ମୁମ୍ବାଇ,୦୫/୧୧: ବଲିଉଡ ଅଭିନେତା ସଲମାନ ଖାନଙ୍କୁ ପୁଣି ହତ୍ୟା ଧମକ । ତେବେ ନିକଟରେ ବାବା ସିଦ୍ଦିକିଙ୍କ ହତ୍ୟା ପରଠୁ ଅଭିନେତା ସଲମାନ ଖାନଙ୍କୁ ବାରମ୍ବାର ହତ୍ୟା ଧମକ ମିଳୁଛି । ଯାହାକୁ ନେଇ ତାଙ୍କର ସୁରକ୍ଷା ବୃଦ୍ଧି କରାଯାଇଥିଲା । ହେଲେ ଏହାରି ମଧ୍ୟରେ ସଲମାନଙ୍କୁ ପୁଣିଥରେ ମିଳିଛି ହତ୍ୟା ଧମକ । ଗତକାଲି ରାତିରେ ମୁମ୍ବାଇ ଟ୍ରାଫିକ କଣ୍ଟ୍ରୋଲ ରୁମକୁ ଏକ ଧମକପୂର୍ଣ୍ଣ କଲ ଆସିଛି। ଏହି ଧମକରେ ୫ କୋଟି ଦିଅ ଏବଂ ମନ୍ଦିରକୁ ଆସି କ୍ଷମା ପ୍ରାର୍ଥନା କର ବୋଲି କୁହାଯାଉଛି।
ତେବେ ବର୍ତ୍ତମାନ ୱର୍ଲି ପୋଲିସ ଏହି ଘଟଣାର ତଦନ୍ତ କରୁଛି। ଏହା ପୂର୍ବରୁ ମଧ୍ୟ ମୁମ୍ବାଇ ଟ୍ରାଫିକ ପୋଲିସ ସଲମାନଙ୍କ ପାଇଁ ଧମକପୂର୍ଣ୍ଣ ବାର୍ତ୍ତା ପାଇଥିଲା। ଯେଉଁଥିରେ ୨ କୋଟି ଟଙ୍କା ଦାବି କରାଯାଇଥିଲା। ଏଥିସହିତ ବିଷ୍ଣୋଇ ଗ୍ୟାଙ୍ଗ ନାମରେ ସଲମାନଙ୍କୁ ଧମକ ଦେବା ଖବର ଆସିବା ପରେ ଅଭିନେତାଙ୍କ ପ୍ରଶଂସକମାନେ ପୁଣି ଚିନ୍ତିତ ଅଛନ୍ତି। ପ୍ରକାଶ ଥାଉକି, ଲରେନ୍ସ ଗ୍ୟାଙ୍ଗ ସଲମାନ ଖାନଙ୍କୁ ଅନେକଥର ହତ୍ୟା କରିବାକୁ ଧମକ ଦେଇଛନ୍ତି । ଏହି ମାମଲା ଏକ ହରିଣର ହତ୍ୟା ସହ ଜଡିତ। ତେଣୁ ବିଷ୍ଣୋଇ ଗ୍ୟାଙ୍ଗ ସେମାନଙ୍କ ସମାଜକୁ କ୍ଷମା ମାଗିବାକୁ ଦାବି କରିଛି । ନଚେତ ତାଙ୍କୁ ହତ୍ୟା କରାଯିବ।
କହିରଖୁଛୁ କି, କିଛି ଦିନ ପୂର୍ବରୁ ସଲମାନଙ୍କ ଘନିଷ୍ଠ ବନ୍ଧୁ ତଥା ଏନସିପି ନେତା ବାବା ସିଦ୍ଦିକି ମୁମ୍ବାଇର ବାନ୍ଦ୍ରାସ୍ଥିତ କାର୍ଯ୍ୟାଳୟରେ ଗୁଳିକରି ହତ୍ୟା କରାଯାଇଥିଲା । ତାଙ୍କୁ ୧୨ ଅକ୍ଟୋବରରେ ଅଜଣା ବ୍ୟକ୍ତି ହତ୍ୟା କରିଥିଲେ । ଏହି ହତ୍ୟା ପାଇଁ ଲରେନ୍ସ ବିଷ୍ଣୌଇ ଗ୍ୟାଙ୍ଗ ଦାୟିତ୍ୱ ଗ୍ରହଣ କରିଥିଲେ । କୁହାଯାଇଥିଲା ଯେ ସଲମାନଙ୍କ ସହ ତାଙ୍କର ଘନିଷ୍ଠତା ହେତୁ ସେ ଲରେନ୍ସ ବିଷ୍ଣୌଇ ଗ୍ୟାଙ୍ଗର ଟାର୍ଗେଟରେ ସେ ଆସିଥିଲେ । ତେବେ ହତ୍ୟା ମାମଲାର ତଦନ୍ତ ଜାରି ରହିଛି ।
