ନୂଆଦିଲ୍ଲୀ, ୧୮।୧୦: ଜଳବାୟୁ ପରିବର୍ତ୍ତନ ଯୋଗୁଁ ଧୀରେ ଧୀରେ ବୃଦ୍ଧି ପାଉଛି ସମୁଦ୍ର ସ୍ତର । ଏକ ନୂତନ ଅଧ୍ୟୟନରୁ ଜଣାପଡ଼ିଛି ଯେ ଯଦି ଆମେ ଜୀବାଶ୍ମ ଇନ୍ଧନ ଯେପରିକି କୋଇଲା ଏବଂ ତେଲ ବ୍ୟବହାର ବନ୍ଦ ନକରନ୍ତି, ତେବେ ଚଳିତ ଶତାବ୍ଦୀ ଶେଷ ସୁଦ୍ଧା ବିଶ୍ୱରେ ୧୦ କୋଟିରୁ ଅଧିକ କୋଠା ବୁଡ଼ି ଯାଇପାରେ । ଏହି କୋଠାଗୁଡ଼ିକ ଉପକୂଳବର୍ତ୍ତୀ ସହରଗୁଡ଼ିକରେ ଅବସ୍ଥିତ, ଯେଉଁଠାରେ ଲକ୍ଷ ଲକ୍ଷ ଲୋକ ବାସ କରନ୍ତି । ମ୍ୟାକଗିଲ୍ ବିଶ୍ୱବିଦ୍ୟାଳୟର ବୈଜ୍ଞାନିକଙ୍କ ଦ୍ୱାରା କରାଯାଇଥିବା ଅଧ୍ୟୟନରୁ ଏହା ଜଣାପଡ଼ିଛି । ଯାହା "ନେଚର ଅର୍ବାନ୍ ସଷ୍ଟେନେବିଲିଟି" ପତ୍ରିକାରେ ପ୍ରକାଶିତ । ଆଫ୍ରିକା, ଦକ୍ଷିଣ ପୂର୍ବ ଏସିଆ ଏବଂ ମଧ୍ୟ ଏବଂ ଦକ୍ଷିଣ ଆମେରିକାର ଉପକୂଳବର୍ତ୍ତୀ ଅଞ୍ଚଳରେ କୋଠାଗୁଡ଼ିକ ଉପରେ ଥିବା ବିପଦ ବିଷୟରେ ଅଧ୍ୟୟନ କରାଯାଇଥିଲା ।
ବୈଜ୍ଞାନିକମାନେ ସାଟେଲାଇଟ୍ ମାନଚିତ୍ର ଏବଂ ଉଚ୍ଚତା ତଥ୍ୟ ବ୍ୟବହାର କରି ଆକଳନ କରିଛନ୍ତି ଯେ, ଯଦି ସମୁଦ୍ର ସ୍ତର ମାତ୍ର ୦.୫ ମିଟର ବୃଦ୍ଧି ପାଏ, ତେବେ ପ୍ରାୟ ୩୦ ଲକ୍ଷ କୋଠା ବୁଡ଼ିଯିବ । ଯଦି ସମୁଦ୍ର ସ୍ତର ୫ ମିଟର କିମ୍ବା ତା’ଠାରୁ ଅଧିକ ବୃଦ୍ଧି ପାଏ, ତେବେ ବିପଦ ବହୁଗୁଣିତ ହେବ । ଅଧ୍ୟୟନରେ ସାମିଲ ଥିବା ପ୍ରଫେସର ନାତାଲ୍ୟା ଗୋମେଜ୍ କହିଛନ୍ତି ଯେ, ସମୁଦ୍ର ସ୍ତର ବୃଦ୍ଧି ହେଉଛି ଜଳବାୟୁ ପରିବର୍ତ୍ତନର ଏକ ଧୀର ପ୍ରକ୍ରିୟା କିନ୍ତୁ ଏହାର ପରିଣାମ ଭୟଙ୍କର । ବର୍ତ୍ତମାନ ଏହା ଉପକୂଳବର୍ତ୍ତୀ ଅଞ୍ଚଳଗୁଡ଼ିକ ପ୍ରଭାବିତ କରୁଛି । ଲୋକମାନେ ପ୍ରାୟତଃ ୧ରୁ ୨ ସେଣ୍ଟିମିଟର ବିଷୟରେ କଥା ହୁଅନ୍ତି, କିନ୍ତୁ ଯଦି ଇନ୍ଧନ ଜାଳିବା ବନ୍ଦ ନ କରାଯାଏ, ତେବେ ଏହା ଅଧିକ ମିଟର ପର୍ଯ୍ୟନ୍ତ ପହଞ୍ଚିପାରେ । ଭାରତ ମଧ୍ୟ ଏହି ବିପର୍ଯ୍ୟୟର ସାମନା କରିବ ।
