ନୂଆଦିଲ୍ଲୀ,୧୨/୧୦: ଆଠ ସପ୍ତାହ ମଧ୍ୟରେ ପ୍ରଥମ ଥର ପାଇଁ ଭାରତର ବୈଦେଶିକ ମୁଦ୍ରା ଭଣ୍ଡାର ହ୍ରାସ ପାଇ ଅକ୍ଟୋବର ୪ ରେ ଏହାର ରେକର୍ଡ ସର୍ବାଧିକ ୭୦୧.୧୮ ବିଲିୟନ ଡ଼ଲାରରୁ ଖସି ଆସିଛି। ଶୁକ୍ରବାର ଦିନ ପ୍ରକାଶିତ ଆରବିଆଇ ତଥ୍ୟ ଅନୁଯାୟୀ, ଏହି ସପ୍ତାହରେ ରିଜର୍ଭ ୩.୭୧ ବିଲିୟନ ଡ଼ଲାର ହ୍ରାସ ପାଇଥିବାବେଳେ ପୂର୍ବ ସାତ ସପ୍ତାହରେ ଏହା ପ୍ରାୟ ୩୫ ବିଲିୟନ ଡ଼ଲାରରେ ବୃଦ୍ଧି ପାଇଛି। ସପ୍ତାହ ଶେଷରେ ବୈଦେଶିକ ମୁଦ୍ରା ସଂରକ୍ଷଣ ରେକର୍ଡ ସର୍ବାଧିକ ୭୦୪.୮୯ ବିଲିୟନ ଡ଼ଲାରରେ ପହଞ୍ଚିଛି ଏବଂ ସେପ୍ଟେମ୍ବର ୨୭ ଶେଷ ହୋଇଥିବା ସପ୍ତାହରେ ୧୨.୬ ବିଲିୟନ ଡ଼ଲାରରେ ବୃଦ୍ଧି ପାଇଛି, ଯାହା ଜୁଲାଇ ୨୦୨୩ ମଧ୍ୟଭାଗରୁ ସର୍ବ ବୃହତ ସାପ୍ତାହିକ ବୃଦ୍ଧି ଥିଲା।
କହିରଖୁଛି ଯେ, ବୈଦେଶିକ ମୁଦ୍ରା ବଜାରରେ ଆରବିଆଇର ହସ୍ତକ୍ଷେପ ହେତୁ ବୈଦେଶିକ ମୁଦ୍ରା ଭଣ୍ଡାରର ପରିବର୍ତ୍ତନ ହେଉଛି ଏବଂ ଏହା ବିଦେଶୀ ସମ୍ପତ୍ତି ମୂଲ୍ୟରେ ପରିବର୍ତ୍ତନ ହେତୁ ମଧ୍ୟ ପ୍ରଭାବିତ ହୋଇଛି। ଆରବିଆଇ ଟଙ୍କାରେ ଅତ୍ୟଧିକ ଅସ୍ଥିରତାକୁ ଏଡାଇବା ପାଇଁ ବଜାରର ଉଭୟ ପାର୍ଶ୍ୱରେ ଆରବିଆଇ ହସ୍ତକ୍ଷେପ କରିଛି। ବୈଦେଶିକ ମୁଦ୍ରା ଭଣ୍ଡାରରେ ଆନ୍ତର୍ଜାତୀୟ ମୁଦ୍ରା ପାଣ୍ଠି ସହିତ ଭାରତର ରିଜର୍ଭ ଟ୍ରାନ୍ସ ସ୍ଥିତି ମଧ୍ୟ ରହିଛି।
ସେପ୍ଟେମ୍ବର ପର୍ଯ୍ୟନ୍ତ ଆରବିଆଇର ତଥ୍ୟ ଅନୁଯାୟୀ, ଭାରତର ସୁନା ଭଣ୍ଡାରରେ ଏକ ଶକ୍ତିଶାଳୀ ବୃଦ୍ଧି ଦେଖିବାକୁ ମିଳିଥିଲା। ସୁନା ଭଣ୍ଡାରରେ ୨.୧୮ ବିଲିୟନ ଡ଼ଲାର ବୃଦ୍ଧି ସହିତ ଏହାର ମୋଟ ମୂଲ୍ୟ ୬୫.୭୯ ବିଲିୟନ ଡ଼ଲାରରେ ପହଞ୍ଚିଛି। ସୂଚନାଥାଉକି, ବ୍ୟାଙ୍କରେ ଜମା ହୋଇଥିବା ସୁନାକୁ ଗୋଲ୍ଡ ରିଜର୍ଭ କୁହାଯାଏ, ଯାହା ଭାରତୀୟ ମୁଦ୍ରାକୁ ସମର୍ଥନ କରିବା ପାଇଁ ଜମା ହୋଇଥାଏ। ଏହା ମାଧ୍ୟମରେ ଯେକୌଣସି ଦେଶ ଏହାର ଅର୍ଥନୀତିକୁ ସ୍ଥିର ରଖେ।
