ନୂଆଦିଲ୍ଲୀ ୦୬/୦୩: ଭାରତୀୟ ବାୟୁସେନାର ଇତିହାସରେ ଏକ ନୂଆ ଅଧ୍ୟାୟ ସଂଯୋଗ ହୋଇଛି । ଫ୍ଲାଇଂ ଅଫିସର ତନୁଷ୍କା ସିଂହ ଜାଗୁଆର ଫାଇଟର ଜେଟ୍ ସ୍କ୍ୱାଡ୍ରନ୍ରେ ସ୍ଥାୟୀ ଭାବେ ନିଯୁକ୍ତି ପାଇବାରେ ପ୍ରଥମ ମହିଳା ପାଇଲଟ ହେବାର ଗୌରବ ଅର୍ଜନ କରିଛନ୍ତି । ଏହା କେବଳ ତାଙ୍କର ବ୍ୟକ୍ତିଗତ ଉପଲବ୍ଧି ନୁହେଁ, ଭାରତୀୟ ବାୟୁସେନାରେ ମହିଳାଙ୍କର ବଧିଷ୍ଣୁ ଭାଗିଦାରୀର ଏକ ବଡ଼ ସଙ୍କେତ ମଧ୍ୟ ।
ତନୁଷ୍କାଙ୍କ ପରିବାର ଦେଶସେବା ସହ ଜଡି଼ତ । ତାଙ୍କ ବାପା ଓ ଜେଜେ ଭାରତୀୟ ସେନାରେ କାର୍ଯ୍ୟ କରିସାରିଛନ୍ତି । ସେଥିଯୋଗୁ ପିଲାଦିନରୁ ହିଁ ତନୁଷ୍କାଙ୍କ ମନରେ ଦେଶ ସେବା ଲାଗି ଆଗ୍ରହ ଥିଲା । ସେ ମୂଳତଃ ଉତ୍ତରପ୍ରଦେଶର ବାସିନ୍ଦା ହୋଇଥିବାବେଳେ ୨୦୦୭ରୁ ମାଙ୍ଗାଲରୁରେ ରହିଆସୁଛନ୍ତି । ତନୁଷ୍କା ଡିପିଏସ୍ ଏମଆରପିଏଲ୍ ସ୍କୁଲରୁ ସ୍କୁଲ ଶିକ୍ଷା ଶେଷ କରିବା ପରେ ଶାରଦା ପିୟୁ କଲେଜରେ ପଢ଼ିଥିଲେ ।
୨୦୨୨ରେ ମଣିପାଲ ଇନ୍ଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜିରୁ ଇଲେକ୍ଟ୍ରିକାଲ୍ ଓ ଇଲୋକ୍ଟ୍ରୋନିକ୍ସ ଇଞ୍ଜିନିୟରିଂରେ ବିଟେକ୍ ଡିଗ୍ରୀ ହାସଲ କରିଥିଲେ ସେ । ପ୍ରାଥମିକ ଭାବେ ଭାରତୀୟ ସେନାରେ ଯୋଗ ଦେବାକୁ ତନୁଷ୍କାଙ୍କର ଇଚ୍ଛା ଥିଲା । କିନ୍ତୁ ବାୟୁସେନାରେ ମହିଳାମାନଙ୍କୁ ମିଳୁଥିବା ସୁଯୋଗ ସଂପର୍କରେ ଜାଣିବା ପରେ ସେ ନିଜର ଲକ୍ଷ୍ୟ ବଦଳାଇ ଦେଇଥିଲେ । ତାମିଲନାଡୁର ଡୁଣ୍ଡିଗଲସ୍ଥିତ ଏଫାରଫୋର୍ସ ଏକାଡେମୀରୁ କଡ଼ା ତାଲିମ ନେଇଥିଲେ । ଏହାପରେ ସେ ହକ୍ ଏମ୍କେ ୧୩୨ ବିମାନ ଚଳାଇବାକୁ ସ୍ୱତନ୍ତ୍ର ତାଲିମ ଗ୍ରହଣ କରିଥିଲେ ।
ଯଦିଓ କିଛି ମହିଳା ପାଇଲଟ ପ୍ରଶିକ୍ଷଣ ସମୟରେ ଜାଗୁଆର ଫାଇଟର ଜେଟ୍ ଉଡ଼ାଇଛନ୍ତି, ତେବେ ଫ୍ଲାଇଂ ଅଫିସର ତନୁଷ୍କାଙ୍କୁ ସ୍ଥାୟୀ ଭାବେ ଏହି ସ୍କ୍ୱାଡ୍ରନ୍ରେ ସାମିଲ କରାଯାଇଛି । ଖୁବ୍ ଶୀଘ୍ର ନିଜର ସକ୍ରିୟ ଡ୍ୟୁଟିରେ ଯୋଗ ଦେବେ ସେ । ତନୁଷ୍କାଙ୍କର ଏହି ଉପଲବ୍ଧି ଆକାଶକୁ ଛୁଇଁବାକୁ ସ୍ୱପ୍ନ ଦେଖୁଥିବା ଅନେକ ଯୁବକଯୁବତୀଙ୍କ ଲାଗି ଏକ ପ୍ରେରଣା ବୋଲି ତାଙ୍କ ଜେଜେବାପା କ୍ୟାପଟେନ୍ ଡି.ବି. ସିଂହ ପ୍ରକାଶ କରିଛନ୍ତି ।
