ନୂଆଦିଲ୍ଲୀ,୧୫/୦୬; ମହିଳା ଟି-ଟ୍ୱେଣ୍ଟି ବିଶ୍ୱକପରେ ଟିମ୍ ଇଣ୍ଡିଆ ବିଜୟରୁ ଅଭିଯାନ ଆରମ୍ଭ କରିଛି । ପାରମ୍ପରିକ ପ୍ରତିଦ୍ବନ୍ଦୀ ପାକିସ୍ତାନକୁ ୬୪ ରନରେ ହରାଇଛି ଭାରତ । ଭାରତ-ପାକିସ୍ତାନ ପ୍ରତି ମ୍ୟାଚରେ କିଛି କିଛି ନା ସ୍ମୃତି ଛାଡିଥାଏ । ଯାହାକୁ ଭୁଲିହେବ ନାହିଁ । ଏହି ମ୍ୟାଚରେ ବି ସେମିତି କିଛି ଘଟିଥିଲା । ମ୍ୟାଚରେ ଭାରତର ଉତ୍ଥାନ-ପତନ ଆସିଥିଲା । କିନ୍ତୁ ଶେଷରେ ଏକ ବଡ଼ ଟର୍ଣ୍ଣି ପଏଣ୍ଟ ଆସିଥିଲା । ତାର ନାମ ହେଉଛି ରିଚା ଘୋଷ । ମ୍ୟାଚର ମୋଡ଼ ବଦଳାଇଥିଲେ ୱିକେଟ୍ କିପର ବ୍ୟାଚର ରିଚା ଘୋଷ । ପାକିସ୍ତାନ ବିପକ୍ଷ ବିଜୟ ପରେ କ୍ୟାପ୍ଟେନ୍ ହରମନପ୍ରୀତ କୌର କହିଛନ୍ତି, '' ମୁଁ ପ୍ରଥମ ବଲରୁ ରିଚାଙ୍କୁ ପଠାଇବାକୁ ପସନ୍ଦ କରେ, କିନ୍ତୁ ତାଙ୍କର ଏକ ସ୍ୱତନ୍ତ୍ର ଭୂମିକା ରହିଛି । ସେ ଯେପରି ଖେଳିଲେ ତାକୁ ନେଇ ମୁଁ ବହୁତ ଖୁସି । ''
ମ୍ୟାଚର ମୋଡ୍ କଣ ଥିଲା ? ପାକିସ୍ତାନ ଏବଂ ଭାରତ ମଧ୍ୟରେ ଖେଳାଯାଇଥିବା ମ୍ୟାଚରେ ଅନେକ ହିରୋ ଥିଲେ ଯେଉଁମାନେ ନିଜ ପ୍ରଦର୍ଶନ ଦ୍ୱାରା ପ୍ରଭାବ ପକାଇଥିଲେ । ସ୍ମୃତି ମନ୍ଧାନା ହୁଅନ୍ତୁ କିମ୍ବା ହରମନପ୍ରୀତ କୌର । ଦୁହିଁଙ୍କ ଲଢ଼ୁଆ ଇନିଂସ ସହ ରିଚା ଘୋଷଙ୍କ ବ୍ୟାଟିଂ ମ୍ୟାଚ୍କୁ ବଦଳାଇ ଦେଇଥିଲା । ରିଚା ଘୋଷ ପୁଣି ଥରେ ପ୍ରମାଣ କରିଛନ୍ତି ଯେ ସେ କାହିଁକି ମ୍ୟାଚ୍ ବଦଳାଇବା ନାମରେ ଜଣାଶୁଣା ଜଣେ ଖେଳାଳି। ଶେଷ ଦୁଇ ଓଭରରେ ସେ ଯେପରି ୨୯ ରନ୍ କରିଥିଲେ ତାହା ପାକିସ୍ତାନୀ ଦଳ ପାଇଁ ଏକ ବଡ଼ ବିପର୍ଯ୍ୟୟର ହୋଇଥିଲା । ୨୦୦ ଷ୍ଟ୍ରାଇକ୍ ରେଟ୍ ସହିତ, ରିଚା କରିଥିବା ରନ୍ ପାକିସ୍ତାନୀ ବୋଲରଙ୍କୁ କ୍ଷତି ପହଞ୍ଚାଇଥିଲା । ରିଚାଙ୍କ ଏହି ଇନିଂସ ପାକିସ୍ତାନୀ ବ୍ୟାଟଙ୍କ ମାନସିକ ସ୍ଥିତି ଉପରେ ପ୍ରଭାବ ପକାଇଥିଲା । ରିଚା ୧୭ ବଲ୍ରେ ୫ ଚୌକା ଏବଂ ଗୋଟିଏ ଛକା ମାରି ୩୪ ରନ୍ କରିଥିଲେ । ଆକାଶ ଚୋପ୍ରା ମଧ୍ୟ ରିଚାଙ୍କ ଇନିଂସରେ ପ୍ରଭାବିତ ହୋଇ ତାଙ୍କୁ ଖେଳ ପରିବର୍ତ୍ତନକାରୀ ବୋଲି କହିଥିଲେ।
ଏହା ବି ପଢନ୍ତୁ...IND VS PAK: ଦୀପ୍ତିଙ୍କ ସ୍ପିନ୍ ଯାଦୁରେ ପବନରେ ଉଡ଼ିଗଲା ପାକିସ୍ତାନ, ୫ ୱିକେଟ୍ ନେଇ ରଚିଲେ ଇତିହାସ
ରିଚାଙ୍କ ପାଳି ବଦଳାଇଲା ମୋମେଣ୍ଟ- ଭାରତ ୧୫୦ ସ୍କୋର ପାଖାପାଖି ଥିଲା । ୧୮ତମ ଓଭର ସୁଦ୍ଧା, ଭାରତୀୟ ମହିଳା ଦଳ ୧୩୨ ରନ କରିଥିଲା । ଖେଳ ଶେଷ ହେବାକୁ ଦୁଇ ଓଭର ବାକି ଥିଲା । ରିଚା ଗତି ବଦଳାଇ ୧୯ତମ ଓଭରରେ ୨୩ ରନ କରିଥିଲେ । ଯାହା ମ୍ୟାଚ୍କୁ ବଦଳାଇ ଦେଇଥିଲା। ରିଚା ତସମିଆ ରୁବାବଙ୍କ ଓଭରରେ ୪ ଚୌକା ଏବଂ ଗୋଟିଏ ଛକା ମାରି ମୋଟ ୨୩ ରନ କରି ଚମତ୍କାର କାମ କରିଥିଲେ । ଯାହା ମ୍ୟାଚ୍କୁ ବଦଳାଇ ଦେଇଥିଲା । ଏହା ପରେ, ଭାରତୀୟ ବୋଲରମାନେ ବାକି କାମ କରିଥିଲେ। ଦୀପ୍ତି ୫ ୱିକେଟ୍ ନେଇଥିଲେ ଏବଂ ପାକିସ୍ତାନୀ ବ୍ୟାଟରଙ୍କୁ ଆତ୍ମସମର୍ପଣ କରିବାକୁ ବାଧ୍ୟ କରିଥିଲେ । ଦୀପ୍ତି ୫ ୱିକେଟ୍ ପାଇଥିଲେ, କିନ୍ତୁ ରିଚାଙ୍କ ଇନିଂସ ପାକିସ୍ତାନକୁ ଶକ୍ତ ଧକ୍କା ଦେଇଥିଲା ।
ଏହା ବି ପଢନ୍ତୁ...T 20 World Cup 2026; ବିଶ୍ୱକପରେ ଭାରତର ବିଜୟ ଅଭିଯାନ, ଟସ୍ ପଡିବାଠୁ ନେଇ ମ୍ୟାଚ୍ ଜିତିବା ଯାଏ ଫଟୋରେ ଦେଖନ୍ତୁ ଝଲକ...
