ମସ୍କୋ,୦୬/୦୭: ରୁଷ୍ରେ ସ୍ୱଳ୍ପ ବୟସ୍କା ଝିଅମାନଙ୍କୁ ପିଲା ଜନ୍ମ ପାଇଁ ପୋତ୍ସାହିତ କରାଯାଉଛି । ଏଥିଲାଗି ସେମାନଙ୍କୁ ସରକାରଙ୍କ ତରଫରୁ ୧ ଲକ୍ଷ ଟଙ୍କାର ସହାୟତା ଦିଆଯାଉଛି । ଦେଶର ଜନସଂଖ୍ୟା ବଢ଼ାଇବା ଏବଂ ବିଶାଳ ସେନା ଗଠନ ଲାଗି ଏହି ପଦକ୍ଷେପ ନିଆଯାଇଛି । ଏହି ଯୋଜନା ଚଳିତବର୍ଷ ମାର୍ଚ୍ଚରେ ଆରମ୍ଭ ହୋଇଥିଲା । ପ୍ରଥମେ ଏଥିରେ କେବଳ ୧୮ ବର୍ଷରୁ ଊଦ୍ଧ୍ୱର୍ ବୟସର ମହିଳାଙ୍କୁ ସାମିଲ କରାଯାଉଥିଲା । ବର୍ତ୍ତମାନ ନାବାଳିକାଙ୍କୁ ଅନ୍ତର୍ଭୁକ୍ତ କରାଯାଇଛି । ଆର୍ଥିକ ସହାୟତା ନେବା ଲାଗି ଅଧିକରୁ ଅଧିକ ନାବାଳିକା ଏବଂ ସ୍ୱଳ୍ପ ବୟସର ଯୁବତୀ ପିଲାଜନ୍ମ ଲାଗି ଆଗ୍ରହ ପ୍ରକାଶ କରିବା ନେଇ ସରକାର ଆଶା ରଖିଛନ୍ତି । ରୁଷ୍ରେ ୨୦୨୩ରେ ପ୍ରତି ମହିଳାଙ୍କ ହାରାହାରି ଜନ୍ମ ହାର ୧.୪୧ ରହିଥିଲା । ଏହା ଅତ୍ୟନ୍ତ ଚିନ୍ତାଜନକ ବିଷୟ ପାଲଟିଛି । କାରଣ ଦେଶର ଜନସଂଖ୍ୟା ସ୍ଥିର ରଖିବା ଲାଗି ଜନ୍ମ ହାର ୨.୦୫ ରହିବା ଜରୁରି । ଜନସଂଖ୍ୟା ଦୃଷ୍ଟିରୁ ରୁଷ୍ ବର୍ତ୍ତମାନ ନବମ ସ୍ଥାନରେ ରହିଛି । କିନ୍ତୁ ଏବେ ଜନସଂଖ୍ୟା କମିବା ଚିନ୍ତା ଘାରିଲାଣି ।
ସରକାର ଜନ୍ମ ହାର ବଢ଼ାଇବା ସକାଶେ ଯେଉଁ ପଦକ୍ଷେପ ହାତକୁ ନେଇଛନ୍ତି, ତାହାକୁ ‘ପ୍ରୋନେଟଲିଷ୍ଟ ନୀତି’ କୁହାଯାଉଛି । ରୁଷ୍ରେ ସ୍କୁଲରେ ପାଠ ପଢ଼ୁଥିବା ଝିଅମାନଙ୍କୁ ପିଲା ଜନ୍ମ ପାଇଁ ଆର୍ଥିକ ସହାୟତା ଦେବା ନିଷ୍ପତ୍ତି ଏବେ ବିବାଦୀୟ ହୋଇପଡ଼ିଛି । ସର୍ଭେ ମୁତାବକ, ୪୩% ଲୋକ ଏହି ନୀତିକୁ ସମର୍ଥନ କରୁଥିବା ବେଳେ ୪୦% ବିରୋଧ କରୁଛନ୍ତି । ଅନ୍ୟପକ୍ଷରେ ଜନସଂଖ୍ୟା ବୃଦ୍ଧି ଉପରେ ସରକାର ସର୍ବାଧିକ ପ୍ରାଥମିକତା ଦେଉଛନ୍ତି । ରୁଷ୍ର ରାଷ୍ଟ୍ରପତି ଭ୍ଲାଦିମିର ପୁଟିନ କହିଛନ୍ତି, ଜନସଂଖ୍ୟା ବଢ଼ିବା ଦ୍ୱାରା ବିଶାଳ ସେନା ଗଠନ କରିବାକୁ ସହଜ ହେବ । ଏହାଦ୍ୱାରା ଦେଶ ଖୁବ ଶକ୍ତିଶାଳୀ ହୋଇପାରିବ । ୟୁକ୍ରେନ୍ ଯୁଦ୍ଧକୁ ଦୃଷ୍ଟିରେ ରଖି ସରକାର ଏହି ପଦକ୍ଷେପ ନେଉଥିବା କିଛି ବିଶେଷଜ୍ଞ ପ୍ରକାଶ କରିଛନ୍ତି।
