ନୂଆଦିଲ୍ଲୀ: ୨୦୨୩ ମସିହାରେ ଭାରତୀୟ ଯୁବକ ସଚିନ ମୀନାଙ୍କୁ ବିବାହ କରିବା ପାଇଁ ଅବୈଧ ଭାବେ ଭାରତକୁ ଆସିଥିବା ପାକିସ୍ତାନୀ ମହିଳା ସୀମା ହୈଦର ଏବେ ପୁଣି ଚର୍ଚ୍ଚାରେ। ଭିସା ରଦ୍ଧ ହେବା ଭୟରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭାରତରେ ରହିବା ପାଇଁ କରିଛନ୍ତି ଆକୁଳ ନିବେଦନ। ସେ ନିଜକୁ ଭାରତର ବୋହୁ କହିବା ସହିତ ସେ କେବେ ଭାରତ ଛାଡି ଯିବେ ନାହିଁ ବୋଲି ମଧ୍ୟ କହିଛନ୍ତି। ଜମ୍ମୁ ଓ କଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ସରକାର ପାକିସ୍ତାନୀ ନାଗରିକମାନଙ୍କ ପାଇଁ ଭିସା ସେବା ସ୍ଥଗିତ ରଖିବା ନିଷ୍ପତ୍ତି ନେବା ପରେ ଏହି ମାମଲା ସାମ୍ନାକୁ ଆସିଛି।
ଗତ ମଙ୍ଗଳବାର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ପର୍ଯ୍ୟଟଙ୍କ ମୃତ୍ୟୁ ହୋଇଥିଲା। ଯାହା ଗତ ୨୫ ବର୍ଷ ମଧ୍ୟରେ ଜମ୍ମୁ ଓ କାଶ୍ମୀର ଅଞ୍ଚଳରେ ହୋଇଥିବା ସବୁଠାରୁ ଭୟଙ୍କର ଆକ୍ରମଣ ଭାବେ ପରିଗଣିତ ହେଉଛି। ଏହି ଆକ୍ରମଣକୁ ପାକିସ୍ତାନର ଲସ୍କର-ଏ-ତୋଇବା ସଂଗଠିତ କରାଇଥିବା ନେଇ ପ୍ରମାଣ ମିଳିଛି। ତେବେ ଏହାର ପ୍ରତିଶୋଧ ସ୍ୱରୂପ, ପ୍ରଧାନମନ୍ତ୍ରୀ ମୋଦୀଙ୍କ ଅଧ୍ୟକ୍ଷତାରେ ବୈଠକ କରି କ୍ୟାବିନେଟ କମିଟି ପାକିସ୍ତାନୀ ନାଗରିକମାନଙ୍କ ପାଇଁ ଭିସା ସେବା ସ୍ଥଗିତ ରଖିବା ସହ ଏପ୍ରିଲ ୨୭ ତାରିଖ ସୁଦ୍ଧା ସେମାନଙ୍କୁ ଦେଶ ଛାଡ଼ିବାକୁ ନିର୍ଦ୍ଦେଶ ଦେଇଛି।
ସୀମା ହୈଦର ୨୦୨୩ ମସିହାରେ ପାକିସ୍ତାନର ସିନ୍ଧ ପ୍ରଦେଶରେ ଥିବା ତାଙ୍କ ସ୍ୱାମୀଙ୍କୁ ଛାଡ଼ି ଚାରି ସନ୍ତାନଙ୍କ ସହ ନେପାଳ ମାର୍ଗ ଦେଇ ଅବୈଧ ଭାବେ ଭାରତରେ ପ୍ରବେଶ କରିଥିଲେ। ସେ ନୟଡାରେ ରହୁଥିବା ସଚିନ ମୀନାଙ୍କୁ ବିବାହ କରି ବର୍ତ୍ତମାନ ସେଠାରେ ବସବାସ କରୁଛନ୍ତି। ଗତ ମାସରେ ଉଭୟଙ୍କର ଏକ ଝିଅ ମଧ୍ୟ ଜନ୍ମ ହୋଇଛି। ତେବେ ସୀମା ଦାବି କରିଛନ୍ତି ଯେ ସେ ସଚିନଙ୍କୁ ବିବାହ କରିବା ପରେ ସେ ହିନ୍ଦୁ ଧର୍ମ ମଧ୍ୟ ଗ୍ରହଣ କରିଛନ୍ତି।