ମ୍ୟାଚ ବାବଦରେ କହିବାକୁ ଗଲେ, ଭାରତ ପ୍ରଥମେ ବ୍ୟାଟିଂ କରି ୬ ୱିକେଟ୍ ବିନିମୟରେ ୧୭୦ ରନ୍ କରିଥିଲା । ଜବାବରେ ପାକିସ୍ତାନ ୧୭ ଓଭରରେ ୧୦୬ରନ୍ କରି ଅଲଆଉଟ୍ ହୋଇଥିଲା । ଦୀପ୍ତି ଶର୍ମା (୫ ୱିକେଟ୍) ଓ ଶ୍ରୀ ଚରଣୀଙ୍କ (୩ ୱିକେଟ୍) ସ୍ପିନ ଯାଦୁରେ ପାକିସ୍ତାନ ପବନରେ ଉଡ଼ିଯାଇଥିଲା । ଦୀପ୍ତି ଶ୍ରେଷ୍ଠ ଖେଳାଳି ବିବେଚିତ ହୋଇଥିଲେ । ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଭାରତ । ଶେଫାଳି ବର୍ମା ପ୍ରଥମ ବଲ୍ ଛକା ମାରିଥିଲେ । ପରେ ପରେ ଆଉଟ୍ ହୋଇଥିଲେ । ଏହା ପରେ ଜେମିମା ବି ବେଶୀ ସମୟ ତିଷ୍ଠି ନଥିଲେ । ୧୮ରନ୍ ମଧ୍ୟରେ ୨ଟି ୱିକେଟ୍ ହରାଇଥିଲା ଭାରତ ।
ଟିମ୍ ଇଣ୍ଡିଆ ସଂଘର୍ଷ କରୁଥିବା ସମୟରେ ଅଧିନାୟିକା ଏବଂ ଉପ-ଅଧିନାୟିକା ସମ୍ଭାଳି ଖେଳିଥିଲେ । ସ୍ମୃତି ମନ୍ଧାନା ୩୪ବଲ୍ରେ ଅର୍ଦ୍ଧଶତକ ପୂରଣ କରିଥିଲେ । ଦଳୀୟ ସ୍କୋର ୧୦୯ରେ ମନ୍ଧନାଙ୍କ ୱିକେଟର ପତନ ଘଟିଥିଲା । ସେ ୯ଚୌକା ଓ ୨ଛକା ବଳରେ ୬୮ରନ୍ କରି ଆଉଟ୍ କରିଥିଲେ । ମଧ୍ୟକ୍ରମରେ ଭାରତୀ ଫୁଲମାଳି (୧) ବିଫଳ ହୋଇଥିଲେ । ହର୍ମନପ୍ରୀତ ମଧ୍ୟ ୩୬ ରନ୍ କରି ବିଦାୟ ନେଇଥିଲେ । ମାତ୍ର ୱିକେଟ୍ କିପର ବ୍ୟାଟର ରିଚା ଘୋଷ ପାକିସ୍ତାନ ବୋଲରଙ୍କୁ ନିର୍ମମ ପ୍ରହାର କରିଥିଲେ । ସେ ୧୭ବଲ୍ରେ ଦ୍ରୁତ ୩୪ (୫ଚୌକା, ୧ଛକା) ରନ୍ ଯୋଗ କରିବା ଫଳରେ ଦଳୀୟ ସ୍କୋର ୬/୧୭୦ରେ ପହଞ୍ଚି ଯାଇଥିଲା । ଦୀପ୍ତି ଶର୍ମା ୧୨ ରନ୍ କରି ଅପରାଜିତ ରହିଥିଲେ । ଏହି ବିଜୟ ସହିତ ମୋଟ୍ ମ୍ୟାଚ୍ ୩୧ରୁ ଭାରତ ୨୮ଟି ଜିତିଥିବା ବେଳେ ପାକିସ୍ତାନ ମାତ୍ର ୩ଟି ଜିତିଛି ।
