ନୂଆଦିଲ୍ଲୀ,୩୧/୦୧: ଆମେରିକାର ଧମକକୁ ଖାତିର ନାହିଁ । ପରମାଣୁ ଶକ୍ତି ସଜାଡୁଛି ଇରାନ। ଗତ ବର୍ଷ ଆମେରିକା ଦ୍ୱାରା ହୋଇଥିବା ଏୟାରଷ୍ଟ୍ରାଇକ୍ ପରେ ଇରାନର ପରମାଣୁ ଘାଟିରେ ପୁଣି ଥରେ କାର୍ଯ୍ୟକଳାପ ହୋଇଥିବା ସ୍ପଷ୍ଟ ହୋଇଛି। ସାଟେଲାଇଟ୍ ଚିତ୍ରଗୁଡ଼ିକ ଦର୍ଶାଉଛି ଯେ, ଇରାନ ଏହାର ଦୁଇଟି ପ୍ରମୁଖ ପରମାଣୁ ଘାଟି ଇସ୍ଫାହାନ ଏବଂ ନାତାଞ୍ଜରେ କ୍ଷତିଗ୍ରସ୍ତ ପ୍ରତିଷ୍ଠାନ ଉପରେ ନୂଆ ଛାତ ତିଆରି କରିଛି । ଇସ୍ରାଏଲ ଏବଂ ଆମେରିକା ଆକ୍ରମଣ ପରେ ଇରାନ ତାର ୨ ପରମାଣୁ ଘାଟିଗୁଡ଼ିକରେ ନୂଆ ଭାବରେ ନିର୍ମାଣ କରିଛି ବୋଲି ସାଟେଲାଇଟ୍ ଚିତ୍ରରୁ ଜଣାପଡିଛି । ଏହା ଆମେରିକା ଏବଂ ଇସ୍ରାଏଲର ଚିନ୍ତାକୁ ବଢାଇ ଦେଇଛି । ବିଶେଷଜ୍ଞମାନେ ଭୟ କରୁଛନ୍ତି କି, ଇରାନ ଅବଶିଷ୍ଟ ପରମାଣୁ ସାମଗ୍ରୀକୁ ଲୁଚାଇବାକୁ କିମ୍ବା ଅପସାରଣ କରିବାକୁ ଚେଷ୍ଟା କରୁଛି ।
ପ୍ଲାନେଟ୍ ଲ୍ୟାବ୍ସ ପିବିସି ଦ୍ୱାରା ପ୍ରକାଶିତ ସାଟେଲାଇଟ୍ ଚିତ୍ରଗୁଡ଼ିକ ଅନ୍ତର୍ଜାତୀୟ ସମୁଦାୟକୁ ଚିନ୍ତାରେ ପକାଇଛି । ଆକ୍ରମଣ ପରେ ତେହେରାନ ଛାଡିଯାଇଥିବା ସମ୍ବେଦନଶୀଳ ପରମାଣୁ ସମ୍ପଦଗୁଡ଼ିକୁ ଲୁଚାଇବା କିମ୍ବା ପୁନରୁଦ୍ଧାର କରିବାକୁ ଚେଷ୍ଟା କରିପାରେ । ଜୁନ୍ ମାସରେ ଇସ୍ରାଏଲ ଏବଂ ଇରାନ ମଧ୍ୟରେ ହୋଇଥିବା ୧୨-ଦିନିଆ ଯୁଦ୍ଧ ପରେ ଏହା କୌଣସି ବୋମା ବିଧ୍ୱସ୍ତ ପରମାଣୁ ଘାଟିରେ ଦେଖାଯାଇଥିବା ପ୍ରଥମ ପ୍ରମୁଖ ନିର୍ମାଣ କାର୍ଯ୍ୟକଳାପ । ନୂଆ ଛାତ ଆବରଣ ଯୋଗୁଁ କାର୍ଯ୍ୟକଳାପ ଦେଖିବା ସାଟେଲାଇଟ ପାଇଁ କଷ୍ଟକର । ଇରାନ ଅନ୍ତର୍ଜାତୀୟ ପରମାଣୁ ଶକ୍ତି ଏଜେନ୍ସି (ଆଇଏଇଏମ) ନିରୀକ୍ଷକମାନଙ୍କୁ ଦେଶରେ ପ୍ରବେଶ କରିବାକୁ ଅନୁମତି ଦେଇନାହିଁ । ତେଣୁ ଦୂରରୁ ନିରୀକ୍ଷଣ କରିବା ଏକମାତ୍ର ଉପାୟ ।