ସୋସିଆଲ ମିଡିଆରେ ପ୍ରସାରିତ ଏକ ଭିଡିଓରେ ସୀମା କହିଛନ୍ତି ଯେ, “ମୁଁ ପାକିସ୍ତାନକୁ ଫେରିବାକୁ ଚାହୁଁନାହିଁ। ମୁଁ ପ୍ରଧାନମନ୍ତ୍ରୀ ମୋଦୀ ଓ ମୁଖ୍ୟମନ୍ତ୍ରୀ ଯୋଗୀଙ୍କୁ ଅନୁରୋଧ କରୁଛି ମୋତେ ଭାରତରେ ରହିବାକୁ ଅନୁମତି ଦିଅନ୍ତୁ। ମୁଁ ପାକିସ୍ତାନର ଝିଅ ଥିଲି, କିନ୍ତୁ ଏବେ ମୁଁ ଭାରତର ବୋହୂ।” ସେ ନିଜର ନୂଆ ପରିବାର ଓ ଭାରତ ପ୍ରତି ନିଷ୍ଠା ପ୍ରକାଶ କରି ଏହି ଆବେଦନ କରିଛନ୍ତି।
ସୀମାଙ୍କ ଓକିଲ ଏ.ପି. ସିଂ କହିଛନ୍ତି ଯେ ସୀମା ଏବେ ପାକିସ୍ତାନୀ ନାଗରିକ ନୁହନ୍ତି। ସେ ଜଣେ ଭାରତୀୟ ନାଗରିକଙ୍କୁ ବିବାହ କରିଛନ୍ତି ଏବଂ ତାଙ୍କର ଏକ ସନ୍ତାନ ମଧ୍ୟ ଅଛି। ସେ ଆନ୍ତର୍ଜାତୀୟ ନ୍ୟାୟାଳୟ ଓ ଗାର୍ଡିଆନସିପ ଆକ୍ଟର ନିୟମ ଉଲ୍ଲେଖ କରି କହିଛନ୍ତି ଯେ ସୀମାଙ୍କୁ ତାଙ୍କ ସନ୍ତାନଙ୍କ ସହ ଭାରତରେ ରହିବାର ଅଧିକାର ରହିଛି। ତେଣୁ କେନ୍ଦ୍ର ସରକାରଙ୍କ ନିର୍ଦ୍ଦେଶ ତାଙ୍କ ଉପରେ ପ୍ରଯୁଜ୍ୟ ହେବ ନାହିଁ।
ସୀମାଙ୍କ ମାମଲା ସୋସିଆଲ ମିଡିଆରେ ବେଶ ଚର୍ଚ୍ଚାର ବିଷୟ ହୋଇଛି। କେହି ତାଙ୍କୁ ଦେଶ ଛାଡ଼ିବାକୁ ଦାବି କରୁଥିବା ବେଳେ, ଅନ୍ୟମାନେ ତାଙ୍କ ପରିବାର ଓ ଧର୍ମାନ୍ତରଣକୁ ଆଧାର କରି ତାଙ୍କ ପାଇଁ ସମର୍ଥନ ଜଣାଇଛନ୍ତି। ଏକ୍ସରେ ଜଣେ ବ୍ୟବହାରକାରୀ ଲେଖିଛନ୍ତି ଯେ, “ସୀମା ଅବୈଧ ଭାବେ ଭାରତକୁ ଆସିଥିଲେ, ତାଙ୍କୁ ତୁରନ୍ତ ଦେଶରୁ କଢାଯାଉ।” ଅନ୍ୟପଟେ, ସୀମାଙ୍କ ଓକିଲ ଦାବି କରିଛନ୍ତି ଯେ ତାଙ୍କ ଜୀବନକୁ ବିପଦ ରହିଛି, ତେଣୁ ସେ ସ୍ଥାନିୟ ପ୍ରଶାସନକୁ ତାଙ୍କ ସୁରକ୍ଷା ବ୍ୟବସ୍ଥା ବଢ଼ାଇବା ପାଇଁ ନିବେଦନ କରିଛନ୍ତି।
ସୀମାଙ୍କ ମାମଲା ଏବେ ଉତ୍ତରପ୍ରଦେଶ ସରକାର ଓ କେନ୍ଦ୍ର ସରକାରଙ୍କ ନିଷ୍ପତ୍ତି ଉପରେ ନିର୍ଭର କରୁଛି। ଦିଲ୍ଲୀ ଉଚ୍ଚ ନ୍ୟାୟାଳୟର ଓକିଲ ଆବୁ ବକର ସବ୍ବାକ କହିଛନ୍ତି ଯେ ସୀମାଙ୍କ ବିବାହ ଓ ସନ୍ତାନ ହେତୁ ତାଙ୍କ ମାମଲା ଭିନ୍ନ ଅଟେ। ତେଣୁ ଏହା ଉପରେ ବିଶେଷ ବିଚାର ହେବାର ଆବଶ୍ୟକତା ରହିଛି। ତେବେ ପହଲଗାମ ଘଟଣା ବର୍ତ୍ତମାନ ଭାରତ-ପାକିସ୍ତାନ ସମ୍ପର୍କରେ ଚାପ ସୃଷ୍ଟି କରିଥିବା ବେଳେ, ସୀମା ହୈଦରଙ୍କ ଭାଗ୍ୟ ଏବେ ସରକାରୀ ନୀତି ଓ ଆଇନଗତ ପ୍ରକ୍ରିୟା ଉପରେ ନିର୍ଭର କରୁଛି।
