କୋଣାର୍କ,୧୮/୦୧: ଆଜି ବିଶ୍ୱ ଐତିହ୍ୟ କୋଣାର୍କ ସୂର୍ଯ୍ୟମନ୍ଦିର ପରିଦର୍ଶନରେ ସିଙ୍ଗାପୁର ରାଷ୍ଟ୍ରପତି ଥର୍ମନ ଶନ୍ମୁଗରତ୍ନମ୍ ଯିବେ । ଏହାକୁ ଦୃଷ୍ଟିରେ ରଖି କୋଣାର୍କରେ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଛି। କୋଣାର୍କ ସୂର୍ଯ୍ୟମନ୍ଦିର, ବ୍ୟାଖ୍ୟାନ କେନ୍ଦ୍ର ପରିସର ପୁଲିସ୍ ସୁରକ୍ଷା ବଳୟରେ ରହିବ।
ଶନିବାର କୋଣାର୍କରେ ଯାନବାହାନ ପାର୍କିଂ, ଟ୍ରାଫିକ୍ ବ୍ୟବସ୍ଥାକୁ ଗୁରୁତ୍ୱ ଦିଆଯାଇଛି । ସକାଳେ ୪ଘଣ୍ଟା ପାଇଁ ସୂର୍ଯ୍ୟମନ୍ଦିରକୁ ପର୍ଯ୍ୟଟକଙ୍କ ପାଇଁ କଟକଣା ଲାଗୁ କରାଯାଇଛି । ସକାଳ ୮ଟାରୁ କୋଣାର୍କକୁ ପ୍ରବେଶ କରୁଥିବା ସମସ୍ତ ଯାନବାହାନ ହେଲିପ୍ୟାଡ୍ରେ ପାର୍କିଂ ପାଇଁ ନିର୍ଦ୍ଦେଶ ଦିଆଯାଇଛି । ରାସ୍ତା ପାଶ୍ୱର୍ରେ ଯାନବାହାନ ପାର୍କିଂ ବାରଣ କରାଯାଇଛି । ଜଣେ ଅତିରିକ୍ତ ଏସ୍ପି, ୨ଜଣ ଡିଏସ୍ପି, ୧୧ଜଣ ଆଇଆଇସି, ଏସ୍ଆଇ ଓ ଏଏସ୍ଆଇ ୨୬ଜଣ, ସ୍ପେଶାଲ ଟେକ୍ନିକାଲ୍ ୟୁନିଟ୍, ୬ପ୍ଲାଟୁନ ଫୋର୍ସ କୋଣାର୍କ ପାଇଁ ନିୟୋଜିତ ଅଛନ୍ତି । ସୂର୍ଯ୍ୟମନ୍ଦିର ସମ୍ମୁଖ ରାସ୍ତାରେ ହସ୍ତଶିଳ୍ପ ଦୋକାନଗୁଡ଼ିକ କପଡ଼ାରେ ଢାଙ୍କି ଦିଆଯାଇଛି । ସମୀକ୍ଷା ବେଳେ ଅନ୍ୟମାନଙ୍କ ମଧ୍ୟରେ ଅତିରିକ୍ତ ଏସ୍ପି ବିଷ୍ଣୁ ପ୍ରସାଦ ପତି, ନିମାପଡ଼ା ଏସ୍ଡିପିଓ ପ୍ରଭାତ କୁମାର ମଲ୍ଲିକ, କୋଣାର୍କ ଥାନା ଆଇଆଇସି ପୂର୍ଣ୍ଣଚନ୍ଦ୍ର ସେଠୀ ପ୍ରମୁଖ ଉପସ୍ଥିତ ଥିଲେ ।
ଶୁକ୍ରବାର ଅପରାହ୍ଣରେ ପୁଲିସ୍ ଆଇଜି ଅନୁପ କୁମାର ସାହୁ, ଡିଆଇଜି ଅଖିଳେଶ୍ୱର ସିଂ, ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ୱାଇଁ, ଏସ୍ପି ବିନୀତ ଅଗ୍ରୱାଲ କୋଣାର୍କରେ ସୁରକ୍ଷା ବ୍ୟବସ୍ଥା ସମୀକ୍ଷା କରିଥିଲେ।
