ପୁରୀ,୨୨/୦୬: ମହାପ୍ରଭୁଙ୍କ ବିଶ୍ୱ ପ୍ରସିଦ୍ଧ ରଥ ଯାତ୍ରାକୁ ମଝିରେ ରହିଲା ମାତ୍ର ୪ ଦିନ । ୨୬ ତାରିଖ ଗୁରୁବାର ନେତ୍ରୋତ୍ସବର ଯଥେଷ୍ଟ ପୂର୍ବରୁ ସରିଥିବ ରଥ ନିର୍ମାଣ । ଶନିବାର ଅପରାହ୍ନରେ ରଥରେ ଦୁଆର ଘଡ଼ା ଉଠାଯାଇଛି । ତିନି ରଥରେ ଦୁଇଟି ଲେଖାଏଁ ଦୁଆରଘଡ଼ା ଉଠିଛି । ଏଥିସହ ରଥରେ କନକମୁଣ୍ଡି ନିର୍ମାଣ କାମ ଆଗଉଛି । ପଟ। ପକାଇ ମୁଜା ଚାଲିଛି ରଥ ପୃଷ୍ଠ । ଏପଟେ ରଥ ତ୍ରୟ ପ୍ରସ୍ତୁତ ହେଉଥିବା ସ୍ଥଳେ ରଥ ଚାଳି ଖୋଲିବା ଆରମ୍ଭ ହୋଇଛି । ଏବେ ଯାହା ସବୁ କାର୍ଯ୍ୟ ରଥରେ ।
ଶନିବାର ଅପରାହ୍ନରେ ଭୋଇ ସେବକମାନେ ମିଳିତ ଭାବେ ଦୁଆର ଘଡ଼ା ଉଠାଇଥିଲେ । ବାଉଁଶ ତେଣ୍ଟିଆ ଓ ଦଉଡ଼ି ସାହାଯ୍ୟରେ ଦୁଆର ଘଡ଼ା ଉଠାଗଲା । ବଡ଼ଦାଣ୍ଡରେ ଏଭଳି ଅଦ୍ଭୁତ ରଥ ନିର୍ମାଣ ଶୈଳୀ ଦେଖି ଆଚମ୍ବିତ ହେଉଥିଲେ ଦର୍ଶକ । ରୂପକାରମାନେ ପ୍ରଭାରେ ରାହୁରୂପ ଓ ମଗରମୁଣ୍ଡ ଚିତ୍ର କରି ଖୋଦେଇ ସାରୁଛନ୍ତି । ପ୍ରଭାରେ ଶ୍ରୀବିଗ୍ରହଙ୍କୁ ରୁନ୍ଧା ଯିବ । ତିନି ରଥର ବେଦି ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି ।
ଚିତ୍ରକର ସେବକମାନେ ରଥର ବିଭିନ୍ନ ଅଂଶକୁ ରଙ୍ଗ ଦେଇ ସୌନ୍ଦର୍ଯ୍ୟପୂର୍ଣ୍ଣ କରୁଛନ୍ତି । ରଥରେ ଲାଗିବାକୁ ଥିବା ସଖୀ, କନ୍ୟାପଟା, ପାଶ୍ୱର୍ ଦେବାଦେବୀଙ୍କୁ ରଙ୍ଗ ଦେଇ ଜୀବନ୍ତ କରୁଛନ୍ତି । ତିନି ରଥ ପାଇଁ ୧୨ ଅଶ୍ୱ ବଡ଼ଦାଣ୍ଡରେ ଦଣ୍ଡାୟମାନ । ଦୁଇଟି ଅଶ୍ୱ ମରାମତି ପରେ ଚିତ୍ରକର ରଙ୍ଗ କରିବେ । ଶ୍ରୀମନ୍ଦିର କାର୍ଯ୍ୟାଳୟ ଉପର ମହଲାରେ ଦର୍ଜୀ ସେବକ କନାମଣ୍ଡଣୀ କାର୍ଯ୍ୟ ଜାରି ରଖିଛନ୍ତି । ଦୋଳବେଦିରେ କମାର ସେବକ ପ୍ରଭା କଣ୍ଟା, ସିଂହାସନ ଗଣ୍ଠି କଣ୍ଟା ଆଦି ଲୁହା ସାମଗ୍ରୀ ତିଆରୁଛନ୍ତି ।
