ନୂଆଦିଲ୍ଲୀ,୦୪/୦୩: ଋଷ ଏବଂ ଇରାନ୍ ମଧ୍ୟରେ ସୈନ୍ୟ ସମ୍ପର୍କ କେଉଁ ସ୍ଥରରେ ପହଞ୍ଚିଛି, ସେନେଇ ରଏଟର୍ସର ଏକ ରିପୋର୍ଟରେ ଖୁଲାସା ହୋଇଛି। ତେବେ ବର୍ତ୍ତମାନ ଏମିତି କିଛି ସତ ସାମ୍ନାକୁ ଆସିଛି, ଯାହା ନିହାତି ଭାବରେ ଆଶ୍ଚର୍ଯ୍ୟଜନକ। ଉଭୟ ରାଷ୍ଟ୍ର ମଧ୍ୟରେ ସମ୍ପର୍କ କେବଳ ସୈନ୍ୟ ଉପକରଣ ବିକ୍ରି କରିବାରେ ନାହିଁ ବରଂ ଉଭୟ ଏକ ଏମିତି ସଂଗଠନ ତିଆରି କରିଛନ୍ତି, ଯାହାକି ଯୁଦ୍ଧ ପାଇଁ ଅସ୍ତ୍ରଶସ୍ତ୍ର ତିଆରି କରିବା ସହିତ ଯୁଦ୍ଧ ମୈଦାନକୁ ନିଜ ନିଜର ଲୋକଙ୍କୁ ମଧ୍ୟ ପଠାଉଛନ୍ତି।
ଗସ୍ତ ରେକର୍ଡ ଏବଂ ନିଯୁକ୍ତି ତଥ୍ୟର ରଏଟର୍ସ ତଦନ୍ତରୁ ଜଣାପଡ଼ିଛି ଯେ, ଗତ ବର୍ଷ ଇରାନ ସହିତ ପ୍ରତିରକ୍ଷା ସହଯୋଗକୁ ସୁଦୃଢ଼ କରିବା ପାଇଁ ଅନେକ ବରିଷ୍ଠ ରୁଷୀୟ କ୍ଷେପଣାସ୍ତ୍ର ବିଶେଷଜ୍ଞ ଇରାନ ଗସ୍ତ କରିଥିଲେ। ଦୁଇଟି ଗୋଷ୍ଠୀର ବୁକିଂ ଏବଂ ଯାତ୍ରୀ ତାଲିକାର ବିବରଣୀ ଥିବା ଦସ୍ତାବିଜ ଅନୁସାରେ, ଗତ ବର୍ଷ ଏପ୍ରିଲ ୨୪ ଏବଂ ସେପ୍ଟେମ୍ବର ୧୭ ରେ ଦୁଇଟି ବିମାନରେ ମସ୍କୋରୁ ତେହେରାନ ଯାତ୍ରା କରିବା ପାଇଁ ସାତ ଜଣ ଅସ୍ତ୍ରଶସ୍ତ୍ର ବିଶେଷଜ୍ଞଙ୍କୁ ବୁକ୍ କରାଯାଇଥିଲା।
ବୁକିଂ ରେକର୍ଡରେ ପୁରୁଷମାନଙ୍କ ପାସପୋର୍ଟ ନମ୍ବର ରହିଛି, ସାତ ଜଣଙ୍କ ମଧ୍ୟରୁ ଛଅ ଜଣଙ୍କ ପାସପୋର୍ଟ ନମ୍ବରରେ '୨୦' ପ୍ରିଫିକ୍ସ ଅଛି। ରୁଷ ସରକାରଙ୍କ ଏକ ନିର୍ଦ୍ଦେଶ ଏବଂ ରୁଷ ବୈଦେଶିକ ମନ୍ତ୍ରଣାଳୟ ୱେବସାଇଟରେ ଥିବା ଏକ ଦଲିଲ ଅନୁସାରେ, ଏହି ପ୍ରିଫିକ୍ସଟି ସରକାରୀ ରାଜ୍ୟ କାର୍ଯ୍ୟ ପାଇଁ ବ୍ୟବହୃତ ପାସପୋର୍ଟକୁ ବୁଝାଏ, ଯାହା ବିଦେଶରେ ସେବା କରୁଥିବା ସରକାରୀ ଅଧିକାରୀ ଏବଂ ବିଦେଶରେ ନିୟୋଜିତ ସାମରିକ କର୍ମଚାରୀଙ୍କୁ ଜାରି କରାଯାଏ।
ତଥାପି, ଏହି ସାତ ଜଣ ଅଧିକାରୀ ଇରାନରେ କ'ଣ କରୁଥିଲେ ସେ ସମ୍ପର୍କରେ ରଏଟର୍ସରେ କୌଣସି ସୂଚନା ଉଲ୍ଲେଖ କରାଯାଇନାହିଁ। କିନ୍ତୁ ଏହାରି ଭିତରେ ଇସ୍ରାଏଲ ଉପରେ ମଧ୍ୟ ଆକ୍ରମଣ ହୋଇଥିଲା। ଇରାନ ପ୍ରତିରକ୍ଷା ମନ୍ତ୍ରଣାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ରୁଷିଆ କ୍ଷେପଣାସ୍ତ୍ର ବିଶେଷଜ୍ଞମାନେ ଗତ ବର୍ଷ ଅନେକ ଥର ଇରାନ କ୍ଷେପଣାସ୍ତ୍ର ଉତ୍ପାଦନ ସ୍ଥାନ ପରିଦର୍ଶନ କରିଥିଲେ ।
ରୁଷ ସହିତ ଇରାନର ପ୍ରତିରକ୍ଷା ସହଯୋଗ ଉପରେ ନଜର ରଖୁଥିବା ଜଣେ ପଶ୍ଚିମ ପ୍ରତିରକ୍ଷା ଅଧିକାରୀ ନିଜର ନାଁ ଗୋପନ ରଖିବା ସର୍ତ୍ତରେ କହିଥିଲେ ଯେ ସେ ସେପ୍ଟେମ୍ବରରେ ଇରାନର କାସ୍ପିଆନ ସାଗର ଉପକୂଳରେ ଥିବା ଆମିରବାଦ ବନ୍ଦରରୁ ପ୍ରାୟ ୧୫ କିଲୋମିଟର ପଶ୍ଚିମରେ ଏକ ଇରାନୀ କ୍ଷେପଣାସ୍ତ୍ର ଘାଟି ପରିଦର୍ଶନ କରିଥିଲେ। ଟିକସ, ଫୋନ୍ ଏବଂ ଯାନବାହାନ ରେକର୍ଡ ସମେତ ବେସାମରିକ ଚାକିରି କିମ୍ବା କର୍ମକ୍ଷେତ୍ର ବିଷୟରେ ସୂଚନା ଗ୍ରହଣ କରୁଥିବା ରୁଷୀୟ ଡାଟାବେସ୍ର ସମୀକ୍ଷା ଅନୁଯାୟୀ, ରଏଟର୍ସ ଦ୍ୱାରା ପ୍ରୋଫାଇଲ କରାଯାଇଥିବା ସାତ ଜଣ ରୁଷୀୟ ଅଧିକାରୀଙ୍କର ବରିଷ୍ଠ ସାମରିକ ପୃଷ୍ଠଭୂମି ରହିଛି ଏବଂ ଏଥିରେ ଦୁଇଜଣ କର୍ଣ୍ଣେଲ ଏବଂ ଦୁଇଜଣ ଲେଫ୍ଟନାଣ୍ଟ-କର୍ଣ୍ଣେଲ ପଦ ରହିଛି।
