ସିଡନୀ,୦୨/୦୧: ଶୁକ୍ରବାରଠୁ ସିଡନୀ କ୍ରିକେଟ୍ ଗ୍ରାଉଣ୍ଡ୍ରେ ଆରମ୍ଭ ହେବ ବର୍ଡର ଗାଭାସ୍କର ଟ୍ରଫିର ପଞ୍ଚମ ଟେଷ୍ଟ । ଉଭୟ ଦଳ ସିଡନୀରେ ପହଞ୍ଚି ସାରିଛନ୍ତି । ମେଲବର୍ଣ୍ଣ (ବକ୍ସିଂ ଡେ’ ଟେଷ୍ଟ)ରେ ଉଭୟ ଦଳ କଡ଼ା ସଂଘର୍ଷ କରିଥିଲେ । ତେଣୁ ପଞ୍ଚମ ଟେଷ୍ଟ ପୂର୍ବରୁ ଅଭ୍ୟାସ ଅପେକ୍ଷା ବିଶ୍ରାମ ଉପରେ ଉଭୟ ଦଳ ଗୁରୁତ୍ୱ ଦେଇଛନ୍ତି । ଏପଟେ ପିଚ୍ କ୍ୟୁରେଟର ଆଡାମ ଲୁଇସ ସିଡନୀ ପିଚ୍କୁ ଶେଷ ସ୍ପର୍ଶ ଦେଉଛନ୍ତି ।
କୁରେଟରଙ୍କ କହିବା ଅନୁଯାୟୀ, ବୁଧବାର ପିଚ୍ରୁ ପାଲ ହଟା ଯାଇଛି ଓ ପିଚ୍ ଉପରେ ୭ମିଲି ମିଟର ଉଚ୍ଚ ଘାସ ଛଡ଼ା ଯାଇଛି । ପିଚ୍ରେ ପାଣି ଛିଞ୍ଚାଯିବା ସହ ହାଲକା ରୋଲର ଚଳାଯାଇଥିଲା । କିନ୍ତୁ ବାକି ୨ ଦିନରେ ପିଚ୍ ଉପରେ ଭାରି ରୋଲର ଚଳାଯିବ । ପିଚ୍ ସ୍ପିନରଙ୍କୁ ବେଶ୍ ସହାୟତା କରିବ । ଓଜନଦାର ରୋଲର ଚଳାଯିବା ଫଳରେ ଘାସର ରଙ୍ଗ ବଦଳି ଯିବ । ବର୍ତ୍ତମାନ ପିଚ୍ରେ ଥିବା ସବୁଜ ରଙ୍ଗର ଜୀବନ୍ତ ଘାସ ହେଭି ରୋଲିଂରେ ଶୁଖିଯିବ । ବିଶ୍ୱ ଟେଷ୍ଟ ଚାମ୍ପିଅନସିପ ଫାଇନାଲ୍ ଆଶା ଉଜ୍ଜ୍ୱଳ ରଖିବାକୁ ହେଲେ ଭାରତକୁ ସିଡନୀ ଟେଷ୍ଟ ଜିତିବାକୁ ପଡ଼ିବ । ମାତ୍ର ଏଠାରେ ଭାରତର ରେକର୍ଡ ସେଭଳି ଭଲ ନାହିଁ ।
ସୂଚନାଯୋଗ୍ୟ, ୧୯୪୭ରୁ ୨୦୨୧ ମଧ୍ୟରେ ଭାରତ ସିଡନୀରେ ମୋଟ୍ ୧୩ଟି ଟେଷ୍ଟ ଖେଳିଛି । ଏଥିରୁ ଭାରତ ଗୋଟିଏ ମାତ୍ର ଟେଷ୍ଟ ଜିତିଥିବାବେଳେ ୫ଟି ଟେଷ୍ଟରେ ପରାଜିତ ହୋଇଛି ଏବଂ ବାକି ୭ଟି ଟେଷ୍ଟ ଡ୍ର’ ରଖିଛି ।
