ନୂଆଦିଲ୍ଲୀ, ୭।୭: ଅନ୍ତର୍ଜାତୀୟ ବଜାରରୁ ଏକ ବଡ଼ ଖବର ସାମ୍ନାକୁ ଆସିଛି । ତେଲ ଉତ୍ପାଦନକାରୀ ଦେଶଗୁଡ଼ିକ ମଧ୍ୟରେ ଜାରି ରହିଥିବା ପ୍ରତିଯୋଗିତା ଯୋଗୁଁ ସାଉଦି ଆରବ ଅଶୋଧିତ ତେଲ ମୂଲ୍ୟରେ ବଡ଼ ଧରଣର ହ୍ରାସ କରିଛି । ଅଗଷ୍ଟ ମାସ ପାଇଁ ସାଉଦି ଆରବ କ୍ରୁଡ୍ ଅଏଲ୍ ଦରରେ ବ୍ୟାରେଲ୍ ପିଛା ୧୧ ଡଲାର କମାଇ ଦେଇଛି, ଯାହା ଗତ ୨୬ ବର୍ଷ ମଧ୍ୟରେ ସବୁଠାରୁ ବଡ଼ ହ୍ରାସ ବୋଲି କୁହାଯାଉଛି । ଏହାପୂର୍ବରୁ ଜୁଲାଇ ମାସରେ ମଧ୍ୟ ‘ଆରବ ଲାଇଟ୍ କ୍ରୁଡ୍’ ଉପରେ ବ୍ୟାରେଲ୍ ପିଛା ୬ ଡଲାର ରିହାତି ଦିଆଯାଇଥିଲା । ହୋର୍ମୁଜ୍ ଖୋଲିବା ପରେ ଜୁଲାଇରେ ଏହି ସଂଶୋଧନ କରାଯାଇଥିଲା, ଯାହାଫଳରେ ତେଲ ଦର ଫେବ୍ରୁଆରୀ ୨୮ ପୂର୍ବ ସ୍ଥିତିକୁ ଫେରିଆସିଛି । ବ୍ଲୁମବର୍ଗର ଏକ ରିପୋର୍ଟ ଅନୁଯାୟୀ, ଏସିଆ ପାଇଁ ସାଉଦି ଆରବର ଅଶୋଧିତ ତେଲ ମୂଲ୍ୟ ଓମାନ ଦୁବାଇ ହାରାହାରି ମୂଲ୍ୟଠାରୁ ବ୍ୟାରେଲ୍ ପିଛା ୧.୫୦ ଡଲାର କମ୍ ରହିଛି ।

ବୃଦ୍ଧି ପାଉଛି ତେଲ ଯୋଗାଣ:

ପାରସ୍ୟ ଉପସାଗରର ପ୍ରମୁଖ ତେଲ ଉତ୍ପାଦନକାରୀ ଦେଶଗୁଡ଼ିକ ଏବେ ଦ୍ରୁତ ଗତିରେ ଉତ୍ପାଦନ ବୃଦ୍ଧି କରୁଛନ୍ତି । ସାଉଦି ଆରବର ରପ୍ତାନି ଏବେ ଯୁଦ୍ଧ ପୂର୍ବ ସ୍ଥିତିକୁ ଫେରିଆସିଛି ଏବଂ ସେ ନିଜର ଟ୍ୟାଙ୍କରଗୁଡ଼ିକୁ ହୋର୍ମୁଜ୍ ଦେଇ ସହଜରେ ପଠାଇପାରୁଛି । ଅନ୍ୟପଟେ ୟୁଏଇ ଯିଏକି ବିବାଦ ସମୟରେ ଓପେକ ଛାଡ଼ିଥିଲା ସେ ମଧ୍ୟ ଯୋଗାଣ ସ୍ୱାଭାବିକ କରିଛି । ଏହା ସହିତ ଓପେକ ପ୍ଲସ୍ ଏବଂ ରୁଷ ସମେତ ତାର ସହଯୋଗୀ ଦେଶଗୁଡ଼ିକ ଅଗଷ୍ଟରୁ ଦୈନିକ ତେଲ ଉତ୍ପାଦନ ଲକ୍ଷ୍ୟକୁ ଆଉ ୧୮୮,୦୦୦ ବ୍ୟାରେଲ୍ ବଢ଼ାଇବାକୁ ସହମତ ହୋଇଛନ୍ତି ।

କ୍ରୁଡ୍ ଅଏଲ୍ ଦରରେ ସାମାନ୍ୟ ସୁଧାର:

ସୋମବାର କ୍ରୁଡ୍ ଅଏଲ୍ ଦରରେ ହ୍ରାସ ରେକର୍ଡ କରାଯାଇଥିବା ବେଳେ ମଙ୍ଗଳବାର ଏଥିରେ ସାମାନ୍ୟ ବୃଦ୍ଧି ଦେଖିବାକୁ ମିଳିଛି । ବ୍ରେଣ୍ଟ କ୍ରୁଡ୍: ୦.୩୬% ବୃଦ୍ଧି ସହ ବ୍ୟାରେଲ୍ ପିଛା ୭୨.୨୬ ଡଲାରରେ କାରବାର କରୁଛି । ଡବ୍ଲୁଟିଆଇ କ୍ରୁଡ୍ ୦.୪୪% ବୃଦ୍ଧି ସହ ବ୍ୟାରେଲ୍ ପିଛା ୬୮.୮୫ ଡଲାରରେ ପହଞ୍ଚିଛି । ଏହି ସାମାନ୍ୟ ବୃଦ୍ଧି ସତ୍ତ୍ୱେ ତେଲ ଦର ଯୁଦ୍ଧ ପୂର୍ବ ସ୍ଥିତିରେ ହିଁ ରହିଛି । ଜୁନ୍ ମାସରେ ଅଶୋଧିତ ତେଲ ଦର ପ୍ରାୟ ୨୦ ପ୍ରତିଶତ ହ୍ରାସ ପାଇଥିବା ବେଳେ ଜୁଲାଇରେ ଏହା ଏକ ସୀମିତ ଦରରେ ଗତି କରୁଛି ।

