ଭୁବନେଶ୍ୱର ୧୦/୦୪: ସ୍ପଷ୍ଟ ହେଉନି ବିଜେଡିର ସସପେନ୍ସ । ରାଜ୍ୟସଭା ସାଂସଦ ଡ. ସସ୍ମିତ ପାତ୍ରଙ୍କ ବିଜେଡିର ସଂସଦୀୟ ଦଳ ନେତା ପଦରୁ ଇସ୍ତଫା ଦେବା ପରେ କିଏ ହେବ ନୂଆ ନେତା ସେ ନେଇ ସ୍ପଷ୍ଟ ହେବା ବଦଳରେ ଦିନକୁ ଦିନ ସସପେନ୍ସ ଆହୁରି ବଢ଼ିଚାଲିଛି । ସବୁଠି ସଂତୃପ୍ତ ମିଶ୍ର ବିଜେଡିର ନୂଆ ସଂସଦୀୟ ଦଳ ନେତା ହେବେ ବୋଲି ଚର୍ଚ୍ଚା ହେଉଥିବା ବେଳେ ଶ୍ରୀ ମିଶ୍ର କହିଛନ୍ତି ମୋର ସଂସଦୀୟ ଦଳର ନେତା ହେବା ପାଇଁ ଦକ୍ଷତା ନାହିଁ । କିଏ ଦାୟୀତ୍ୱ ନେବ ତାହା ଦଳ ସଭାପତି ନିଷ୍ପତି ନେବେ ବୋଲି କହିଛନ୍ତି ।
ଅପରପକ୍ଷେ ବିଜେଡି ସଭାପତି ନବୀନ ପଟ୍ଟନାୟକ ଗୁରୁବାର ସସ୍ମିତଙ୍କ ଇସ୍ତଫା ଗ୍ରହଣ କରିଛନ୍ତି । ତେବେ ସସ୍ମିତଙ୍କ ଇସ୍ତଫା ପରେ ଏବେ ନୂଆ ନେତା କିଏ ହେବ, ସେ ନେଇ ସଂତୃପ୍ତ ମିଶ୍ରଙ୍କ ସମେତ ସୁଲତା ଦେଓ ଓ ମାନସ ମଙ୍ଗରାଜଙ୍କ ନାମ ଚର୍ଚ୍ଚାରେ ରହିଛି । ହେଲେ ଏହି ପ୍ରସଙ୍ଗରେ ସଂତୃପ୍ତ କହିଛନ୍ତି, ଗଣମାଧ୍ୟମ ମୋ ନାମକୁ ନେଇ ଚର୍ଚ୍ଚା କରୁଛି । ମୋତେ ପଦବି ଦେବା ଉପରେ କୌଣସି ସତ୍ୟତା ନାହିଁ । ସଂସଦ ଭିତରେ ଦଳର ନେତା କିଏ ହେବେ, ତାହା ଦଳର ସଭାପତି ନିଷ୍ପତ୍ତି ନେବେ । ଜଣେ ଅଭିଜ୍ଞ ନେତାଙ୍କୁ ଏହି ଦାୟିତ୍ୱ ଦିଆଯାଇଥାଏ । ଶ୍ରୀ ପାତ୍ରଙ୍କୁ ଏହି ଦାୟିତ୍ୱ ଦିଆଯାଇଥିଲା । ସେ ନିଜ ଇଚ୍ଛାରେ ଏହି ପଦବିରୁ ଇସ୍ତଫା ଦେଇଛନ୍ତି । ସଂସଦରେ ଆମ ଦଳର ଅନ୍ୟ ସାଂସଦମାନଙ୍କର ମଧ୍ୟ ମୋଠାରୁ ଅଧିକ ଅନୁଭୂତି ରହିଛି । ମୋର ସବୁବେଳେ ଭଲ କାମ କରିବା ପାଇଁ ଇଚ୍ଛା ଅଛି । କିନ୍ତୁ କୌଣସି ପଦ ପାଇବା ପାଇଁ ମୋର ବ୍ୟଗ୍ରତା ନାହିଁ । ରାଜ୍ୟସଭା ସାଂସଦ ହେବା