ନୂଆଦିଲ୍ଲୀ, ୨୩।୪: ଇରାନ ଏବଂ ଆମେରିକା ମଧ୍ୟରେ ଯଦିଓ ଏକ ସ୍ଥାୟୀ ଯୁଦ୍ଧବିରତି ପାଇଁ ଆଲୋଚନା ଚାଲିଛି । କିନ୍ତୁ ବିଶ୍ୱ ପାଇଁ ସଙ୍କଟ ଏବେ ବି ଟଳିନାହିଁ । ବିଶ୍ୱର ସବୁଠାରୁ ଗୁରୁତ୍ୱପୂର୍ଣ୍ଣ ସାମୁଦ୍ରିକ ମାର୍ଗ ହୋର୍ମୁଜ ଜଳପଥରେ ପରିସ୍ଥିତି ସ୍ୱାଭାବିକ ହେବା ପାଇଁ ଆହୁରି ଦୀର୍ଘ ସମୟ ଲାଗିବ । ଆମେରିକା ପ୍ରତିରକ୍ଷା ବିଭାଗ ‘ପେଣ୍ଟାଗନ’ ପକ୍ଷରୁ କରାଯାଇଥିବା ଏକ ଚମକାଇ ଦେଲା ଭଳି ଖୁଲାସା ଅନୁଯାୟୀ, ସମୁଦ୍ର ମଧ୍ୟରେ ବିଛାଯାଇଥିବା ବାରୁଦୀ ସୁରଙ୍ଗ ବା ‘ମାଇନ୍ସ’ଗୁଡ଼ିକୁ ହଟାଇବା ପାଇଁ ଅତି କମରେ ୬ ମାସ ସମୟ ଲାଗିବ ।
ଗୋପନୀୟ ବ୍ରିଫିଂରେ ପେଣ୍ଟାଗନର ଚେତାବନୀ:
ଆମେରିକୀୟ ଖବରକାଗଜ ‘ଦି ୱାଶିଂଟନ ପୋଷ୍ଟ’ର ରିପୋର୍ଟ ଅନୁଯାୟୀ, ମଙ୍ଗଳବାର ଦିନ ‘ହାଉସ୍ ଆର୍ମଡ ସର୍ଭିସେସ୍ କମିଟି’ର ସଦସ୍ୟମାନଙ୍କୁ ଏକ ଗୋପନୀୟ ବ୍ରିଫିଂ ଦିଆଯାଇଥିଲା । ଏହି ବ୍ରିଫିଂରେ ପେଣ୍ଟାଗନ ସ୍ପଷ୍ଟ କରିଛି ଯେ, ଫେବୃଆରୀ ୨୮ରେ ଯୁଦ୍ଧ ଆରମ୍ଭ ହେବା ପରଠାରୁ ଇରାନୀ ସେନା ହୋର୍ମୁଜ ପ୍ରଣାଳୀରେ ବ୍ୟାପକ ଭାବେ ବାରୁଦ ସୁଡ଼ଙ୍ଗ ବିଛାଇ ଦେଇଛି । ଏହି ସୁଡ଼ଙ୍ଗଗୁଡ଼ିକୁ ସମ୍ପୂର୍ଣ୍ଣ ରୂପେ ସଫା ନ କରିବା ପର୍ଯ୍ୟନ୍ତ ବାଣିଜ୍ୟିକ ଜାହାଜ ଚଳାଚଳ ସମ୍ଭବ ନୁହେଁ ।
ଶକ୍ତି ସଙ୍କଟ ଓ ମହଙ୍ଗା ହେବ ତେଲ:
ଏହି ଖୁଲାସା ପରେ ବିଶ୍ୱ ବଜାରରେ ଅଶୋଧିତ ତେଲ ଦର ବଢ଼ିବାର ଆଶଙ୍କା ଘନେଇଛି । ହୋର୍ମୁଜ ପ୍ରଣାଳୀ ବନ୍ଦ ରହିବା ଯୋଗୁଁ କେଉଁ କେଉଁ ପ୍ରଭାବ ପଡ଼ିବ ଆସନ୍ତୁ ଜାଣିବା । ବିଶ୍ୱର ପ୍ରାୟ ୨୦% କଞ୍ଚା ତେଲ ଏହି ରାସ୍ତା ଦେଇ ଯାଇଥାଏ । ଏହା ବନ୍ଦ ରହିଲେ ଦକ୍ଷିଣ ଏସିଆ ଅର୍ଥାତ୍ ଭାରତ ସମେତ, ୟୁରୋପ ଏବଂ ଆମେରିକାରେ ପେଟ୍ରୋଲ-ଡିଜେଲ ଦର ଅହେତୁକ ଭାବେ ବଢ଼ିବ । ତେଲ ଦର ବଢ଼ିଲେ ପରିବହନ ଖର୍ଚ୍ଚ ବଢ଼ିବ, ଯାହାଫଳରେ ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଦାମ୍ ଆକାଶଛୁଆଁ ହେବ । ଆମେରିକାରେ ହେବାକୁ ଥିବା ନିର୍ବାଚନ ପୂର୍ବରୁ ଇନ୍ଧନ ଦର ବୃଦ୍ଧି ଟ୍ରମ୍ପ ପ୍ରଶାସନ ପାଇଁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି ।
ସୁଡ଼ଙ୍ଗ ହଟାଇବା କାହିଁକି କଷ୍ଟକର ?
