ନୂଆଦିଲ୍ଲୀ,୧୭/୦୬: ଘରୋଇ ଇଂଲଣ୍ଡ-ଭାରତ ଦ୍ୱିପାକ୍ଷିକ ଟେଷ୍ଟ ସିରିଜରେ ବିଜେତା ଦଳକୁ ପଟୌଦି ଟ୍ରଫି ପ୍ରଦାନ କରାଯାଇଥାଏ । ଇଂଲଣ୍ଡ କ୍ରିକେଟ୍ ବୋର୍ଡ (ଇସିବି) କିନ୍ତୁ ଏହାକୁ ଅବସର ଦେଇ ଆଣ୍ଡରସନ-ତେନ୍ଦୁଲକର ଟ୍ରଫି ପ୍ରଦାନ କରାଯିବା ନେଇ ନିଷ୍ପତ୍ତି ନେଇଛି । ଅହମ୍ମଦାବାଦରେ ଏୟାର ଇଣ୍ଡିଆ ବିମାନର ଦୁର୍ଘଟଣା ଯୋଗୁ ନୂଆ ଟ୍ରଫି ଉନ୍ମୋଚନ କାର୍ଯ୍ୟକ୍ରମ ବିଳମ୍ବ ହେଉଛି ।
ଜାତୀୟ ଗଣମାଧ୍ୟମର ରିପୋର୍ଟ ଅନୁସାରେ, ଇସିବିର ଟ୍ରଫି ନାମ ପରିବର୍ତ୍ତନ ନିଷ୍ପତ୍ତିରେ କିମ୍ବଦନ୍ତୀ ସଚିନ ତେନ୍ଦୁଲକର ଖୁସି ନୁହଁନ୍ତି । ସେ ଉଭୟ ବିସିସିଆଇ ଓ ଇସିବିକୁ ପଟୌଦି ଟ୍ରଫି ନାମ ପରିବର୍ତ୍ତନ ନକରିବାକୁ ଅନୁରୋଧ କରିଛନ୍ତି । ଏ ବିଷୟରେ ଉଭୟ ବୋର୍ଡ କ’ଣ ନିଷ୍ପତ୍ତି ନେଉଛନ୍ତି ତାହା ଖୁବ ଶୀଘ୍ର ଜଣା ପଡ଼ିବ ।
ଇସିବିର ଜଣେ ଅଧିକାରୀ କହିଛନ୍ତି ଯେ, ‘ଇଂଲଣ୍ଡ-ଭାରତ ସିରିଜରେ ପଟୌଦି ଟ୍ରଫି ବଜାୟ ରହିବାର ଯୋଜନା ହେଉଛି ।’ ମାତ୍ର ଏ ବିଷୟରେ କିଛି ଅଫିସିଆଲ ସୂଚନା ଇସିବି ପକ୍ଷରୁ ରଖାଯାଇ ନାହିଁ ।
ପଟୌଦି ନାମ ପରିବର୍ତ୍ତନକୁ ନେଇ କିମ୍ବଦନ୍ତୀ ସୁନୀଲ ଗାଭାସ୍କର ମଧ୍ୟ ଖୁସି ନାହାନ୍ତି । କ୍ରିକେଟ୍ ପ୍ରତି ପଟୌଦିଙ୍କ ଅବଦାନ ଅତୁଳନୀୟ । ତେଣୁ ଟ୍ରଫି ନାମ ପରିବର୍ତ୍ତନର ଯଥାର୍ଥତା ମନେ କରୁ ନାହିଁ ବୋଲି ଗାଭାସ୍କର କହିଛନ୍ତି ।
