ନୂଆଦିଲ୍ଲୀ,୦୭/୧୦: ଏବେ କ୍ରିକେଟରେ ଖେଳ ଭଳି ଆଉ କିଛି କଥା ନାହିଁ । ଏହା ସତ । ଏ ସବୁ କିଛି ବିଜନେସ ବୋଲି ସୋମବାର ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ଟିପ୍ପଣୀ ଦେଇଛନ୍ତି । ଜବଲପୁରର ଏକ କ୍ରିକେଟ ସଂଘ ସହ ଜଡ଼ିତ ବିବାଦୀୟ ମାମଲାରେ ମଧ୍ୟପ୍ରଦେଶ ହାଇକୋର୍ଟକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଏକ ପିଟିସନ ହୋଇଥିଲା । ଏହାର ଶୁଣାଣି ବେଳେ ଜଷ୍ଟିସ୍ ବିକ୍ରମ ନାଥ ଏବଂ ଜଷ୍ଟିସ୍ ସନ୍ଦୀପ ମେହତାଙ୍କ ଖଣ୍ଡପୀଠ ବିଭିନ୍ନ ପକ୍ଷର ଓକିଲକୁ କହିଥିଲେ, ଆଜି ଆମେ ଏଠାରେ କ୍ରିକେଟ ଖେଳୁଛୁ । ୩/୪ ମାମଲା ଅଛି । ଗୋଟିଏ ମାମଲା ପୂର୍ବରୁ ହିଁ ସ୍ଥଗିତ ରହିଛି । ଏହା ଦ୍ୱିତୀୟ ମାମଲା । ଆଉ ୨ ମାମଲା ବି ପଡ଼ି ରହିଛି । ଆଉ କେତେ ଟେଷ୍ଟ ମ୍ୟାଚ୍ ଖେଳିବା?
ପିଟିସନରଙ୍କ ଓକିଲ କହିଥିଲେ, ଦେଶରେ କ୍ରିକେଟ ପ୍ରତି ପ୍ରବଳ ଆଗ୍ରହ ଅଛି । ଖଣ୍ଡପୀଠ କହିଥିଲେ, ଏବେ ସମୟ ଆସିଯାଇଛି ଯେ ଅଦାଲତ କ୍ରିକେଟ ଏବଂ ଅନ୍ୟ ଖେଳ ସହ ଜଡ଼ିତ ମାମଲାରେ ହସ୍ତକ୍ଷେପ କରିବା ଉଚିତ ନୁହେଁ । ଯେଉଁଠି ଖେଳର ବ୍ୟବସାୟୀକରଣ ହେଉଛି ସେଠାରେ ଏପରି ହେବା ସ୍ୱାଭାବିକ । ପିଟିସନରଙ୍କ ଓକିଲ କହିଥିଲେ କେତେକ ଚିନ୍ତା କାରଣରୁ ମାମଲା ସୁପ୍ରିମକୋର୍ଟକୁ ଆସିଛି । କିନ୍ତୁ ଖଣ୍ଡପୀଠ କହିଥିଲେ, ଏହି ସମସ୍ତ ମାମଲାର ଫଳାଫଳ ସହ ଅନେକଙ୍କ ହିତ ଯୋଡ଼ିହୋଇ ରହିଛି । ଖେଳର ବ୍ୟବସାୟୀକରଣ ହୋଇଗଲେ ଏପରି ହୁଏ । ତେଣୁ ଏହା ଉପରେ ଅଧିକ ବିଚାର କରିବା ଲାଗି ଖଣ୍ଡପୀଠ ଅନିଚ୍ଛା ପ୍ରକାଶ କରିଥିଲେ । ପରେ ଆବେଦନକାରୀଙ୍କୁ ପିଟିସନ ପ୍ରତ୍ୟାହାର କରିନେବା ଲାଗି ଅନୁମତି ଦେଇଥିଲେ।
