ଭୁବନେଶ୍ବର,୩।୧୧ : ରାଜଧାନୀ ଭୁବନେଶ୍ବରରେ ପତ୍ନୀଙ୍କୁ ବିଷ ଇଞ୍ଜେକ୍ସନ ଦେଇ ହତ୍ୟା କରିବା ଘଟଣା । ଫୋରେନସିକ ଲ୍ୟାବକୁ ଗଲା ମୃତ ଶୁଭଶ୍ରୀଙ୍କ ଅର୍ଗାନ। ଭିସେରା, କିଡନୀ, ହାର୍ଟ, ରକ୍ତ, ଲିଭର ନମୁନା ଫୋରେନସିକ ଲ୍ୟାବକୁ ପଠାଯାଇଛି। ରସୁଲଗଡ଼ ସ୍ଥିତ ଫୋରେନସିକ ଲ୍ୟାବରେ ହେବ ଟେଷ୍ଟ। କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ସୂଚନା ଦେଇଛନ୍ତି।
ଲ୍ୟାବରୁ ଖୁବଶୀଘ୍ର ଆସିବ ରିପୋର୍ଟ। ପ୍ରାଥମିକ ରିପୋର୍ଟ ଆସି ସାରିଛି। ଫାଇନାଲ ଭିସେରା ରିପୋର୍ଟ ଆସିଲେ ହେବ ଆନାଲିସସ୍ । ଓଭରଡୋଜ ଆନେସ୍ଥେସିଆ ସହ କିଛି କେମିକାଲ ମିଶିଥିବା ସନ୍ଦେହ କରାଯାଉଛି ବୋଲି କ୍ୟାପିଟାଲ ହସ୍ପିଟାଲ ନିର୍ଦ୍ଦେଶକ ସୂଚନା ଦେଇଛନ୍ତି।
ସୂଚନା ମୁତାବକ, ଶୁଭଶ୍ରୀଙ୍କ ବାପ ଘର ଖୋର୍ଦ୍ଧା ଟାଉନ ଥାନା ଅନ୍ତର୍ଗତ ବିଜେବି ନଗରରେ। ସେ ୨୦୨୦ ମସିହାରେ ପ୍ରଦ୍ୟୁମ୍ନଙ୍କ ସହ ପ୍ରଥମେ ମନ୍ଦିରରେ ପ୍ରେମ ବିବାହ କରିଥିଲେ। ପରେ ପୁଣି କୋର୍ଟ ମ୍ୟାରେଜ କରିଥିଲେ । ବିବାହ ପରେ ଉଭୟ ଏକାଠି ରହୁଥିଲେ । କିଛି ଦିନ ଭଲରେ ସମୟ କଟିଥିଲା । କିନ୍ତୁ ପରେ ପ୍ରଦ୍ୟୁମ୍ନ, ଶୁଭଶ୍ରୀଙ୍କୁ ନିର୍ଯାତନା ଦେବା ଆରମ୍ଭ କରିଥିଲେ । ଅନେକ ସମୟରେ ଶୁଭଶ୍ରୀଙ୍କୁ ମାରଧର କରୁଥିଲେ। ଖାଲି ସେତିକି ନୁହେଁ ପ୍ରଦ୍ୟୁମ୍ନ ଶୁଭଶ୍ରୀଙ୍କୁ ଗାଡିରେ ନେଇ ଠେଲି ମାରିଦେବାକୁ ମଧ୍ୟ ଉଦ୍ୟମ କରିଥିଲେ। ନିର୍ଯାତନା ବଢିବାରୁ ଶୁଭଶ୍ରୀ ସବୁ କଥା ପରିବାର ଲୋକଙ୍କୁ ଜଣାଇଥିଲେ। ୪/୫ ମାସ ହେବ ଆସି ବାପଘରେ ରହୁଥିଲେ। ଗତ ୨୬ ତାରିଖରେ ପ୍ରଦ୍ୟୁମ୍ନ ଶ୍ଵଶୁର ଘରେ ପହଞ୍ଚିଥିଲେ। ଅନୁତାପ କରି ସ୍ତ୍ରୀ ଶୁଭଶ୍ରୀଙ୍କୁ ସାଥୀରେ ନେବାପାଇଁ କହିଥିଲେ। କିନ୍ତୁ ପୂର୍ବରୁ ଶୁଭଶ୍ରୀଙ୍କୁ ବାରମ୍ବାର ମାରିବାକୁ ଉଦ୍ୟମ କରିଥିବାରୁ ପ୍ରଦ୍ୟୁମ୍ନ ସହ ଛାଡିବାକୁ ପରିବାର ଲୋକ ରାଜି ହୋଇନଥିଲେ । ପରେ ବହୁ ବାଧ୍ୟ କରିବାରୁ ଜଣେ ଆଇନଜୀବୀଙ୍କ ନିକଟରେ ଲେଖାପଢା କରି ସାକ୍ଷୀମାନଙ୍କ ଉପସ୍ଥିତିରେ ଝିଅକୁ ଛାଡ଼ିଥିଲେ।
ପ୍ରଦ୍ୟୁମ୍ନ ଶୁଭଶ୍ରୀଙ୍କୁ ୨୭ ତାରିଖ ଦିନ ଖୋର୍ଦ୍ଧାରୁ ଆଣି ଭୁବନେଶ୍ୱର କେଶୁରାରେ ରଖିଥିଲେ। ଏହାପରେ ଦୁହେଁ କେଶୁରାରୁ ଆସି ଭରତପୁର କଳିଙ୍ଗନଗରରେ ଆଉ ଏକ ଭଡା ଘରେ ରହିଥିଲେ। ସୋମବାର ଦ୍ଵିପ୍ରହରରେ ଶୁଭଶ୍ରୀଙ୍କ ମାଆ ଝିଅକୁ ଫୋନ୍ କରିବାରୁ ୨ ଜଣ ଯୁବତୀ ଫୋନ୍ ଉଠାଇଥିଲେ। ଶୁଭଶ୍ରୀଙ୍କ ଦେହ ଅସୁସ୍ଥ ଥିବାରୁ ସେମାନେ କ୍ୟାପିଟାଲ ହସ୍ପିଟାଲ ଯାଉଛନ୍ତି ବୋଲି କହିଥିଲେ। ପରିବାର ଲୋକେ ହସ୍ପିଟାଲରେ ପହଞ୍ଚିବା ବେଳକୁ ଶୁଭଶ୍ରୀଙ୍କ ମୃତ୍ୟୁ ହୋଇସାରିଥିଲା। ଫଳରେ ପରିବାର ଲୋକଙ୍କ ସନ୍ଦେହ ବଢିଥିଲା। ଭରତପୁର ଥାନାରେ ଏନେଇ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ।
