ପୁରୀ, ୦୬/୦୫ : ତିନି ରଥର ମୋଟ ୪୨ଟି ତୁମ୍ବର ଗୋଲେଇ କାର୍ଯ୍ୟ ଶେଷ ହୋଇଛି । ସୋମବାର ରଥ ଖଳାରେ ମୁଖ୍ୟତଃ ତୁମ୍ବରେ ସୂତା ବାଡ଼ିଆ ଯାଇଛି । ସୂତା ସାହାଯ୍ୟରେ ମାପଚୁପ ହୋଇ ତୁମ୍ବରେ ଚିହ୍ନ ଦେବା ହେଉଛି ସୂତା ବାଡ଼ିଆ । ତାଳଧ୍ୱଜର ସୂତାର ମହାରଣା ରଘୁନାଥ ସୁବୁଦ୍ଧି କୁହନ୍ତି ସୂତା ସାହାଯ୍ୟରେ ମଟାମ ତଥା ମାପଚୁପ ହୁଏ । ପ୍ରଥମେ ତୁମ୍ବକୁ ଟେକି ରଖି ଓଲମ୍ ଦ୍ୱାରା ଦୁଇ ଭାଗ କରିବାକୁ ହୁଏ । ପୁନଃ ତୁମ୍ବକୁ ୧୬ ଭାଗ ମାପରେ ଦାଗ ଦିଆଯାଏ । କୁଆଁର ଓ ବତା ମାପ ସାହାଯ୍ୟରେ ତୁମ୍ବର ଠିକ୍ ମଧ୍ୟ ଭାଗରେ ବିନ୍ଧ ପାଇଁ ଚିହ୍ନ ଦିଆଯିବ ।
ମଙ୍ଗଳବାର ତୁମ୍ବରେ ବିନ୍ଧ ଅନୁକୂଳ ହେବ । ତିନି ରଥର ମୁଖ୍ୟ ବିଶ୍ୱକର୍ମା ବିନ୍ଧ ଅନୁକୂଳ କରିବେ । ବିନ୍ଧରେ ଅର ଖଞ୍ଜାଯିବ । ସେଥିରେ ପହି ଯୋଡ଼ାଯାଇ ଚକ ତିଆର ହେବ । ଗୋଟିଏ ତୁମ୍ବରେ ୪ଟି ପହି ଲାଗିବ । ସେପଟେ ଦୋଳବେଦିସ୍ଥିତ ୩ଟି ଅସ୍ଥାୟୀ ଶାଳରେ ଓଝା ସେବକମାନେ ଅର କଣ୍ଟା ତିଆରି କରୁଛନ୍ତି । ପ୍ରତି ରଥ ଚକ ପାଇଁ ୩୨ଟି ଅରକଣ୍ଟା ଆବଶ୍ୟକ ହୋଇଥାଏ । ସୋମବାର ରଥ ନିର୍ମାଣରେ ୮୮ ଜଣ ନିୟୋଜିତ ହୋଇଥିବା ଶ୍ରୀମନ୍ଦିର ପ୍ରଶାସନ ଲୋକ ସମ୍ପର୍କ ଅଧିକାରୀ ଜିତେନ୍ଦ୍ର ମହାନ୍ତି ସୂଚନା ଦେଇଛନ୍ତି ।
ଏହି ଖବରଟିକୁ ପଢନ୍ତୁ-'ସବୁଠି ସବୁ ମନ୍ଦିର ହେଉଛି, ଦୀଘାରେ ହେଲେ କାହିଁକି ବାଧୁଛି ?' ତାତିଗଲେ ଦିଦି...