ପେଣ୍ଟାଗନ ଅନୁଯାୟୀ, ଏହି ସୁଡ଼ଙ୍ଗଗୁଡ଼ିକ ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ । ଏଗୁଡ଼ିକ ଜଳଭିତରେ ସ୍ଥିର ନରହି ନିଜର ସ୍ଥାନ ପରିବର୍ତ୍ତନ କରିପାରୁଛନ୍ତି । "ସବୁଠାରୁ ବଡ଼ ଚ୍ୟାଲେଞ୍ଜ ହେଉଛି, ଯେପର୍ଯ୍ୟନ୍ତ ଆମେରିକା ଏବଂ ଇରାନ ମଧ୍ୟରେ ସଂଘର୍ଷ ସମ୍ପୂର୍ଣ୍ଣ ରୂପେ ଶେଷ ହୋଇନାହିଁ, ସେପର୍ଯ୍ୟନ୍ତ ‘ମାଇନ୍-ସ୍ୱିପିଂ’ ଅର୍ଥାତ୍ ସୁଡ଼ଙ୍ଗ ହଟାଇବା ଅଭିଯାନ ଆରମ୍ଭ କରିବା ସମ୍ଭବ ନୁହେଁ । କାରଣ ସଫା କରିବା ସମୟରେ ଇରାନର ତଟବର୍ତ୍ତୀ ମିସାଇଲ୍ ଆକ୍ରମଣର ଭୟ ରହିଛି ।" ହୋର୍ମୁଜ ଜଳପଥ ଇରାନ ଏବଂ ଓମାନ ମଧ୍ୟରେ ଥିବା ଏକ ସଂକୀର୍ଣ୍ଣ ସାମୁଦ୍ରିକ ପଥ । ଏହା ପର୍ସିଆନ ଗଲ୍ଫକୁ ଓମାନ ଉପସାଗର ଏବଂ ଆରବ ସାଗର ସହ ଯୋଡ଼ିଥାଏ । ସମୁଦ୍ରର ଏହି ଚୋକ୍ ପଏଣ୍ଟ ବନ୍ଦ ହେଲେ ବିଶ୍ୱର ଶକ୍ତି ଯୋଗାଣ ବ୍ୟବସ୍ଥା ଅଚଳ ହୋଇଯାଏ । ବର୍ତ୍ତମାନ ଇରାନ କେବଳ କିଛି ନିର୍ଦ୍ଦିଷ୍ଟ ଜାହାଜକୁ ଏକ ସ୍ୱତନ୍ତ୍ର ଚ୍ୟାନେଲ ଦେଇ ଯିବାକୁ ଅନୁମତି ଦେଉଛି, କିନ୍ତୁ ଏହା ବିଶ୍ୱର ଚାହିଦା ପୂରଣ କରିବା ପାଇଁ ଯଥେଷ୍ଟ ନୁହେଁ । ୬ ମାସ ପର୍ଯ୍ୟନ୍ତ ଯଦି ଏହି ସ୍ଥିତି ଜାରି ରହେ, ତେବେ ୨୦୨୬ ବର୍ଷର ଶେଷ ଭାଗ ସାରା ବିଶ୍ୱ ପାଇଁ ଆର୍ଥିକ ଦୃଷ୍ଟିକୋଣରୁ ଅତ୍ୟନ୍ତ କଷ୍ଟକର ହେବ ।
ଆହୁରି ପଢ଼ନ୍ତୁ... ଅଧା ବାଟରେ ନୌସେନାର ହାତ ଛାଡ଼ିଲେ ସଚିବ ! ଟ୍ରମ୍ପ ପ୍ରଶାସନରେ ଜାରି ରହିଛି ବରଖାସ୍ତ ଓ ଇସ୍ତଫାର ‘ସୁନାମି’
