ ଖାନ୍ନାଙ୍କୁ ୩୧ ବର୍ଷ ହୋଇଥିବାବେଳେ ଡିମ୍ପଲ କାପାଡିଆଙ୍କୁ ମାତ୍ର ୧୬ ବର୍ଷ ହୋଇଥିଲା । ବିବାହ ପରେ ଡିମ୍ପଲ୍ 'ବବି' ପରି ସୁପରହିଟ୍ ଡେବ୍ୟୁ ଫିଲ୍ମ କରିଥିଲେ । ଏହା ପରେ ସେ ଅଭିନୟ ଛାଡିଥିଲେ । ଉଭୟଙ୍କର ଦୁଇ ଝିଅ ଟ୍ୱିଙ୍କଲ୍ ଏବଂ ରିଙ୍କି ଖାନ୍ନା ଅଛନ୍ତି । ତେବେ, ୧୯୮୨ମସିହାରେ, ଡିମ୍ପଲ୍ କାପାଡିଆ ରାଜେଶ ଖାନ୍ନାଙ୍କ ଠାରୁ ଅଲଗା ରହିବା ଆରମ୍ଭ କରିଥିଲେ ।
ସୋମାନେ କେବେ ବି ସରକାରୀ ଛାଡପତ୍ର ପାଇ ପାରି ନଥିଲେ । କିନ୍ତୁ ରାଜେଶ ଖାନ୍ନାଙ୍କ ମୃତ୍ୟୁ ପର୍ଯ୍ୟନ୍ତ ସେମାନେ ଅଲଗା ଅଲଗା ରହୁଥିଲେ । ମୃତ୍ୟୁ ପୂର୍ବରୁ ରାଜେଶ ଖାନ୍ନା ତାଙ୍କ ଲାଇଭ-ଇନ୍ ପାର୍ଟନର ଅନୀତା ଆଡଭାନୀଙ୍କ ସହ ରହୁଥିଲେ, ଯିଏକି ତାଙ୍କ ସମ୍ପର୍କକୁ ମାନ୍ୟତା ଦେବା ପାଇଁ ବମ୍ବେ ହାଇକୋର୍ଟରେ ଆବେଦନ କରିଥିଲେ । ନିକଟରେ ଅନୀତା ଆଡଭାନୀ ଡିମ୍ପଲ କାପଡିଆ ଏବଂ ରାଜେଶ ଖାନ୍ନାଙ୍କ ସମ୍ପର୍କକୁ ନେଇ ଏକ ବଡ଼ ଖୁଲାସା କରିଛନ୍ତି ।
ଅନିତା ଆଡଭାନୀ ଏକ ସାକ୍ଷାତକାରରେ ତାଙ୍କ କଥା ଏବଂ ରାଜେଶ ଖାନ୍ନାଙ୍କ ସହ ସମ୍ପର୍କ ବିଷୟରେ ଖୋଲାଖୋଲି କହିଥିଲେ। ସେ କହିଲେ ଯେ ରାଜେଶ ଖାନ୍ନା ଅନେକ ଥର ଡିମ୍ପଲ୍ କପାଡିଆଙ୍କ ଠାରୁ ଛାଡପତ୍ର ମାଗିଥିଲେ, କିନ୍ତୁ ଅଭିନେତ୍ରୀ ଡିମ୍ପଲ୍ ଛାଡପତ୍ର ଦେବା ପାଇଁ ଏକ ସର୍ତ୍ତ ରଖିଥିଲେ। ତେଣୁ ତାଙ୍କୁ କେବେବି ଛାଡ଼ପତ୍ର ମିଳି ପାରିନଥିଲା ।
ଅନିତା ଆଡଭାନୀ କହିଛନ୍ତି, "ମୋ ମାମଲା ହିନ୍ଦୁ ବିବାହ ଆଇନ ଅନୁଯାୟୀ ବିଚାର କରାଯାଇଥିଲା, ଯଦିଓ ଏହାର ମୋ ମାମଲା ସହିତ କୌଣସି ସମ୍ପର୍କ ନଥିଲା। ସେଠାରୁ, ଏହାକୁ ସିଭିଲ୍ କୋର୍ଟକୁ ସ୍ଥାନାନ୍ତର କରାଯାଇଥିଲା କାରଣ ସିଭିଲ୍ ଆଇନ ଭିନ୍ନ। ମୁଁ 'ବିବାହ ପ୍ରକୃତିର ସମ୍ପର୍କ'କୁ ସ୍ୱୀକୃତି ମାଗିଥିଲି, କିନ୍ତୁ ମୋତେ କୁହାଗଲା ଯେ ମୁଁ ଜଣେ ପତ୍ନୀ ନୁହେଁ। ଏହି ଆଇନ କେବଳ ଲିଭ୍-ଇନ୍ ପାର୍ଟନରଙ୍କୁ ନୁହେଁ, ବରଂ ଭଉଣୀ ଏବଂ ମାଆ ଭଳି ସମ୍ପର୍କକୁ ମଧ୍ୟ ଅନ୍ତର୍ଭୁକ୍ତ କରେ। "