ଏହା ବି ପଢ଼ନ୍ତୁ... Strait of Hormuz: ହୋର୍ମୁଜରେ ଇରାନର ପୁଣି ଆକ୍ରମଣ; ୨ଟି ଜାହାଜକୁ କଲା ମିସାଇଲ ମାଡ଼, ବିପଦରେ ଶାନ୍ତିଚୁକ୍ତି

ଭାରତ ଉପରେ ଏହାର କ’ଣ ପ୍ରଭାବ ପଡ଼ିବ ?

ଅଶୋଧିତ ତେଲର କମ୍ ଦର ଏବଂ ବର୍ଦ୍ଧିତ ଯୋଗାଣ ଭାରତ ପାଇଁ ଏକ ବଡ଼ ଆଶ୍ୱସ୍ତି ଆଣିଦେଇଛି । ତେଲ କମ୍ପାନୀଗୁଡ଼ିକ ବଜାର ମୂଲ୍ୟଠାରୁ କମ୍ ଦରରେ ପେଟ୍ରୋଲ-ଡିଜେଲ ବିକ୍ରି କରିବା ଏବଂ ଏଲପିଜି ଉପରେ ହେଉଥିବା କ୍ଷତିକୁ ଭରଣା କରିବାକୁ ଚେଷ୍ଟା କରୁଛନ୍ତି । କ୍ରୁଡ୍ ଅଏଲ୍ ଶସ୍ତା ହେବା ଦ୍ୱାରା ସରକାରଙ୍କ ସବସିଡି ବୋଝ କମିବ । ତେବେ ତେଲ ମାର୍କେଟିଂ କମ୍ପାନୀଗୁଡ଼ିକ ଏବେ ବି କିଛିଟା ଚିନ୍ତାରେ ଅଛନ୍ତି, କାରଣ ଜୁନ୍ ତ୍ରୈମାସିକରେ ସେମାନଙ୍କୁ କ୍ଷତି ସହିବାକୁ ପଡ଼ିଛି ଏବଂ ସେପ୍ଟେମ୍ବର ତ୍ରୈମାସିକରେ ମଧ୍ୟ ପୁରୁଣା ମହଜୁଦ୍ ଉପରେ ଉଚ୍ଚ ମୂଲ୍ୟର ପ୍ରଭାବ ପଡ଼ିବାର ଆଶଙ୍କା ରହିଛି । ଅନ୍ୟପଟେ, ଶସ୍ତା ତେଲ ଯୋଗୁଁ ଭାରତୀୟ ଶିଳ୍ପ ଜଗତର ଶକ୍ତି ଖର୍ଚ୍ଚ କମିବ, ଯାହା ମୁଦ୍ରାସ୍ଫୀତି ବା ମହଙ୍ଗା ମାଡ଼କୁ ନିୟନ୍ତ୍ରଣ କରିବାରେ ସାହାଯ୍ୟ କରିବ ।

ଦେଶର ପ୍ରମୁଖ ସହରରେ ଆଜିର ପେଟ୍ରୋଲ-ଡିଜେଲ ଦର:

ଭାରତରେ ଦୀର୍ଘ ଦିନ ହେବ ପେଟ୍ରୋଲ ଏବଂ ଡିଜେଲ ଦର ସ୍ଥିର ରହିଛି । ଗତ ମେ' ୨୫ ତାରିଖରେ ଶେଷ ଥର ପାଇଁ ଦର ବୃଦ୍ଧି ହୋଇଥିଲା । ବର୍ତ୍ତମାନର ପ୍ରମୁଖ ମେଟ୍ରୋ ସହରଗୁଡ଼ିକର ଦର ଏହିଭଳି ରହିଛି:

ସହର

ପେଟ୍ରୋଲ

ଡିଜେଲ

ଦିଲ୍ଲୀ

୧୦୨.୧୨

୯୫.୨୦

ମୁମ୍ୱାଇ

୧୧୧.୨୧

୯୭.୮୩

କୋଲକାତା

୧୧୩.୫୧

୯୯.୮୨

ଚେନ୍ନାଇ

୧୦୭.୭୭

୯୯.୫୫

ଗ୍ଲୋବାଲ୍ ମାର୍କେଟରେ କ୍ରୁଡ୍ ଅଏଲ୍ ଦର ହ୍ରାସ ପାଇବା ପରେ ଏବେ ଘରୋଇ ବଜାରରେ ପେଟ୍ରୋଲ ଏବଂ ଡିଜେଲ୍ ଦର କେବେ ଶସ୍ତା ହେଉଛି, ତାହା ଉପରେ ସମସ୍ତଙ୍କ ନଜର ରହିଛି ।