ନୂଆଦିଲ୍ଲୀ ୧୨/୧୧: ନିକଟରେ ଓଟିଟିରେ ରିଲିଜ୍ କରିଛି ସାମନ୍ଥାଙ୍କ ସ୍ପାଇ-ଥ୍ରୀଲର 'ସିଟାଡେଲ: ହନି ବନି' ସିରିଜ୍ । ଏହି ଶୋ’ରେ ଅଭିନେତ୍ରୀଙ୍କ ଦମଦାର ପ୍ରଦର୍ଶନକୁ ଖୁବ୍ ପ୍ରଶଂସା କରାଯାଉଛି। ସିରିଜର ପ୍ରମୋଶନରେ ଅଭିନେତ୍ରୀ ମଧ୍ୟ ବ୍ୟସ୍ତ ଅଛନ୍ତି ଏବଂ ଏସବୁ ମଧ୍ୟରେ ଏକ ସାକ୍ଷାତକାରରେ ସେ ନାଗା ଚୈତନ୍ୟଙ୍କ ସହିତ ଛାଡପତ୍ରର ୩ବର୍ଷ ପରେ ମାତୃତ୍ୱ ବିଷୟରେ ଖୋଲାଖୋଲି ଭାବେ କଥାହୋଇଛନ୍ତି।
ଏକ ସାକ୍ଷାତକାରରେ ସାମନ୍ଥା କହିଛନ୍ତି, "ମୁଁ ଭାବୁନାହିଁ ଯେ ବହୁତ ଡେରି ହୋଇଯାଇଛି। ମୋର ମା’ ହେବାର ସ୍ୱପ୍ନ ଅଛି ଏବଂ ଅବଶ୍ୟ ମୁଁ ଜଣେ ମା’ ହେବାକୁ ପସନ୍ଦ କରିବି, ମୁଁ ସବୁବେଳେ ମା’ ହେବାକୁ ଚାହୁଁଥିଲି। ଏହା ବହୁତ ସୁନ୍ଦର ଅନୁଭୂତି। ମୁଁ ଏହାକୁ ଅପେକ୍ଷା କରିଛି । ଲୋକମାନେ ପ୍ରାୟତଃ ବୟସକୁ ନେଇ ଚିନ୍ତିତ ରହିଥାନ୍ତି, କିନ୍ତୁ ମୁଁ ଅନୁଭବ କରେ ଜୀବନରେ ଏମିତି କୌଣସି ସମୟ ନାହିଁ ଯେତେବେଳେ ତୁମେ ମା’ ହୋଇପାରିବ ନାହିଁ।"
ତେବେ ସାମନ୍ଥା ତାଙ୍କର ସିରିଜରେ ଜଣେ ମା’ ଭୂମିକାରେ ଅଭିନୟ କରିଛନ୍ତି । ଅଭିନେତ୍ରୀ ତାଙ୍କ ସିରିଜରେ ଜଣେ ଶିଶୁ କଳାକାରଙ୍କ ସହ କାମ କରିବାର ଅନୁଭୂତି ମଧ୍ୟ ସେୟାର କରିଛନ୍ତି। ସେ ସେହି ଶିଶୁ କଳାକାରଙ୍କୁ ନିଜ ଝିଅ ଭଳି ଭାବୁଥିଲେ। ସେ ଶିଶୁ କଳାକାରଙ୍କୁ ଖୁବ୍ ପ୍ରଶଂସା ମଧ୍ୟ କରିଛନ୍ତି। ମା’ ହେବାର ଇଚ୍ଛା ବିଷୟରେ ସାମନ୍ଥାଙ୍କ ବିବୃତ୍ତି ବର୍ତ୍ତମାନ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ପ୍ରଶଂସକମାନେ ଅନୁମାନ କରୁଛନ୍ତି ଯେ ଅଭିନେତ୍ରୀ ବୋଧହୁଏ ଜୀବନରେ ଆଗକୁ ବଢିବାକୁ ଚିନ୍ତା କରୁଛନ୍ତି।