ବିଶେଷଜ୍ଞଙ୍କ ଅନୁସାରେ, ଏହି ଛାତ ଉଦ୍ଦେଶ୍ୟ ନୂଆ ପରମାଣୁ ନିର୍ମାଣ ଅପେକ୍ଷା ସମ୍ବେଦନଶୀଳ ଉପକରଣ ଏବଂ ଭଗ୍ନାବଶେଷ ତଳେ ପୋତା ଯାଇଥିବା ୟୁରାନିୟମ ଭଣ୍ଡାରକୁ ଉଦ୍ଧାର କରିବା ହୋଇପାରେ । ଡେମୋକ୍ରାସିଜର ଫାଉଣ୍ଡେସନର ଆଣ୍ଡ୍ରିଆ ଷ୍ଟ୍ରିକରଙ୍କ ଅନୁଯାୟୀ, ଇରାନ ନିଶ୍ଚିତ କରିବାକୁ ଚାହୁଁଛି ଯେ ଇସ୍ରାଏଲ ଏବଂ ଆମେରିକା ସେମାନଙ୍କର ଆକ୍ରମଣର ଅବଶିଷ୍ଟାଂଶ ଦେଖିପାରିବେ ନାହିଁ ।
ତେହେରାନରୁ ପ୍ରାୟ ୨୨୦ କିଲୋମିଟର ଦୂର ନାତାଞ୍ଜ ଇରାନର ସବୁଠାରୁ ଗୁରୁତ୍ୱପୂର୍ଣ୍ଣ ୟୁରାନିୟମ ସମୃଦ୍ଧି କେନ୍ଦ୍ର ଥିଲା । ଯାହା ୬୦% ଯାଏ ସମୃଦ୍ଧ ୟୁରାନିୟମ ଉତ୍ପାଦନ କରୁଥିଲା । ଜୁନ୍ ମାସରେ, ଆମେରିକା ବଙ୍କର-ବଷ୍ଟର ବୋମା ସହିତ ଭୂମିଗତ ଅଂଶ ଉପରେ ଆକ୍ରମଣ କରିଥିଲା । ଜାନୁଆରୀ ଆରମ୍ଭରେ ଇସ୍ଫାହାନରେ ଛାତ ନିର୍ମାଣ କରାଯାଇଥିଲା। ଇସ୍ରାଏଲୀ ସେନା କହିଛି ଯେ ଆକ୍ରମଣ ସେଣ୍ଟ୍ରିଫ୍ୟୁଜ୍ ଉତ୍ପାଦନ ସୁବିଧାଗୁଡ଼ିକୁ ଟାର୍ଗେଟ କରିଥିଲା । ସାଟେଲାଇଟ ଚିତ୍ରଗୁଡ଼ିକ ନାତାଞ୍ଜ ନିକଟସ୍ଥ ପିକାକ୍ସ ପର୍ବତରେ ଚାଲୁଥିବା ଖନନ ମଧ୍ୟ ଦର୍ଶାଉଛି, ଯେଉଁଠାରେ ବିଶ୍ଳେଷକମାନେ ବିଶ୍ୱାସ କରନ୍ତି ଯେ ଇରାନ ଏକ ନୂତନ ଭୂମିଗତ ପରମାଣୁ ସୁବିଧା ନିର୍ମାଣ କରୁଥିବ । ଇରାନ ପରମାଣୁ କାର୍ଯ୍ୟକ୍ରମକୁ ଶାନ୍ତିପୂର୍ଣ୍ଣ ବୋଲି କହିଛି ।