ପରେ ମୋର ଆହୁରି ଦାୟିତ୍ୱ ବଢ଼ିଛି । ମୋ ପାଖେ ସମୟ ନାହିଁ । କିନ୍ତୁ ଗଣମାଧ୍ୟମରେ ମୋ ନାମକୁ ନେଇ ଚର୍ଚ୍ଚା ହେଉଛି । କାଳ୍ପନିକ କଥାକୁ ଚର୍ଚ୍ଚା କରି ଗଣମାଧ୍ୟମ ସମୟ ନଷ୍ଟ କରିବା ଉଚିତ୍ ନୁହେଁ । ଓଡ଼ିଶାର ଅନେକ ସମସ୍ୟା ଅଛି । ଗଣମାଧ୍ୟଗୁଡ଼ିକରେ ଓଡ଼ିଶାର ଅସଲ ସମସ୍ୟାଗୁଡିକୁ ଲୋକଲୋଚନକୁ ଆଣିବା ଆବଶ୍ୟକ ରହିଛି ବୋଲି ଶ୍ରୀ ମିଶ୍ର କହିଛନ୍ତି ।
ଅଧିକ ପଢ଼ନ୍ତୁ :- ବଡ଼ ଭାଇଙ୍କୁ ଭେଟିବାକୁ ଦିଲ୍ଲୀ ଗଲେ ନବୀନ, ପ୍ରେମ ପଟ୍ଟନାୟକଙ୍କ ହାର୍ଟ ସର୍ଜରୀ ହୋଇଥିବା ସୂଚନା
ସେହିପରି ଚଳିତବର୍ଷ ପ୍ରତି ନିର୍ବାଚନମଣ୍ଡଳୀରେ ବିଜୁ ବାବୁଙ୍କ ଶ୍ରାଦ୍ଧବାର୍ଷିକୀକୁ ଜୋରଦାର ଭାବେ ପାଳନ କରିବ ବିଜେଡି । ଆଗକୁ ପଞ୍ଚାୟତ ନିର୍ବାଚନ ଥିବାରୁ ତା’ ପୂର୍ବରୁ ବିଜୁ ବାବୁଙ୍କ ଶ୍ରାଦ୍ଧବାର୍ଷିକୀ ବାହନାରେ ଦଳ ଶକ୍ତି ପ୍ରଦର୍ଶନ କରିବ । ଲୋକଙ୍କ ଭିତରେ ପୁଣି ବିଜୁ ବାବୁଙ୍କ ପ୍ରତି ଭଲ ପାଇବାକୁ ଜାଗ୍ରତ କରିବ । ଯଦିବା ପୂର୍ବରୁ ପ୍ରତିବର୍ଷ ବିଭିନ୍ନ ନିର୍ବାଚନମଣ୍ଡଳୀରେ ପାଳନ କରାଯାଉଥିଲା, ମାତ୍ର ଚଳିତବର୍ଷ ଏହାକୁ ବ୍ୟାପକ ଭାବେ ପାଳନ କରିବାକୁ ନିର୍ଦ୍ଦେଶ ଦିଆଯାଇଛି ବୋଲି ବିଜେଡିର ଭୋଗରାଇ ବିଧାୟକ ଗୌତମବୁଦ୍ଧ ଦାସ ସୂଚନା ଦେଇଛନ୍ତି । ସେଥିପାଇଁ ଏବେଠୁ ପ୍ରସ୍ତୁତି ଆରମ୍ଭ ହୋଇଯାଇଛି । ପ୍ରତି ପଞ୍ଚାୟତରୁ ବିଜେଡି ନେତା ଓ କର୍ମୀମାନେ ଆସି କିଭଳି ନିର୍ବାଚନମଣ୍ଡଳୀ କାର୍ଯ୍ୟକ୍ରମରେ ସାମିଲ ହେବେ, ସେ ନେଇ ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଛି । ସେହି ଅନୁସାରେ କାର୍ଯ୍ୟକାରୀ କରାଯାଉଛି ବୋଲି ଶ୍ରୀ ଦାସ କହିଛନ୍ତି ।
