ନୂଆଦିଲ୍ଲୀ, ୩୧।୩: ଦେଶରେ ବର୍ତ୍ତମାନ LPG ସିଲିଣ୍ଡରକୁ ନେଇ ଖାଉଟିଙ୍କ ମଧ୍ୟରେ ଏକ ପ୍ରକାର ଆତଙ୍କ ଦେଖାଦେଇଛି । ଯଦିଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସରକାର ବାରମ୍ବାର ସ୍ପଷ୍ଟ କରିଛନ୍ତି ଯେ ଦେଶରେ ଗ୍ୟାସର କୌଣସି ଅଭାବ ନାହିଁ, ତଥାପି ଯୁଦ୍ଧ ପରିସ୍ଥିତି ଲମ୍ବା ସମୟ ଧରି ଚାଲିଲେ ସିଲିଣ୍ଡର ମିଳିବ ନାହିଁ ବୋଲି ଲୋକଙ୍କ ମନରେ ଭୟ ରହିଛି । ଏହି କାରଣରୁ ଅନେକ ସ୍ଥାନରେ ଲୋକେ ଯେଉଁଠୁ ପାରୁଛନ୍ତି ସେଠାରୁ ସିଲିଣ୍ଡର କିଣି ମହଜୁଦ ରଖୁଛନ୍ତି । ତେବେ ଏଭଳି ସମୟରେ କେବଳ ପଞ୍ଜୀକୃତ ଗ୍ୟାସ୍ ଏଜେନ୍ସିରୁ ହିଁ ସିଲିଣ୍ଡର କିଣିବାକୁ ପରାମର୍ଶ ଦିଆଯାଇଛି ।

ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ସିଲିଣ୍ଡର ନେବା ସମୟରେ ଏହାର ଲିକେଜ୍ ପ୍ରତି ବିଶେଷ ଧ୍ୟାନ ଦେବା ଉଚିତ୍ । ଅନେକ ସମୟରେ ଡେଲିଭରି ବେଳେ ସବୁ ଠିକ୍ ଥାଏ, କିନ୍ତୁ ପରବର୍ତ୍ତୀ ସମୟରେ ହଠାତ୍ ଗ୍ୟାସ୍ ଲିକ୍ ହେବା ଫଳରେ ବଡ଼ ଧରଣର ଦୁର୍ଘଟଣା ଘଟିଥାଏ । ଏହି ବିପଦରୁ ରକ୍ଷା ପାଇବା ପାଇଁ ବଜାରରେ କିଛି ସ୍ମାର୍ଟ ଗ୍ୟାଜେଟ୍ସ ଉପଲବ୍ଧ ଅଛି, ଯାହା ଆପଣଙ୍କ ଘରକୁ ସୁରକ୍ଷିତ ରଖିପାରିବ ।

ଏହା ବି ପଢ଼ନ୍ତୁ... ବଜାରରେ ଯୁଦ୍ଧ ତାଣ୍ଡବ: ପ୍ରଥମ ଥର ଟଙ୍କା ୯୫ ପାର୍ , ତେଜିବ ଦରଦାମ, ଆମ୍ ଆଦ୍‌ମୀଙ୍କୁ ଝଟ୍‌କା

୧. ସ୍ମାର୍ଟ ରେଗୁଲେଟର

ଏହି ରେଗୁଲେଟର ସାଧାରଣ ରେଗୁଲେଟରଠାରୁ ସମ୍ପୂର୍ଣ୍ଣ ଭିନ୍ନ । ଏଥିରେ ଅଟୋ-କଟ୍ ଅଫ୍ ଫିଚର ରହିଛି । ଯଦି କୌଣସି କାରଣରୁ ପାଇପ୍ ଫାଟିଯାଏ ବା ଗ୍ୟାସ୍ ଲିକ୍ ହୁଏ, ତେବେ ଏହି ଡିଭାଇସ୍ ତୁରନ୍ତ ଗ୍ୟାସ୍ ସପ୍ଲାଇ ବନ୍ଦ କରିଦିଏ । ଏଥିସହିତ ଏଥିରେ ଏକ ଗ୍ୟାସ୍ ଇଣ୍ଡିକେଟର ମଧ୍ୟ ଥାଏ, ଯାହା ସିଲିଣ୍ଡରରେ କେତେ ଗ୍ୟାସ୍ ବାକି ଅଛି ତାହା ସୂଚାଇଥାଏ । ଆପଣ ଏହାକୁ ଆମାଜନ୍ କିମ୍ବା ଫ୍ଲିପକାର୍ଟରୁ ସହଜରେ କିଣିପାରିବେ ।

