ଉମରକୋଟ,୧୩/୮ : ମୃତ ଦାଦନ ଶ୍ରମିକଙ୍କ ପରିବାରକୁ କ୍ଷତି ପୂରଣ ବାବଦରେ ପ୍ରତ୍ୟକ ପରିବାରକୁ ୨୦ଲକ୍ଷ ଟଙ୍କା ଦେବାକୁ ଦାବି କରି ୩୯ନମ୍ବର ରାଜ୍ୟ ରାଜପଥ ରାସ୍ତା ଅବରୋଧ କରିଛନ୍ତି ଗ୍ରାମବାସୀ। ଉମରକୋଟଠାରୁ ନବରଙ୍ଗପୁର ଯିବା ରାସ୍ତାର ବକଡାବେଡାଠାରେ ଶବ ରଖି ଗ୍ରାମବାସୀ ରାସ୍ତା ଅବରୋଧ କରିଛନ୍ତି। ଫଳରେ ଉମରକୋଟଠାରୁ ନବରଙ୍ଗପୁର ଯୋଗାଯୋଗ ବିଚ୍ଛିନ୍ନ ହୋଇଯାଇଥିଲା। ରାସ୍ତାର ଉଭୟ ପାର୍ଶ୍ବରେ ଶହ ଶହ ଗାଡି ମୋଟର ଅଟକି ଯାଇଥିଲା।
ଘଟଣା ଅନୁସାରେ ନବରଙ୍ଗପୁର ଜିଲ୍ଲା ଉମରକୋଟ ଥାନା ଅଧୀନ ବକଡାବେଡା ଗ୍ରାମର କିଛି ଲୋକ ୧୨ଦିନ ତଳେ ତେଲେଙ୍ଗାନା ରାଜ୍ୟର କେଶରା ଥାନା ଅଧୀନ ସିକନ୍ଦର ଖମାମ ଅଞ୍ଚଳକୁ ଦାଦନ ଖଟିବାକୁ ଯାଇଥିଲେ। ରାସ୍ତାରେ କାମ କରୁଥିବା ସମୟରେ ଏକ ଗାଡ଼ି ଧକ୍କାରେ ୩ଜଣ ଦାଦନ ଶ୍ରମିକଙ୍କ ମୃତ୍ୟୁ ଘଟିଥିଲା। ମୃଚକ ତିନି ଜଣ ହେଲେ ଉମରକୋଟ ଥାନା ଅଧିନସ୍ଥ ବକଡା ବେଡା ଗ୍ରାମର ଜୟରାମ ଭତରା(୫୬), ନାରାୟଣ ଭତରା(୨୦) ଓ ଚେତମନ ଭତରା (୨୧)। ସୋମବାର ଅପରାହ୍ନ ୨.୩୦ମିନିଟ୍ ସମୟରେ ଜୟରାମ, ନାରାୟଣ ଓ ଚେତମନ ଏମାନେ ତିନି ଜଣ ରାସ୍ତା ଉପରେ କାମ କରୁଥିବା ସମୟରେ ପଛ ପଟୁ ଏକ ଟାଟ ଏସି ଗାଡି ଦୃତ ଗତିରେ ଆସି ଏମାନଙ୍କୁ ଧକ୍କା ଦେଇଥିଲା। ଫଳରେ ଘଟଣାସ୍ଥଳରେ ହିଁ ଏହି ତିନି ଜଣଙ୍କର ମୃତ୍ୟୁ ଘଟିଥିଲା। ଆଜି ଗ୍ରାମରେ ଶବ ପହଞ୍ଚିବା ପରେ ମୃତ ଶ୍ରମିକଙ୍କ ପରିବାରକୁ କ୍ଷତିପୂରଣ ଦାବିରେ ରାସ୍ତାରୋକ କରିଛନ୍ତି ଗ୍ରାମବାସୀ।
