କାଠମାଣ୍ଡୁ: ସୁଶୀଳା କାର୍କି ନେପାଳର ପ୍ରଥମ ମହିଳା ଅନ୍ତରୀଣ ପ୍ରଧାନମନ୍ତ୍ରୀ ହୋଇଛନ୍ତି। ରାଷ୍ଟ୍ରପତି ଭବନ ଶୀତଲ ନିବାସରେ ରାଷ୍ଟ୍ରପତି ରାମଚନ୍ଦ୍ର ପୌଡେଲ ତାଙ୍କୁ ଶପଥ ପାଠ କରାଇଛନ୍ତି । ବର୍ତ୍ତମାନ ତାଙ୍କ ସରକାରରେ ଅନ୍ୟ କୌଣସି ମନ୍ତ୍ରୀ କରାଯାଇ ନାହିଁ। ସେପଟେ ଜେନ-ଜି ପ୍ରତିବାଦକାରୀମାନେ ଏହି ସରକାରରେ ଯୋଗ ଦେବାକୁ ମନା କରିଦେଇଛନ୍ତି । ସେମାନେ କହିଛନ୍ତି ଯେ, ସେମାନେ ସରକାରରେ ଯୋଗଦେବେ ନାହିଁ, କିନ୍ତୁ ସରକାରଙ୍କ କାର୍ଯ୍ୟଧାରା ଉପରେ ନଜର ରଖିବେ। ସୁଶୀଳା କାର୍କି ନେପାଳର ପ୍ରଥମ ମହିଳା ମୁଖ୍ୟ ବିଚାରପତି ମଧ୍ୟ ରହିସାରିଛନ୍ତି। ସେ ବନାରସ ହିନ୍ଦୁ ବିଶ୍ୱବିଦ୍ୟାଳୟ (BHU)ରୁ ରାଜନୀତି ବିଜ୍ଞାନରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ଏହି କ୍ୟାବିନେଟ ଆଜି ରାତିରେ ପ୍ରଥମ ବୈଠକ କରିବ।
ନୂତନ ସମ୍ବିଧାନ ପ୍ରଣୟନ ପରେ, ସମସ୍ତ ସରକାର ଧାରା ୭୬ ଅନୁଯାୟୀ ଗଠିତ ହୋଇଥିଲା।
ସୁଶୀଳା କାର୍କିଙ୍କୁ ଧାରା ୬୧ ଅନୁଯାୟୀ ପ୍ରଧାନମନ୍ତ୍ରୀ ନିଯୁକ୍ତ କରାଯାଇଛି ।
ଧାରା ୬୧ ରେ ପ୍ରଧାନମନ୍ତ୍ରୀଙ୍କ ପଦବୀ କିମ୍ବା କ୍ଷମତା ବିଷୟରେ ସିଧାସଳଖ ଉଲ୍ଲେଖ ନାହିଁ ।
ଏଥିରେ ମୁଖ୍ୟତଃ ରାଷ୍ଟ୍ରପତିଙ୍କ କାର୍ଯ୍ୟ ଏବଂ ଦାୟିତ୍ୱ ବର୍ଣ୍ଣନା କରାଯାଇଛି ।
ରାଷ୍ଟ୍ରପତି ଧାରା ୬୧ ଅନୁଯାୟୀ ସମ୍ବିଧାନକୁ ସୁରକ୍ଷା ଦେବା ପାଇଁ କାର୍ଯ୍ୟ କରନ୍ତି।
ରାଷ୍ଟ୍ରପତି ସମାନ ଧାରା ଅନୁସାରେ ପ୍ରଧାନମନ୍ତ୍ରୀଙ୍କୁ ନିଯୁକ୍ତ କରିଛନ୍ତି ।
ବିଚାରପତି ହେବା ପରେ ସୁଶୀଳା କାର୍କି ପ୍ରଥମ ନୁହଁନ୍ତି ଯିଏ ଅନ୍ତରୀଣ ପ୍ରଧାନମନ୍ତ୍ରୀ ହୋଇଛନ୍ତି । ପ୍ରଥମ ଥର ପାଇଁ ୨୦୧୩ ମସିହାରେ ଏହା ଘଟିଥିଲା । ସେତେବେଳେ ପ୍ରଧାନ ବିଚାରପତି ଖିଲରାଜ ରେଗମୀଙ୍କ ନେତୃତ୍ୱରେ ଏକ ସରକାର ଗଠନ କରାଯାଇଥିଲା। ପ୍ରଥମ ସମ୍ବିଧାନ ସଭା ଭଙ୍ଗ ହେବା ପରେ, ଦେଶରେ ଏକ ରାଜନୈତିକ ଅଚଳାବସ୍ଥା ସୃଷ୍ଟି ହୋଇଥିଲା। ଏହାର ସମାଧାନ ପାଇଁ, ସମସ୍ତ ରାଜନୈତିକ ଦଳ ଏକ ଆପୋଷ ବୁଝାମଣାରେ ପହଞ୍ଚି ସରକାର ଗଠନର ଦାୟିତ୍ୱ ରେଗମୀଙ୍କୁ ଦେଇଥିଲେ। ତାଙ୍କ ସରକାର ନିର୍ବାଚନ କରାଇଥିଲେ ଏବଂ ଏହା ପରେ ଦ୍ୱିତୀୟ ସମ୍ବିଧାନ ସଭା ଗଠନ ହୋଇଥିଲା ।
