ଭୁବନେଶ୍ୱର,୦୭/୦୩: ୧୫ ଏକର ଜମିରେ ଫାର୍ମ ହାଉସ୍ । ଚନ୍ଦ୍ରଶେଖରପୁରରେ ୩ ମହଲା ଘର, ରଘୁନାଥପୁରରେ ଫ୍ଲାଟ୍ କିଣିବା ପାଇଁ ୧ କୋଟି ଅଗ୍ରୀମ ଦେଇଛନ୍ତି । ଖୋର୍ଦ୍ଧାରେ ୫ ମହଲା ଓ ପୁରୀରେ ୩ ମହଲା କୋଠା ତିଆରି ଚାଲିଛି । ଖୋର୍ଦ୍ଧା, ଭୁବନେଶ୍ୱର ଓ ନୟାଗଡ଼ରେ ୧୧ଟି ପ୍ଲଟ୍ ବି ରହିଛି । ଘରୁ ମିଳିଲା ୨.୧ କେଜି ସୁନା । ଖଟ ତଳେ ୧୭.୫୫ ଲକ୍ଷ ଟଙ୍କା ନଗଦ ବି ରଖିଥିଲେ । ସେହେଲେ ଏସ୍ଟିଏର ଜଏଣ୍ଟ କମିଶନର (ରୋଡ୍ ସେଫ୍ଟି) ପ୍ରଦୀପ କୁମାର ମହାନ୍ତି । ତାଙ୍କୁ ଗିରଫ କରିଛନ୍ତି ଭିଜିଲାନ୍ସ ଅଧିକାରୀ ।
ପ୍ରଦୀପଙ୍କ କଳାଧନ ବିଷୟରେ କିଛି ଲୋକ ଭିଜିଲାନ୍ସ ନିକଟରେ ପିଟିସନ୍ ପକାଇଥିଲେ । ଭିଜିଲାନ୍ସ ଜାଣିବାକୁ ପାଇଥିଲା ପ୍ରଦୀପ କୋଟି କୋଟି ଟଙ୍କାର ସମ୍ପତ୍ତି ଠୁଳ କରିଛନ୍ତି । କୋର୍ଟଙ୍କ ଅନୁମତି ପରେ ମାର୍ଚ୍ଚ ୬ ତାରିଖ (ଗୁରୁବାର) ତାଙ୍କ ଚନ୍ଦ୍ରଶେଖରପୁର ମୈତ୍ରୀବିହାର ଘର, କଟକ ଅଫିସ୍, ରଣପୁର କୁସୁପଲ୍ଳାରେ ଫାର୍ମ ହାଉସ୍, ସମ୍ପର୍କୀୟଙ୍କ ପେଟ୍ରୋଲ୍ ପମ୍ପ୍, ଟାଙ୍ଗୀରେ ଥିବା ପୈତୃକ ଘର ସହ ମୋଟ ୯ଟି ଜାଗାରେ ଚଢ଼ଉ କରିଥିଲା ଭିଜିଲାନ୍ସ । ଠାବ ସମ୍ପତ୍ତିର ମୂଲ୍ୟ ୧୦ କୋଟିରୁ ବେଶୀ ହେବ ବୋଲି ଭିଜିଲାନ୍ସ ଆକଳନ କରିଛି । ସମ୍ପତ୍ତି ମଧ୍ୟରେ ରହିଛି, ଭୁବନେଶ୍ୱର ମୈତ୍ରୀବିହାରରେ ୨୪ଶହ ବର୍ଗଫୁଟ୍ରେ ୩ ମହଲା ଘର । ରଘୁନାଥପୁରରେ ଏକ ୪ ବିଏଚ୍କେ ଫ୍ଲାଟ୍ କିଣିବା ୧ କୋଟି ଟଙ୍କା ଅଗ୍ରୀମ ଦେଇଛନ୍ତି । ପୁରୀ ବାଲୁଖଣ୍ଡରେ ତିଆରି ତାଲିଛି ୩ ମହଲା ଘର । ଯାହାର ଆକାର ୭୫୦୦ ବର୍ଗଫୁଟ୍ର ବୋଲି ଭିଜିଲାନ୍ସ କହିଛି । ପୁରୀରେ ୨ଟି ବେନାମୀ ଫ୍ଲାଟ୍ । ୧୪ ଏକର ୭୮ ଡିସ୍ମିଲ୍ରେ ଫାର୍ମ ହାଉସ୍, ଭୁବନେଶ୍ୱର, ଖୋର୍ଦ୍ଧା, ରଣପୁର, ନୟାଗଡ଼ରେ ୧୧ଟି ଦାମୀ ପ୍ଲଟ୍ ଠାବ ହୋଇଛି ।
