ଖଲ୍ଲିକୋଟ, ୦୧/୦୭ : ପ୍ରଧାନ ଶିକ୍ଷକ ଅବସର ନେଲେ, ସାଙ୍ଗରେ ସ୍କୁଲର ଚାବି ନେଇଗଲେ। ବାହାରେ ଘଣ୍ଟାଏ ବସିଲେ ଛାତ୍ରଛାତ୍ରୀ ଓ ଶିକ୍ଷୟିତ୍ରୀ। ଖବର ପାଇ ଅବସରପ୍ରାପ୍ତ ପ୍ରଧାନ ଶିକ୍ଷକ ଆସିଲେ ଓ ଚାବି ନପାଇ ନିଜେ ତାଲା ଭାଙ୍ଗିଲେ। ଖଲ୍ଲିକୋଟ ବ୍ଲକ ଅନ୍ତର୍ଗତ ପଥରା ତଳ ସାହି ପ୍ରାଥମିକ ବିଦ୍ୟାଳୟରୁ ଏଭଳି ଘଟଣା ସାମ୍ନାକୁ ଆସିଛି।
ସୂଚନାନୁଯାୟୀ, ଖଲ୍ଲିକୋଟ ବ୍ଲକ ପଥରା ତଳ ସାହି ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ସୁବାସ ଚନ୍ଦ୍ର ପାଳଙ୍କ ସୋମବାର ଶେଷ କାର୍ଯ୍ୟ ଦିବସ ଥିଲା। ଗତକାଲି ସେ ଅବସର ନେବା ସହ କାହାକୁ ଦାୟିତ୍ୱ ହସ୍ତାନ୍ତର ନକରି ସ୍କୁଲ ଗେଟ୍ରେ ତାଲା ପକାଇ ଚାବି ନେଇ ପଳାଇଥିଲେ। ଆଜି ଦିନ ୧୦ ଟାରେ ଛାତ୍ରଛାତ୍ରୀ ଓ ଶିକ୍ଷୟିତ୍ରୀମାନେ ବିଦ୍ୟାଳୟକୁ ଆସି ବାହାରେ ବସିଥିଲେ। ପ୍ରାୟ ଘଣ୍ଟାଏ ବାହାରେ ବସିବା ପରେ ଖବର ପାଇ ଦିନ ୧୧ ଟାରେ ଅବସରପ୍ରାପ୍ତ ପ୍ରଧାନ ଶିକ୍ଷକ ସୁବାସ ଚନ୍ଦ୍ର ପାଳ ସ୍କୁଲରେ ପହଞ୍ଚିଥିଲେ। ତେବେ ଚାବି ନପାଇ ଶେଷରେ ନିଜେ ତାଲାକୁ ଭାଙ୍ଗିଥିଲେ। ଦୀର୍ଘ ଦେଢ଼ ଘଣ୍ଟା ପରେ ଛାତ୍ରଛାତ୍ରୀ ଓ ଶିକ୍ଷୟିତ୍ରୀମାନେ ବିଦ୍ୟାଳୟ ଭିତରେ ପ୍ରବେଶ କରିଥିଲେ। ତେବେ ପ୍ରଧାନ ଶିକ୍ଷକ ଅବସର ଗ୍ରହଣ ପରେ ଦାୟିତ୍ୱ ହସ୍ତାନ୍ତର ନକରି ସ୍କୁଲ ଚାବି ସାଙ୍ଗରେ ନେଇ ପଳାଇବା ଘଟଣା ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
