ନୂଆଦିଲ୍ଲ,୦୧/୧୦: ସୁପରମାର୍କେଟ୍ ଭିତରେ ଆଖିବୁଜା ଛରାମାଡ଼ କଳେ ଦୁର୍ବୃତ୍ତ। ଫଳରେ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ୧୫ ଜଣ ଆହତ ହୋଇଛନ୍ତି। ଚୀନ୍ର ଶାଂଘାଇରୁ ଏଭଳି କିଛି ଘଟଣା ସାମ୍ନାକୁ ଆସିଛି। ତେବେ ଗତକାଲି ରାତିରେ ଚୀନ୍ରେ ଆଜିଠାରୁ ଏକ ସପ୍ତାହ ଛୁଟି ସହ ୭୫ତମ ଜାତୀୟ ଦିବସ ପାଳନ କରିବା ନେଇ ପ୍ରସ୍ତୁତ ଚାଲିଥିବା ବେଳେ ଏହି ଘଟଣା ଘଟିଥିଲା। ଶାଂଘାଇରେ ଥିବା ଏକ ସୁପରମାର୍କେଟ ଓ୍ୱଲ୍ମାର୍ଟ ଭିତରକୁ ଜଣେ ଦୁର୍ବୃତ୍ତ ଛୁରୀ ଧରି ପଶିଥିଲେ। ଏହାପରେ ଲୋକଙ୍କ ଉପରକୁ ସେ ଅଖିବୁଜା ଛୁରାମାଡ଼ କରିଥିଲେ।ଯେଉଁଥିରେ ୩ ଜଣଙ୍କ ପ୍ରାଣ ଯାଇଥିଲା । ସେହିପରି ସମସ୍ତ ଆହତଙ୍କୁ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରାଯାଇଛି।
ସେପଟେ ପୋଲିସକୁ ଏନେଇ ସୂଚନା ମିଳିବା ପରେ ଘଟଣାସ୍ଥଳରେ ପହଞ୍ଚି ଅଭିଯୁକ୍ତଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଜଣକ ହେଲେ ୩୭ ବର୍ଷୀୟ ଲିନ୍। ପୋଲିସ କହିବା ମୁତାବକ,ଆକ୍ରମଣକାରୀ ଲିନଙ୍କ ବ୍ୟକ୍ତିଗତ ଆର୍ଥିକ ବିବାଦ ଲାଗି ରହିଥିଲା। ଏହାକୁ ନେଇ ସେ ସଂଘର୍ଷ କରୁଥିଲେ। ନିଜର କ୍ରୋଧକୁ ବାହାର କରିବା ପାଇଁ ସେ ଶାଂଘାଇ ଯାଇଥିଲେ। ତେବେ ଲିନ କେଉଁଠିକାର ସେ ନେଇଁ ପୁଲିସ ସୂଚନା ଦେଇନାହିଁ। ତେବେ ଗତ କିଛି ବର୍ଷ ମଧ୍ୟରେ ଚୀନ୍ରେ ସର୍ବସାଧାରଣ ସ୍ଥାନରେ ଛୁରାମାଡ଼ ଘଟଣା ବୃଦ୍ଧି ପାଇବାରେ ଲାଗିଛି। ଏହି ଆକ୍ରମଣକାରୀଙ୍କ ମଧ୍ୟରୁ ଅନେକ ମାନସିକ ବିକାରଗ୍ରସ୍ତ। ସେହିପରି ମେ' ମାସରେ ଚାଇନାର ୟୂନାନ ପ୍ରଦେଶର ଏକ ହସ୍ପିଟାଲରେ ଛୁରୀ ଆକ୍ରମଣରେ ଦୁଇ ଜଣଙ୍କର ମୃତ୍ୟୁ ଘଟିଥିଲା।
