ନୂଆଦିଲ୍ଲୀ,୧୦/୧୧: ନିର୍ବାଚନ ପୂର୍ବରୁ ଆରମ୍ଭ ହୋଇଛି ଦଳ ଡିଆଁ ପର୍ବ । ଦିଲ୍ଲୀ କଂଗ୍ରେସକୁ ଲାଗିଛି ବଡ ଝଟକା । ଆସନ୍ତାବର୍ଷ ଦିଲ୍ଲୀ ବିଧାନସଭା ନିର୍ବାଚନ ଅନୁଷ୍ଠିତ ହେବ । ଏହା ପୂର୍ବରୁ ଦଳର ବରିଷ୍ଠ ନେତା ତଥା ୫ଥରର ବିଧାୟକ ମତିନ ଅହମଦ ଆମ ଆଦମୀ ଦଳରେ ଯୋଗ ଦେଇଛନ୍ତି । ଆଜି ଦିଲ୍ଲୀରେ ଆୟୋଜିତ ଆପର ମିଶ୍ରଣ ପର୍ବରେ କେଜ୍ରିୱାଲଙ୍କ ଉପସ୍ଥିତିରେ ସେ ଦଳରେ ସାମିଲ ହୋଇଛନ୍ତି ।
୫ଥର ବିଧାୟକ ରହିଛନ୍ତି ମତିନ ଅହମଦ । ପୂର୍ବରୁ ମତିନଙ୍କ ପୁଅ ବୋହୂ କଂଗ୍ରେସ ଛାଡି ଆପରେ ମିଶି ସାରିଛନ୍ତି । ମତିନ ଅହମଦ ସିଲମପୁର ଆସନରୁ କଂଗ୍ରେସର ୫ ଥର ବିଧାୟକ ପଦରେ ରହିଛନ୍ତି । ୧୯୯୩ରୁ ନେଇ ୨୦୧୩ ଯାଏ ଲଗାତାର ନିର୍ବାଚନ ଜିତି ବିଧାୟକ ହୋଇଛନ୍ତି । ତାଙ୍କ ପୁଅ ଚୌଧୁରୀ ଜୁବେର ଏବଂ ବୋହୂ ଅକ୍ଟୋବର ୨୯ ତାରିଖରେ ଆମ ଆଦମୀ ପାର୍ଟିରେ ଯୋଗ ଦେଇଥିଲେ ।
ମତିନ ଅହମଦ ୨ ଥର ଦିଲ୍ଲୀ ୱାକଫ ବୋର୍ଡର ଚେୟାରମ୍ୟାନ ରହିଛନ୍ତି । ୨୦୦୪ ଓ ୨୦୦୯ରେ ସେ ୱାକଫ ବୋର୍ଡର ଅଧ୍ୟକ୍ଷ ଭାର ସମ୍ଭାଳିଥିଲେ । ଏହା ସହିତ ଦିଲ୍ଲୀରେ କଂଗ୍ରେସ ସରକାରରେ ସେ ଜଳ ବୋର୍ଡ ଉପାଧ୍ୟକ୍ଷ ଭାର ସମ୍ଭାଳିଥିଲେ । ମତିନ ଅହମଦଙ୍କର ସିଲମପୁର ଅଞ୍ଚଳରେ ଲୋକପ୍ରିୟତା ରହିଛି । ୨୦୧୫ ଓ ୨୦୧୦ରେ ଏଠାରେ ଆପ ବିଜୟୀ ହୋଇଥିଲା । ମାତ୍ର ଏଥର ଲଢେଇ ଅଧିକ ଜୋରଦାର ହେବ ବୋଲି ଅନୁମାନ କରାଯାଉଛି । ନିର୍ବାଚନ ପୂର୍ବରୁ ମତିନ ଅହମଦଙ୍କ ଆପରେ ସାମିଲ ହେବା ସିଲମପୁରରେ ଆପକୁ ଅଧିକ ଶକ୍ତିଶାଳୀ କରିଥିବା କୁହାଯାଉଛି । ଏବେ ଦେଖିବାକୁ ରହିଲା କଂଗ୍ରେସ ଏହିଠାରୁ କାହାକୁ ପ୍ରାର୍ଥୀ କରୁଛି ।