୨. ସ୍ମାର୍ଟ ଗ୍ୟାସ୍ ସେନ୍ସର

ଏହା ଏକ ଅତ୍ୟାଧୁନିକ ଟେକ୍ନୋଲୋଜି ସମ୍ପନ୍ନ ଡିଭାଇସ୍ । ଏହା ୨୪ ଘଣ୍ଟା ଆପଣଙ୍କ ରୋଷେଇ ଘର ଉପରେ ନଜର ରଖିଥାଏ । ଯଦି ସାମାନ୍ୟ ଗ୍ୟାସ୍ ଲିକ୍ ହୁଏ, ତେବେ ଏଥିରେ ଥିବା ଆଲାରାମ ଜୋରରେ ବାଜିବାକୁ ଲାଗେ । ଏହାର ସବୁଠାରୁ ବଡ଼ ବିଶେଷତ୍ୱ ହେଉଛି, ଏହା ଆପଣଙ୍କ ମୋବାଇଲ୍ ଫୋନ୍ ସହ କନେକ୍ଟ ହୋଇପାରିବ । ଯଦି କୌଣସି ଗ୍ୟାସ୍ର ସମସ୍ୟା ଦେଖାଦିଏ, ଏହା ଆପଣଙ୍କ ଫୋନ୍କୁ ରିଅଲ୍ ଟାଇମ୍ ଆଲର୍ଟ ପଠାଇଥାଏ, ଯାହା ଦ୍ୱାରା ଆପଣ ଘରୁ ବାହାରେ ଥିଲେ ମଧ୍ୟ ସତର୍କ ହୋଇପାରିବେ ।

୩. ଗ୍ୟାସ୍ ଡିଟେକ୍ଟର

ଏହି ଡିଭାଇସ୍ କେବଳ LPG ନୁହେଁ, ବରଂ PNG ଏବଂ CNG ଉପରେ ମଧ୍ୟ କାମ କରିଥାଏ । ଏହାକୁ ବ୍ୟବହାର କରିବା ଅତି ସହଜ । କେବଳ ଘରର ଏକ ଇଲେକ୍ଟ୍ରିକ ସକେଟରେ ଏହାକୁ ଲଗାଇବାକୁ ପଡ଼ିଥାଏ । ଗ୍ୟାସ୍ ଲିକ୍ ହେବା ମାତ୍ରେ ଏହା ଏକ ତୀବ୍ର ଶବ୍ଦ କରି ଆପଣଙ୍କୁ ସଚେତନ କରିଦିଏ । ଏହା ମଧ୍ୟ ଅନଲାଇନ୍ ସପିଂ ସାଇଟ୍ରେ ଉପଲବ୍ଧ । ନିଜ ପରିବାରର ସୁରକ୍ଷା ପାଇଁ ଏହି ତିନୋଟି ମଧ୍ୟରୁ ଯେକୌଣସି ଏକ ଡିଭାଇସ୍ ନିଶ୍ଚିତ ଭାବେ ବ୍ୟବହାର କରନ୍ତୁ । ଏସବୁ ଡିଭାଇସ୍ର ବ୍ୟବହାର ପରେ ବି ଗ୍ୟାସ୍ ବ୍ୟବହାର ସମୟରେ ସତର୍କ ରୁହନ୍ତୁ । ଏଥିସହିତ ସିଲିଣ୍ଡର ଡେଲିଭରି ନେବା ବେଳେ ସାବୁନ ପାଣି ଜରିଆରେ ଲିକେଜ୍ ଯାଞ୍ଚ କରିବାକୁ ଭୁଲନ୍ତୁ ନାହିଁ ।