ଚନ୍ଦନେଶ୍ଵର, ୬/୬ : ବାଲେଶ୍ଵର ଜିଲ୍ଲା ଭୋଗରାଇ ତାଳସାରୀ ବେଳାଭୂମିରେ ଥିବା ମିନତୀ ହୋଟେଲରେ ଗୁରୁବାର ଚଢାଉ ହୋଇଥିଲା। ଚଢାଉ ବେଳେ ପୁଲିସ ୧୯ ଜଣଙ୍କୁ ଗିରଫ କରି ଆଜି ଭୋଗରାଇ ଗ୍ରାମ୍ୟ ନ୍ୟାୟାଳୟରେ ହାଜର କରିଥିଲା। ସେମାନଙ୍କ ମଧ୍ୟରୁ ୧୦ ଦେହଜୀବୀଙ୍କୁ ବାଲେଶ୍ଵର ସୁଧାର ଗୃହକୁ ସ୍ଥାନାନ୍ତର କରାଯାଇଥିବା ବେଳେ ୬ ହୋଟେଲ କର୍ମଚାରୀ ଓ ୩ ଗ୍ରାହକଙ୍କୁ ଜେଲ୍ ପଠାଯାଇଛି। ସେପଟେ ହୋଟେଲରେ ପୁଲିସ ତାଲା ପକାଇଦେଇଛି।
ତାଳସାରୀ ବେଳାଭୂମିରେ ପର୍ଯ୍ୟଟନ ବିଭାଗ ପକ୍ଷରୁ ଏକ ପାର୍ଶ୍ଵଶାଳା ଓ ୧ ୦ରୁ ଉଦ୍ଧ୍ଵ ହୋଟେଲ ଗଢି ଉଠିଛି। ଏଠାରେ ପଶ୍ଚିମବଙ୍ଗ ଦୀଘା ଥାନା ଅଞ୍ଚଳର ବାସୁଦେବ ପାଳ ନାମକ ଜଣେ ବ୍ୟକ୍ତି ଏକ ହୋଟେଲ ନିର୍ମାଣ କରିଛନ୍ତି। ଏହି ହୋଟେଲକୁ ନେଇ ବାରମ୍ବାର ଅଭିଯୋଗ ଆସୁଛି। ବର୍ଷେ ତଳେ ଉକ୍ତ ହୋଟେଲର କର୍ମଚାରୀମାନେ ସ୍ଥାନୀୟ ଅଞ୍ଚଳରୁ ଛେଳି ଚୋରି କରି ମଟନ୍ ଖାଇଥିବା ଅଭିଯୋଗ ହୋଇଥିଲା। ଏହାଛଡ଼ା ହୋଟେଲକୁ ଆସୁଥିବା ପର୍ଯ୍ୟଟକଙ୍କୁ ଖରାପ ବ୍ୟବହାର ପ୍ରଦର୍ଶନ କରାଯାଉଥିବା ଅଭିଯୋଗ ଆସୁଥିଲା। ପୁଣି ଏବେ ହୋଟେଲରେ ଦେହ ବ୍ୟବସାୟ ଚାଲୁଥିବା ନେଇ ଅଭିଯୋଗ ଆସିବା ପରେ ପୁଲିସ ଗୁରୁବାର ଚଢାଉ କରିଥିଲା। ଚଢାଉ ବେଳେ ହୋଟେଲରୁ ୧୦ ଜଣ ଦେହଜୀବୀ ଉଦ୍ଧାର ହୋଇଥିଲେ। ଏହାସହ ୬ ହୋଟେଲ କର୍ମଚାରୀ ଓ ୩ ଗ୍ରାହକଙ୍କୁ ପୁଲିସ ଗିରଫ କରିଥିଲା। ଆଜି ୧୯ ଜଣଙ୍କୁ ଭୋଗରାଇ ଗ୍ରାମ୍ୟ ନ୍ୟାୟାଳୟରେ ହାଜର କରାଯାଇଥିଲା। ସେମାନଙ୍କ ମଧ୍ୟରୁ ୧୦ ଦେହଜୀବୀଙ୍କୁ ବାଲେଶ୍ଵର ସୁଧାର ଗୃହକୁ ସ୍ଥାନାନ୍ତର କରାଯାଇଥିବା ବେଳେ ୬ ହୋଟେଲ କର୍ମଚାରୀ ଓ ୩ ଗ୍ରାହକଙ୍କୁ ଜେଲ୍ ପଠାଯାଇଛି। ଉକ୍ତ ହୋଟେଲ ଉପରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଅଞ୍ଚଳବାସୀ ଦାବି କରିଛନ୍ତି।
