ବୈପାରୀଗୁଡ଼ା, ୧୭/୧୧ : ଡମ୍ପିଂୟାର୍ଡରେ ପଡ଼ିଛି ମାଳ ମାଳ ଜୋତା ଓ ସ୍କୁଲ ୟୁନିଫର୍ମ। ସରକାରଙ୍କ ତରଫରୁ ସ୍କୁଲ ପିଲାଙ୍କ ପାଇଁ ଯୋଗାଇ ଦିଆଯାଉଥିବା ପୋଷାକ ଏବଂ ଜୋତା ବଣ୍ଟନ କରିବା ପରିବର୍ତ୍ତେ ଫୋପାଡି ଦିଆଯାଇଛି। କୋରାପୁଟ ଜିଲ୍ଲା ବୈପାରିଗୁଡା ଗାଁ ମଶାଣି ନିକଟରେ ଥିବା ଡମ୍ପିଂୟାର୍ଡରେ ଏଭଳି ଘଟଣା ଦେଖିବାକୁ ମିଳିଛି।
ଜଣେ ଗାଈ ଚରାଳି ରବିବାର ଗାଈ ଚରାଇବା ବେଳେ ଡମ୍ପିଂୟାର୍ଡରେ ଜୋତା ଓ ସ୍କୁଲ ୟୁନିଫର୍ମ ପଡିଥିବା ଦେଖିବାକୁ ପାଇଥିଲେ। ଏନେଇ ଗ୍ରାମବାସୀଙ୍କୁ ଜଣାଇଥିଲେ। ତେବେ ଏହି ଜୋତା ଓ ପୋଷାକ ବାଣ୍ଟିବା ପରିବର୍ତ୍ତେ କାହିଁକି ଫିଙ୍ଗା ଯାଇଛି ତାହାର କାରଣ ଅସ୍ପଷ୍ଟ ରହିଛି। ଘଟଣା ପଛରେ କାହାର ହାତ ରହିଛି ? ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏନେଇ ସ୍ଥାନୀୟ ଗୋଷ୍ଠୀ ଶିକ୍ଷା ଅଧିକାରୀ ମୁହଁ ଖୋଲୁନାହାନ୍ତି । ଯାହାକୁ ନେଇ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ବିଧିବଦ୍ଧ ଭାବରେ ତଦନ୍ତ କରି ପ୍ରକୃତ ସତ ସାମ୍ନାକୁ ଆଣିବାକୁ ଦାବି ହୋଇଛି ।