ଏବେ ଆସନ୍ତୁ ଜାଣିବା ଭାରତୀୟ ସହରଗୁଡ଼ିକ ଉପରେ କ’ଣ ପ୍ରଭାବ ପଡ଼ିବ ? କହିରଖୁଛୁ ଯେ, ମୁମ୍ବାଇ ଏବଂ ଚେନ୍ନାଇ ଉପରେ ସବୁଠୁ ଅଧିକ ବିପଦ ରହିଛି । ଅନ୍ୟ ଏକ ଅଧ୍ୟୟନ ଅନୁଯାୟୀ, ଶତାବ୍ଦୀ ଶେଷ ସୁଦ୍ଧା ମୁମ୍ବାଇର ୨୧.୮% ଅର୍ଥାତ୍, ୧,୩୭୭ ବର୍ଗ କିଲୋମିଟର ବୁଡ଼ି ଯାଇପାରେ । ପୂର୍ବରୁ ୮୩୦ ବର୍ଗ କିଲୋମିଟର ବିପଦରେ ଅଛି । ଆଗାମୀ ୧୬ ବର୍ଷ ମଧ୍ୟରେ ୭.୩% ୮୬.୮ ବର୍ଗ କିଲୋମିଟର ଜଳମଗ୍ନ ହେବ, ଶତାବ୍ଦୀ ଶେଷ ସୁଦ୍ଧା ୧୮% ୨୧୫ ବର୍ଗ କିଲୋମିଟର ବୁଡ଼ିଯିବ । କୋଚି, ମାଙ୍ଗାଲୋର, ବିଶାଖାପାଟନମ୍, ହାଲଡିଆ, ଉଦୁପି, ପାରାଦୀପ, ପୁରୀର ୧ରୁ ୫% ଅଞ୍ଚଳ ଜଳମଗ୍ନ ହୋଇପାରେ । ପ୍ରଫେସର ଜେଫ୍ କାର୍ଡିଲ୍ କୁହନ୍ତି, କେବଳ କୋଠା ନୁହେଁ ସମୁଦ୍ରର ବୃଦ୍ଧି ଜୀବନ ଏବଂ ଅର୍ଥନୀତିକୁ ମଧ୍ୟ ବିପଦରେ ପକାଇଛି । ଯାହା ଫଳରେ ଲକ୍ଷ ଲକ୍ଷ ଲୋକ ବାସହୀନ ହୋଇଯିବେ । ବାଣିଜ୍ୟ ବାଧାପ୍ରାପ୍ତ ହେବ ଏବଂ ଖାଦ୍ୟର ମୂଲ୍ୟ ବୃଦ୍ଧି ପାଇବ । ସମଗ୍ର ବିଶ୍ୱ ଅର୍ଥନୀତି ଦୋହଲିଯିବ ବୋଲି ପ୍ରଫେସର ଏରିକ୍ ଗାଲବ୍ରେଥ୍ କହିଛନ୍ତି । ବୈଜ୍ଞାନିକମାନେ ଏକ ଇଣ୍ଟରାକ୍ଟିଭ୍ ମ୍ୟାପ୍ ମଧ୍ୟ ତିଆରି କରିଛନ୍ତି, ଯାହା ଦର୍ଶାଉଛି ଯେ କେଉଁ ଅଞ୍ଚଳଗୁଡ଼ିକ ପ୍ରତି ସବୁଠାରୁ ବିପଦ ଅଛି । ଉପକୂଳ ପ୍ରାଚୀର ନିର୍ମାଣ, ଭୂମି ବ୍ୟବହାର, ଆବଶ୍ୟକ ହେଲେ ଲୋକଙ୍କୁ ସ୍ଥାନାନ୍ତର କରିପାରିବେ । ସହର ଯୋଜନାକାରୀ, ସରକାର ଏବଂ ନାଗରିକମାନଙ୍କ ସହାୟତାରେ ଭବିଷ୍ୟତରେ ହେବାକୁ ଥିବା ବଡ଼ ଧରଣର ବିପର୍ଯ୍ୟୟକୁ ଏଡ଼ାଇହେବ ।
<
