ନୂଆଦିଲ୍ଲୀ,୧।୫: ପହଲଗାମ୍ ଆତଙ୍କୀ ହମଲା ସମ୍ପର୍କିତ ଜନସ୍ବାର୍ଥ ମାମଲା ଉପରେ ଶୁଣାଣି କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ମାମଲାର ଯାଞ୍ଚ ଅବସରପ୍ରାପ୍ତ ବିଚାରପତିଙ୍କ ତତ୍ତ୍ବାବଧାନରେ କରିବାର ଆବେଦନ ଉପରେ ସୁପ୍ରିମକୋର୍ଟ ଆବେଦନକାରୀଙ୍କୁ କଡା ଭର୍ତ୍ସନା କରି ଦାବି ଖାରଜ କରିଦେଇଛନ୍ତି। କୋର୍ଟ କହିଛନ୍ତି, ବର୍ତ୍ତମାନ ଆବେଦନ ଦାଖଲ କରିବାର ସମୟ ନୁହେଁ। ଜଷ୍ଟିସ୍ ସୂର୍ଯ୍ୟକାନ୍ତ ଓ ଜଷ୍ଟିସ୍ ଏନ୍ କୋଟେଶ୍ବର ସିଂହଙ୍କ ଖଣ୍ଡପୀଠ କହିଛନ୍ତି ଏଭଳି ଆବେଦନ ଦ୍ବାରା ସୁରକ୍ଷା ବଳର ମନୋବଳ ହ୍ରାସ ନକରନ୍ତୁ।
କୋର୍ଟ ଆବେଦନକାରୀ ଫତେଶ ସାହୁଙ୍କୁ କଡା ଭର୍ତ୍ସନା କରି କହିଛନ୍ତି, ଆମେ ଏଭଳି ମାମଲାର ବିଶେଷଜ୍ଞ କେବେଠୁ ହୋଇଯାଇଛୁ ? ହାଇକୋର୍ଟ କିମ୍ବା ସୁପ୍ରିମକୋର୍ଟର ବିଚାରପତି କିଭଳି ପ୍ରତିରକ୍ଷା ମାମଲାର ବିଶେଷଜ୍ଞ ହୋଇପାରନ୍ତି ? ଏଭଳି ଆବେଦନ ପାଇଁ ଏହା ଟିକେ ବି ଉଚିତ ସମୟ ନୁହେଁ। କୋର୍ଟ କହିଛନ୍ତି, ଆମର କାମ ତ ବିବାଦର ସମାଧାନ କରିବା। ଆବେଦନକାରୀ ନିଜର ଆବେଦନକୁ ଫେରାଇ ନେବା ଦରକାର।
ପେଶାରେ ଆଇନଜୀବି ଥିବା ଫତେଶ ସାହୁ କହିଛନ୍ତି, ତାଙ୍କର ଉଦେଶ୍ୟ ସୁରକ୍ଷାବଳକୁ ହତୋତ୍ସାହିତ କରିବା ପାଇଁ ନଥିଲା। ସେ ନିଜର ଆବେଦନକୁ ଫେରାଇ ନେବାକୁ ପ୍ରସ୍ତୁତ ବୋଲି କହିଛନ୍ତି। ଏହା ସହ କହିଛନ୍ତି, ଜାମ୍ମୁ-କଶ୍ମୀରରେ ପଢୁଥିବା ଛାତ୍ରଙ୍କ ସୁରକ୍ଷା ନେଇ କରିଛି। କାରଣ ଆକ୍ରମଣରେ ଦେଶର ଅନ୍ୟ ସ୍ଥାନରୁ ଆସିଥିବା ପର୍ଯ୍ୟଟକଙ୍କ ଜୀବନ ଯାଇଛି। ଏହା ଉପରେ କୋର୍ଟ ଆବେଦନକାରୀଙ୍କ ଦଲିଲ ପଢି କହିଛନ୍ତି, ଏଥିରେ ଛାତ୍ରଙ୍କ ସୁରକ୍ଷା ନେଇ କିଛି ଉଲ୍ଳେଖ ନାହିଁ। ଆବେଦନରେ କେବଳ ସୁରକ୍ଷାବଳ ଓ ପ୍ରେସକାଉନସିଲ ଅଫ୍ ଇଣ୍ଡିଆ ପାଇଁ ଗାଇଡଲାଇନ୍ ପାଇଁ ଦାବି କରାଯାଇଛି। କୋର୍ଟ କହିଛନ୍ତି, ଏଭଳି ଆବେଦନ ଦାଖଲ କରିବା ପୂର୍ବରୁ ଆପଣଙ୍କର ଦେଶ ପ୍ରତି ଦ୍ବାୟିତ୍ବ ରହିବା ଦରକାର। ଏଭଳି ଭାବରେ ଆପଣ ଆମର ମନୋବଳ କିଭଳି ଭାଙ୍ଗି ପାରିବେ ? କୋର୍ଟ ଏହା ମଧ୍ୟ କହିଛନ୍ତି ଯେ, ଫତେଶ ସାହୁଙ୍କ ବ୍ୟତୀତ ଆଉ ଜଣେ ଆବେଦନକାରୀ ଅହମ୍ମଦ ତାରିକ୍ ବଟଙ୍କ ଦ୍ବାରା କରାଯାଇଥିଲା, କିନ୍ତୁ ଏହା ଉପରେ କୌଣସି ପକ୍ଷ ଉପସ୍ଥିତ ନଥିଲେ। ତେଶୁ ଆବେଦନ ଉପରେ ଶୁଣାଣି ହୋଇନଥିଲା।
