ନୂଆଦିଲ୍ଲୀ: ଆମେରିକା ୟୁକ୍ରେନକୁ ଗୁପ୍ତଚର ସୂଚନା ଦେବା ବନ୍ଦ କରିବା ପରେ କ୍ବିଭ୍ ବଡ ଆକ୍ରମଣ କରିଛି ରୁଷ୍ । ୟୁକ୍ରେନର ଅଶାନ୍ତ ଡୋନେଟସ୍କ ଅଞ୍ଚଳର ଏକ ସହରରେ ରୁଷ ଏହି ଆକ୍ରମଣ କରିଛି। ରୁଷ୍ର ଏହି ଆକ୍ରମଣରେ ଅତି କମରେ ୨୦ ଜଣଙ୍କର ମୃତ୍ୟୁ ହୋଇଛି, ଯେତେବେଳେ କି ଅନେକ ଲୋକ ଆହତ ହୋଇଛନ୍ତି। ଆପଣଙ୍କୁ କହିରଖୁଛୁ ଯେ, ୟୁକ୍ରେନ ସହିତ ସାଟେଲାଇଟ୍ ଫଟୋ ସେୟାର କରିବା ବନ୍ଦ କରିବା ପାଇଁ ଆମେରିକାର ନିଷ୍ପତ୍ତି ପରେ, ରୁଷ ଏକାଧିକ ବିମାନ ଆକ୍ରମଣ କରିଛି।
ଶୁକ୍ରବାର ବିଳମ୍ବିତ ରାତିରେ ରୁଷ ସେନା ଭୟଙ୍କର ଆକ୍ରମଣ କରିଛି। ଏହି ଆକ୍ରମଣରେ ୩୦ ଜଣ ଆହତ ହୋଇଥିବା ମଧ୍ୟ ଜଣାପଡ଼ିଛି, ଯାହା ଡୋବ୍ରୋପିଲିଆ ସହରରେ ୮ ଟି ଆପାର୍ଟମେଣ୍ଟ ବ୍ଲକକୁ କ୍ଷତିଗ୍ରସ୍ତ କରିଛି, ଯେଉଁଠାରେ ରୁଷୀୟ ସୈନ୍ୟମାନେ ନିରନ୍ତର ଆଗକୁ ବଢ଼ୁଛନ୍ତି। ୟୁକ୍ରେନର ରାଜ୍ୟ ଜରୁରୀକାଳୀନ ସେବା କହିଛି ଯେ ଉଦ୍ଧାରକାରୀ ମାନେ ଜଳୁଥିବା କୋଠା ଗୁଡ଼ିକୁ ଲିଭାଇବା ପାଇଁ ସଂଘର୍ଷ କରୁଥିବା ସମୟରେ ଏକ ରୁଷୀୟ ଡ୍ରୋନ୍ ୟୁକ୍ରେନର ଏକ ଅଗ୍ନିଶମ ଗାଡ଼ିକୁ କ୍ଷତି ପହଞ୍ଚାଇଥିଲା।
ତେବେ କ୍ବିଭ୍ର ଡୋନେଟସ୍କ ଅଞ୍ଚଳରେ ରୁଷିଆ ଆକ୍ରମଣରେ ୨୦ ଜଣଙ୍କ ମୃତ୍ୟୁ ପରେ ଲୋକମାନେ ଆତଙ୍କିତ ଅଛନ୍ତି। ଡୋନେଟସ୍କ ରାଜ୍ୟପାଳ ଭାଦିମ୍ ଫିଲିଆସ୍କିନ୍ ଶନିବାର ଦିନ ଅଞ୍ଚଳରେ ଶୋକ ଦିବସ ଘୋଷଣା କରିଛନ୍ତି ଏବଂ କହିଛନ୍ତି ଯେ ଭଗ୍ନାବଶେଷ ମଧ୍ୟରୁ ଆହୁରି ପୀଡିତ ମିଳିପାରନ୍ତି। ରୁଷିଆ କ୍ଷେପଣାସ୍ତ୍ର ଏବଂ ଡ୍ରୋନ ଦ୍ୱାରା ନଷ୍ଟ ହୋଇଥିବା ଘର ଏବଂ ପୋଡ଼ିଯାଇଥିବା କାର ଗୁଡ଼ିକ ଆମ ସହରର ଶରୀରରେ ଏକ ଭୟଙ୍କର କ୍ଷତ । ବର୍ତ୍ତମାନ, ଆମେ ଜାଣିଛୁ ଯେ ୨୦ ଜଣଙ୍କର ମୃତ୍ୟୁ ହୋଇଛି ଏବଂ ୩୦ ଜଣ ଆହତ ହୋଇଛନ୍ତି, କିନ୍ତୁ ସନ୍ଧାନ ଅଭିଯାନ ଜାରି ରହିଛି ଏବଂ ଏହି ସଂଖ୍ୟା ଆହୁରି ବଢ଼ିପାରେ ।
ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସକି କହିଛନ୍ତି ଯେ ଆହତଙ୍କ ମଧ୍ୟରେ ଅତି କମରେ ପାଞ୍ଚ ଜଣ ପିଲା ଅଛନ୍ତି। ଗତକାଲି ରାତିରେ, ରୁଷୀୟ ସାମରିକ ବାହିନୀ ଡୋବ୍ରୋପିଲିଆର କେନ୍ଦ୍ରରେ ଦୁଇଟି ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଥିଲା । ଜରୁରୀକାଳୀନ ସେବା ଘଟଣାସ୍ଥଳକୁ ପହଞ୍ଚିବା ପରେ, ସେମାନେ ଉଦ୍ଧାର କର୍ମୀମାନଙ୍କୁ ଜାଣିଶୁଣି ଟାର୍ଗେଟ କରି ଆଉ ଏକ ଆକ୍ରମଣ ଆରମ୍ଭ କରିଥିଲେ।
