ନୂଆଦିଲ୍ଲୀ: ଗୁରୁବାର ସକାଳେ ୟୁକ୍ରେନ ଉପରେ ପୁଣି ଥରେ କ୍ଷେପଣାସ୍ତ୍ର ଏବଂ ଡ୍ରୋନ୍ ସାହାଯ୍ୟରେ ଆକ୍ରମଣ କରିଛି ରୁଷ୍ । ଯେଉଁଥିରେ ୪ ଶିଶୁଙ୍କ ସମେତ ମୋଟ ୧୫ ଜଣ ଲୋକ ପ୍ରାଣ ହରାଇଛନ୍ତି । ଏହି ଘଟଣା ଉପରେ ପ୍ରତିକ୍ରିୟା ଦେଇ ରାଷ୍ଟ୍ରପତି ଭୋଲୋଡିମିର ଜେଲେନ୍ସକି କହିଛନ୍ତି ଯେ, ଯୁଦ୍ଧ ସମାପ୍ତ କରିବା ପାଇଁ କୂଟନୈତିକ ପ୍ରୟାସ ମଧ୍ୟରେ ଏହା ରୁଷର ଉତ୍ତର।

ଆକ୍ରମଣରେ ୟୁରୋପୀୟ ୟୁନିଅନ ମିଶନ ଏବଂ ବ୍ରିଟିଶ କାଉନସିଲର ମୁଖ୍ୟାଳୟ ସମେତ ସାତଟି ଜିଲ୍ଲାର କୋଠା କ୍ଷତିଗ୍ରସ୍ତ ହୋଇଛି। ୟୁକ୍ରେନୀୟ ସେନା କହିଛି ଯେ, ଆମର ବାୟୁ ପ୍ରତିରକ୍ଷା ପ୍ରଣାଳୀ ଦେଶବ୍ୟାପୀ ରୁଷ ଦ୍ୱାରା ପ୍ରହାର କରାଯାଇଥିବା ପ୍ରାୟ ୬୦୦ ଡ୍ରୋନ୍ ମଧ୍ୟରୁ ୫୬୩ ଏବଂ ୩୧ ଟି କ୍ଷେପଣାସ୍ତ୍ର ମଧ୍ୟରୁ ୨୬ ଟି ଖସାଇ ଦେଇଛି।

ରଏଟର୍ସ ରିପୋର୍ଟ ଅନୁଯାୟୀ, ଏକ ଉଦ୍ଧାରକାରୀ ଦଳ ଆକ୍ରମଣ ସ୍ଥଳରେ ପହଞ୍ଚିଥିଲା, ଯେଉଁଠାରେ ଏକ କୋଠା ଭଗ୍ନାବଶେଷରେ ପରିଣତ ହୋଇଥିଲା। ଭଗ୍ନାବଶେଷ ଖୋଳିବା ସମୟରେ ୨ ଜଣଙ୍କ ମୃତଦେହ ମିଳିଥିଲା। ଅଧିକାରୀ ମାନେ କହିଛନ୍ତି ଯେ ରୁଷ ଦ୍ୱାରା ଏହି ଘଣ୍ଟା ଘଣ୍ଟା ଧରି ଚାଲିଥିବା ଆକ୍ରମଣରେ ୟୁକ୍ରେନର ଅତି କମରେ ୩୮ ଜଣ ସାଧାରଣ ନାଗରିକ ଆହତ ହୋଇଛନ୍ତି।

ୟୁକ୍ରେନୀୟ ସେନା କହିଛି ଯେ ରୁଷ ମୋଟ ୧୩ ଟି ସ୍ଥାନରେ ଆକ୍ରମଣ କରିଛି। ସେହି ସମୟରେ, ଜାତୀୟ ଗ୍ରୀଡ୍ ଅପରେଟର କହିଛନ୍ତି ଯେ ଶକ୍ତି ସୁବିଧା ଗୁଡ଼ିକ ବହୁତ କ୍ଷତି ସହିଛି। ରୁଷ ଆକ୍ରମଣ ସମ୍ପର୍କରେ, ୟୁକ୍ରେନ ରାଷ୍ଟ୍ରପତି ଜେଲେନ୍ସକି 'X' ରେ ପୋଷ୍ଟ କରି ଲେଖିଛନ୍ତି, 'ରୁଷ ଆଲୋଚନା ଟେବୁଲରେ ବସିବା ପରିବର୍ତ୍ତେ ବାଲିଷ୍ଟିକ୍ କ୍ଷେପଣାସ୍ତ୍ର ବାଛିଛି। ସେ ଯୁଦ୍ଧ ଶେଷ କରିବା ପରିବର୍ତ୍ତେ ହତ୍ୟା ଜାରି ରଖିବାକୁ ଚାହାଁନ୍ତି।'

ସେହି ସମୟରେ, ରୁଷ ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ସେନା ସାମରିକ ଶିଳ୍ପ ଘାଟି ଏବଂ ବିମାନବନ୍ଦର ଉପରେ ଆକ୍ରମଣ କରିଛି। ରୁଷ ସର୍ବଦା ସାଧାରଣ ଲୋକଙ୍କୁ ଟାର୍ଗେଟ କରିବାର ଅଭିଯୋଗକୁ ଅସ୍ୱୀକାର କରିଆସିଛି, କିନ୍ତୁ ଗତ କିଛି ଦିନ ମଧ୍ୟରେ ଘନ ଜନବସତି ଅଞ୍ଚଳରେ ଆକ୍ରମଣ ସମୟରେ ଡଜନ ଡଜନ ଲୋକଙ୍କ ମୃତ୍ୟୁ ହୋଇଛି।