ତା’ଛଡ଼ା ତାଙ୍କ ଘର ଖଟ ତଳୁ ୧୭ ଲକ୍ଷ ୫୫ ହଜାର ଟଙ୍କା ମିଳିଛି । ଉକ୍ତ ଟଙ୍କାରେ ୨୬ଟି ୨ହଜାର ଟଙ୍କିଆ ନୋଟ୍ ରହିଛି । ଘରୁ ମୋଟ ୨.୧ କେଜି ସୁନା ଅଳଙ୍କାର ମିଳିଛି । ସେଥି ମଧ୍ୟରେ ୩ଟି ସୁନା ବିସ୍କୁଟ ରହିଛି । ପ୍ରତି ସୁନା ବିସ୍କୁଟ୍ର ଓଜନ ୧୦୦ ଗ୍ରାମ୍ ବୋଲି ଭିଜିଲାନ୍ସ କହିଛି । ୨ଟି ବେନାମୀ କାର, ୧ଟି ବାଇକ୍ ଓ ୧୭ ଲକ୍ଷ ଟଙ୍କାର ଦାମୀ ଗୃହ ଉପକରଣ ମିଳିଛି । ପ୍ରଦୀପଙ୍କ ବିଦେଶ ବୁଲା ଖର୍ଚ୍ଚ ଆକଳନ ଚାଲିଛି । ୯ଟି ଟିମ୍ ଚଢ଼ଉ କରିଥିଲା । ଏହି ଚଢ଼ଉରେ ୨ଜଣ ଏଏସ୍ପି, ୧୩ ଡିଏସ୍ପି, ୧୨ ଇନ୍ସପେକ୍ଟର, ୨୫ ଏସ୍ଆଇ ଓ ଅନ୍ୟ କର୍ମଚାରୀମାନେ ସାମିଲ ଥିଲେ ।
ପ୍ରଦୀପ ୧୯୯୦ ନଭେମ୍ବରରେ ଜୁନିଅର ଏମ୍ଭିଆଇ ଭାବେ ମୟୂରଭଞ୍ଜ ଜିଲ୍ଳାରେ ଚାକିରି ଆରମ୍ଭ କରିଥିଲେ । ୨୦୦୦ ଡିସେମ୍ବର ମାସରେ ଏମ୍ଭିଆଇ ହୋଇଥିଲେ । ୨୦୦୩ ପର୍ଯ୍ୟନ୍ତ ଏମ୍ଭିଆଇ କମ୍ ଏଆରଟିଓ ଭାବେ ବାରିପଦାରେ କାମ କରିଥିଲେ । ୨୦୦୬ରେ ଜଗତସିଂହପୁରରେ ଆର୍ଟିଓ ଥିଲେ । ୨୦୦୬ରୁ୨୦୨୨ ପର୍ଯ୍ୟନ୍ତ ବିଭିନ୍ନ ଜିଲ୍ଳାରେ ଆରଟିଓ ଏବଂ ଏମ୍ଭିଆଇ ଥିଲେ । ୨୦୨୨ରେ ଭୁବନେଶ୍ୱର ଆରଟିଓ-୧ ଥିଲେ । ୨୦୨୨ ଜୁଲାଇରୁ ୨୦୨୩ ଜୁଲାଇ ପର୍ଯ୍ୟନ୍ତ ଡେପୁଟି କମିଶନର (ସାଉଥ ଜୋନ୍) ଭାବେ ଗଞ୍ଜାମ ଛତ୍ରପୁରରେ କାମ କରୁଥିଲେ । ଜୁଲାଇ ୨୦୨୩ ଠାରୁ କଟକ ଏସ୍ଟିଏ ମୁଖ୍ୟାଳୟରେ ଯୁଗ୍ମ କମିଶନର (ରୋଡ୍ ସେଫ୍ଟି) ଭାବେ କାମ କରୁଥିଲେ । ଗୁରୁବାର ଭୋର ସମୟରେ ଭିଜିଲାନ୍ସ ତାଙ୍କ ଘରେ ଚଢ଼ଉ କରି ଉକ୍ତ ସମ୍ପତ୍ତି ଠାବ କରିଛି ।