ଅନିତା ଆଡଭାନୀଙ୍କ ବଡ଼ ଦାବି
ସେ ଆହୁରି କହିଲେ, "କିଛି ଲୋକ କୁହନ୍ତି ଯେ ଯଦି କାହାର ସ୍ତ୍ରୀ ଅଛି, ତେବେ ସେମାନେ ଅନ୍ୟ କାହା ସହିତ ସମ୍ପର୍କ ରଖିପାରିବେ ନାହିଁ। କିନ୍ତୁ ଯଦି ପତ୍ନୀ ବର୍ଷ ବର୍ଷ ପୂର୍ବରୁ ଘର ଛାଡି ଚାଲିଯାଆନ୍ତି ଏବଂ ସେମାନଙ୍କ ମଧ୍ୟରେ କୌଣସି ସମ୍ପର୍କ ନାହିଁ, ତେବେ ଅନ୍ୟ ଜଣଙ୍କର ଦୋଷ କ'ଣ? ସେହି ବ୍ୟକ୍ତି କାହାର ହୋଇ ପାରେନି । ସେମାନେ ଏକାଠି ରହୁନଥିଲେ, କି ସେମାନଙ୍କର ଛାଡପତ୍ର ହେଉ ନଥିଲା। ସେ ଅନେକ ଥର ଛାଡପତ୍ର ପାଇଁ ଅନୁରୋଧ କରିଥିଲେ, କିନ୍ତୁ ତାହା ଗ୍ରହଣ କରାଯାଇ ନଥିଲା। ତାଙ୍କର ଏକମାତ୍ର ଦାବି ଥିଲା ଯେ ଯଦି ସେ ଛାଡପତ୍ର ଦେବାକୁ ଚାହାଁନ୍ତି, ତେବେ ରାଜେଶ ସବୁକିଛି ସମ୍ପତ୍ତି ତାଙ୍କ ନାମରେ ହସ୍ତାନ୍ତର କରନ୍ତୁ।"
ଅନିତା ଆହୁରି ବି କହିଛନ୍ତି, ଯେ "ରାଜେଶ ନିଜେ ସାକ୍ଷାତକାରରେ କହିଥିଲେ ଯେ ସେ ଛାଡପତ୍ର ଚାହାଁନ୍ତି । କିନ୍ତୁ ମିଳି ନଥିଲା । ସେ ୧୦ ଥର ଛାଡପତ୍ର ମାଗିଥିଲେ, କିନ୍ତୁ ତାହା ମଞ୍ଜୁର ହୋଇନଥିଲା । ଡିମ୍ପଲଙ୍କ ଏକମାତ୍ର ସର୍ତ୍ତ ଥିଲା ଯେ ଯଦି ଆପଣ ଛାଡପତ୍ର ଚାହାଁନ୍ତି, ତେବେ ଆପଣଙ୍କୁ ସବୁକିଛି ମତେ ହସ୍ତାନ୍ତର କରିବାକୁ ପଡିବ । ଯେହେତୁ ଆଇନ ଅନୁସାରେ ରାଜେଶଙ୍କ ସ୍ତ୍ରୀ ଥିଲେ, ତେଣୁ ମୋ ସହିତ ସମ୍ପର୍କ ବୈଧ ନୁହେଁ । ଶେଷରେ, ରାଜେଶ ସମ୍ପୂର୍ଣ୍ଣ ଏକା ହୋଇଗଲେ। ସେ ଜଣେ ସହଜ ପୁରୁଷ ନଥିଲେ, କିନ୍ତୁ ଯଦି କେହି ତାଙ୍କୁ ସାଥ୍ ଦିଏ ତେବେ ଏପରି ସମ୍ପର୍କକୁ ସୁରକ୍ଷା ଦେବା ପାଇଁ କାହିଁକି ଆଇନ ଅଛି? ଏହା ହିଁ ସବୁଠାରୁ ବଡ଼ କଥା "।
ଏଠାରେ କହି ରଖିଛୁ ଯେ, ରାଜେଶ ଖାନ୍ନାଙ୍କ ମୃତ୍ୟୁ ୨୦୧୨ ମସିହାରେ ହୋଇଥିଲା । ଅନିତା ଆଡଭାନୀଙ୍କ ଆବେଦନକୁ ବମ୍ବେ ହାଇକୋର୍ଟ ୨୦୨୬ ଏପ୍ରିଲରେ ଖାରଜ କରିଦେଇଥିଲେ ।
