ଭଞ୍ଜନଗର,୧୦/୧୨: ଚଳିତ ମାସ ୨୯ ଓ ୩୦ ତାରିଖରେ ଭଞ୍ଜନଗରରେ ହେବାକୁ ଥିବା ରାଜ୍ୟ ଆଇନଜୀବୀ ସଂଘର ରାଜ୍ୟସ୍ତରୀୟ ସମ୍ମିଳନୀରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଯୋଗ ଦେବା ଚୂଡାନ୍ତ ହୋଇଛି । ଏହି ସମ୍ମିଳନୀ ଭଞ୍ଜନଗରସ୍ଥିତ ଉପେନ୍ଦ୍ର ଭଞ୍ଜ ହାଇସ୍କୁଲ ପରିସରରେ ହେବ ।
ପ୍ରଥମ ଦିନ ମୁଖ୍ୟମନ୍ତ୍ରୀଙ୍କ ସମେତ ଉପମୁଖ୍ୟମନ୍ତ୍ରୀ କେ.ଭି. ସିଂହଦେଓ, ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଯୋଗ ଦେବେ । ନିଜ ଅଫିସ୍ ସମ୍ମିଳନୀ କକ୍ଷରେ ଉପଜିଲ୍ଲାପାଳ ଅନିଲ କୁମାର ସେଠୀଙ୍କ ଅଧ୍ୟକ୍ଷତାରେ ଏ ନେଇ ସୋମବାର ପ୍ରସ୍ତୁତି ବୈଠକ ହୋଇଥିଲା । ଅତିରିକ୍ତ ଉପଜିଲ୍ଲାପାଳ ବିଶ୍ୱରଞ୍ଜନ କର, ଭଞ୍ଜନଗର ଭାରପ୍ରାପ୍ତ ବିଡିଓ ଉମାଶଙ୍କର ବେହେରା, ଏନ୍ଏସି ନିର୍ବାହୀ ଅଧିକାରୀ ମୁରଲୀକୃଷ୍ଣ ପଣ୍ଡାଙ୍କ ସମେତ ପୂର୍ତ୍ତ, ପାନୀୟ ଜଳ ଯୋଗାଣ ବିଭାଗର ଅଧିକାରୀ, ସାବିତ୍ରୀ ମହିଳା ମହାବିଦ୍ୟାଳୟ ଓ କବି ସମ୍ରାଟ ଉପେନ୍ଦ୍ର ଭଞ୍ଜ ମହାବିଦ୍ୟାଳୟ ଅଧ୍ୟକ୍ଷ, ବିଭିନ୍ନ ଶିକ୍ଷାନୁଷ୍ଠାନର ପ୍ରଧାନ ଶିକ୍ଷକ, ଭଞ୍ଜନଗର ଓକିଲ ସଂଘ ସଭାପତି ଶୈଳେନ୍ଦ୍ର ନାରାୟଣ ସାହୁ, ସମ୍ପାଦକ ରାଜେନ୍ଦ୍ର ପ୍ରଧାନ ଉପସ୍ଥିତ ଥିଲେ । ପରେ ଉପଜିଲ୍ଲାପାଳ ସେଠୀଙ୍କ ସମେତ ବିଭାଗୀୟ ଅଧିକାରୀମାନେ କେଏସ୍ୟୁବି କଲେଜ ପଡିଆରେ ହେବାକୁ ଥିବା ହେଲିପ୍ୟାଡ୍ ସ୍ଥଳ ବୁଲି ଦେଖିଛନ୍ତି । ମୁଖ୍ୟମନ୍ତ୍ରୀଙ୍କ ଗସ୍ତ ତଥା ସମ୍ମିଳନୀର ସଫଳ ପରିଚାଳନା ପାଇଁ ରବିବାର ବନ ବିଭାଗ ଡାକ ବଙ୍ଗଳାରେ ବିଧାୟକ ପ୍ରଦ୍ୟୁମ୍ନ କୁମାର ନାୟକ ବ୍ଲକର ବିଭିନ୍ନ ନେତାମାନଙ୍କୁ ଡାକି ଆଲୋଚନା କରିଥିଲେ ।
