ନୂଆଦିଲ୍ଲୀ ୨୫/୦୭: ଅଦ୍ୟାବଧି ମଣିଷ ଡ୍ରଗ୍ସ ଚୋରାଚାଲାଣ କରୁଥିଲା । କିନ୍ତୁ ରୁଷ୍ରେ ଏକ ବିଲେଇକୁ ଏହି କାମରେ ବ୍ୟବହାର କରାଯାଇଛି । ମାମଲା ରୁଷ୍ର ନିଜନି ନୋଭଗୋରୋଦ ସ୍ଥିତ ପିନଲ କଲୋନି ନମ୍ବର-୧୭ର । ଗଳା ପଟିରେ ଲୁଚାଇ ଜେଲ ଭିତରକୁ ଡ୍ରଗ୍ସ ନେଉଥିବା ବେଳେ ବିଲେଇ ଧରାପଡ଼ିଲା । ତା’ ଗଳାରେ କପଡ଼ାର ଦୁଇଟି ପଟି ବନ୍ଧାଯାଇଥିଲା । ସେଥିରେ ଡ୍ରଗ୍ସ ଲୁଚାଯାଇଥିଲା । ଜେଲ କର୍ମଚାରୀ ବିଲେଇକୁ ଜେଲ ପରିସରରେ ପ୍ରବେଶ ପୂର୍ବରୁ ଧରିନେଲେ । କର୍ମଚାରୀମାନେ ପଟି ହଟାଇ ଯାଞ୍ଚ କଲେ । ଏଥିପାଇଁ ସ୍ୱତନ୍ତ୍ର ସନ୍ଧାନୀ କୁକୁରକୁ ଦାୟିତ୍ୱ ଦିଆଗଲା । ପଟିରେ ଡ୍ରଗ୍ସ ଥିବା କୁକୁର ସ୍ପଷ୍ଟ କଲା । ଡ୍ରଗ୍ସ ଜବତ କରିବା ପରେ ବିଲେଇକୁ ସୁରକ୍ଷିତ ଭାବେ ଛାଡ଼ି ଦିଆଗଲା ।
ଆହୁରି ପଢ଼ନ୍ତୁ...Space Traffic Regulations: ମହାକାଶରେ ବଢ଼ିଚାଲିଛି ଦୁର୍ଘଟଣା, କକ୍ଷରେ ଟ୍ରାଫିକ୍ ନିୟନ୍ତ୍ରଣ କରିବ ନୂଆ ନିୟମ
ତେବେ ଏହି ନିଶାଦ୍ରବ୍ୟଗୁଡ଼ିକ ଜେଲ ଭିତରେ ଥିବା କଏଦୀମାନଙ୍କ ନିକଟକୁ ଚାଲାଣ କରିବା ଯୋଜନା ଥିଲା। ତଦନ୍ତକାରୀମାନେ ସନ୍ଦେହ କରୁଛନ୍ତି ଯେ ଚୋରା ଚାଲାଣକାରୀମାନେ ଭାବିଥିଲେ ଯେ କେହି ବିଲେଇ ଉପରେ ସନ୍ଦେହ କରିବେ ନାହିଁ, କାରଣ ଏହା ସହଜରେ କାନ୍ଥ, ବୁଦା ଏବଂ ସଂକୀର୍ଣ୍ଣ ସ୍ଥାନରେ ଯାଇ ଜେଲ ପରିସରରେ ପହଞ୍ଚିପାରିବ। ସେଥିପାଇଁ ଏହାକୁ ଡ୍ରଗ୍ସ ପରିବହନ ପାଇଁ ବ୍ୟବହାର କରାଯାଇଥିଲା। ତଥାପି, ଜେଲର ସୁରକ୍ଷା ବ୍ୟବସ୍ଥା ଏବଂ କର୍ମଚାରୀଙ୍କ ସତର୍କତା ଯୋଗୁଁ ଏହି ପ୍ରୟାସକୁ ସମ୍ପୂର୍ଣ୍ଣ ଭାବରେ ପଣ୍ଡ କରାଯାଇଥିଲା; ଜେଲ ଭିତରକୁ ପ୍ରବେଶ କରିବା ପୂର୍ବରୁ ବିଲେଇଟିକୁ ଧରାଯାଇଥିଲା।
