ପୁରୀ,୧୭/୦୭: ଶରଧାବାଲି ଦଳାଚକଟା ମାମଲାରେ ଶ୍ରୀମନ୍ଦିର ପ୍ରଶାସନରେ କାର୍ଯ୍ୟରତ ଅଧିକାରୀ ଓ ପୁଲିସ ଅଧିକାରୀଙ୍କ ବୟାନ ରେକର୍ଡ ହୋଇଛି । ବୁଧବାର ସର୍କିଟ ହାଉସ ସମ୍ମିଳନୀ କକ୍ଷରେ ମାମଲାର ତଦନ୍ତକାରୀ ଅଧିକାରୀ ତଥା ଉନ୍ନୟନ କମିଶନର ଅନୁ ଗର୍ଗ ମୋଟ ୪୨ ଜଣଙ୍କ ବୟାନ ରେକର୍ଡ କରିଛନ୍ତି । ଇଣ୍ଟିଗ୍ରେଟେଡ୍ କମାଣ୍ଡ ଆଣ୍ଡ୍ କଣ୍ଟ୍ରୋଲ ସେଣ୍ଟର (ଆଇସିସିସି)ରେ ମୁତୟନ ଥିବା ପୁଲିସ ଓ ପ୍ରାଶାସନିକ ଅଧିକାରୀମାନେ ସର୍କିଟ ହାଉସ୍ରେ ସେମାନଙ୍କ ବୟାନ ରଖିଥିଲେ ।
ଅଦ୍ୟାବଧି ତଦନ୍ତକାରୀ ଅଧିକାରୀ ଭୁବନେଶ୍ୱରରେ ଗୋଟିଏ ଓ ପୁରୀ ସର୍କିଟ ହାଉସ୍ଠାରେ ୩ଟି ତଦନ୍ତ କମିଟି ବୈଠକ କଲେଣି । ଘଟଣା ସମୟର ପ୍ରତ୍ୟକ୍ଷଦର୍ଶୀ ବା ଏ ବାବଦରେ ଘଟଣାସ୍ଥଳରେ ଥିବା ସମସ୍ତ ବର୍ଗର ବ୍ୟକ୍ତିବିଶେଷଙ୍କ ସମେତ ଡ୍ୟୁଟିରେ ମୁତୟନ ବିଭିନ୍ନ ବିଭାଗର ଅଧିକାରୀଙ୍କ ବୟାନ ନେଇଛନ୍ତି । ମାସକ ଭିତରେ ତଦନ୍ତ ପ୍ରକ୍ରିୟା ସାରିବାକୁ ସରକାର ତଦନ୍ତକାରୀ ଅଧିକାରୀଙ୍କୁ ସମୟ ଦେଇଛନ୍ତି ।
୩ ରଥ ସୁରକ୍ଷା ଦାୟିତ୍ୱରେ ଥିବା ବରିଷ୍ଠ ପ୍ରାଶାସନିକ ଅଧିକାରୀ, ଶ୍ରୀମନ୍ଦିର ପ୍ରଶାସନର ବରିଷ୍ଠ ଅଧିକାରୀ, ଭିଡ଼ ନିୟନ୍ତ୍ରଣ ଦାୟିତ୍ୱରେ ଥିବା ବରିଷ୍ଠ ପୁଲିସ ଅଧିକାରୀ ପ୍ରମୁଖ ଦାୟିତ୍ୱରେ ଅବହେଳା କରିଛନ୍ତି ବୋଲି ପ୍ରଶ୍ନ ଉଠିଥିଲା । ରାଜ୍ୟ ସରକାର ଘଟଣାର ତଦନ୍ତ କରିବାକୁ ନିଷ୍ପତ୍ତି ନେଇଥିଲେ । ପ୍ରଶାସନ ପାଖରେ ଘଟଣା ସମୟର ସିସିଟିଭି ଫୁଟେଜ୍ ଥିବାସତ୍ତେ୍ୱ ଖିଲାପ କରିଥିବା ସମସ୍ତ ଅଧିକାରୀ ଓ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇନଥିବା ଅଭିଯୋଗ ହୋଇଆସୁଛି।
