ପାଟନା: ବିହାରର ପୂର୍ବତନ ଉପମୁଖ୍ୟମନ୍ତ୍ରୀ ଏବଂ ରାଷ୍ଟ୍ରୀୟ ଜନତା ଦଳ ନେତା ତେଜସ୍ୱୀ ଯାଦବ ଦୁଇ ଦୁଇଟି EPIC ନମ୍ବର ବିବାଦରେ ଫସିଛନ୍ତି ।  ନିର୍ବାଚନ କମିଶନ ପୁଣି ଥରେ ତାଙ୍କୁ ତାଙ୍କର ଭୋଟର ପରିଚୟ ପତ୍ରର ବିବରଣୀ ମାଗିଛନ୍ତି। କମିଶନ ତେଜସ୍ୱୀଙ୍କୁ ୮ ଅଗଷ୍ଟ ୨୦୨୫ ସୁଦ୍ଧା ତାଙ୍କର ଭୋଟର ପରିଚୟ ପତ୍ର ଦାଖଲ କରିବାକୁ କହିଛନ୍ତି । ତେଜସ୍ୱୀ ତଦନ୍ତରେ ସହଯୋଗ ନକରିବାରୁ କମିଶନ ଏହି ପଦକ୍ଷେପ ନେଇଛନ୍ତି । ପୂର୍ବରୁ ମଧ୍ୟ କମିଶନ ତାଙ୍କଠାରୁ ଭୋଟର କାର୍ଡ ବିଷୟରେ ସୂଚନା ମାଗିଥିଲେ । କିନ୍ତୁ ଆରଜେଡି ନେତା କୌଣସି ଉତ୍ତର ଦେଇ ନଥିଲେ। 

ଏବେ ନିର୍ବାଚନ କମିଶନ ପୁଣି ଥରେ ତାଙ୍କୁ ତାଙ୍କର ଭୋଟର ପରିଚୟ ପତ୍ର ଦାଖଲ କରିବାକୁ କହିଛନ୍ତି। ତେଜସ୍ୱୀ ଯାଦବ ଅଗଷ୍ଟ ୨ ତାରିଖରେ ଏକ ସାମ୍ବାଦିକ ସମ୍ମିଳନୀରେ ଦାବି କରିଥିଲେ ଯେ, ବିହାରରେ ସ୍ୱତନ୍ତ୍ର ବ୍ୟାପକ ସଂଶୋଧନ (SIR) ଅନୁଯାୟୀ ଜାରି ହୋଇଥିବା ଡ୍ରାଫ୍ଟ ଭୋଟର ତାଲିକାରେ ତାଙ୍କ ନାମ ନଥିଲା। ସେ ତାଙ୍କ ମୋବାଇଲ୍ ଫୋନ୍‌କୁ ସ୍କ୍ରିନ୍‌ ସହିତ ସଂଯୋଗ କରି ଅନଲାଇନରେ EPIC ନମ୍ବର ଖୋଜିବାକୁ ଚେଷ୍ଟା କରିଥିଲେ । ଏହା ପରେ ସେ ଅଭିଯୋଗ କରିଥିଲେ ଯେ, ତାଙ୍କର EPIC ନମ୍ବର ପରିବର୍ତ୍ତନ କରାଯାଇଛି । ନିର୍ବାଚନ କମିଶନ ତାଙ୍କ ଦାବିକୁ ପ୍ରତ୍ୟାଖାନ କରିଥିଲେ । 

ପାଟନା ସଦରର ସବ-ଡିଭିଜନାଲ୍ ମାଜିଷ୍ଟ୍ରେଟ୍ ଏବଂ ନିର୍ବାଚନ ପଞ୍ଜିକରଣ ଅଧିକାରୀ ତେଜସ୍ୱୀଙ୍କୁ ଏକ ଚିଠି ଲେଖି କହିଥିଲେ, ‘ଆମର ପ୍ରାଥମିକ ତଦନ୍ତରୁ ଜଣାପଡିଛି ଯେ, ଆପଣ ଉଲ୍ଲେଖ କରିଥିବା EPIC ନମ୍ବର ସରକାରୀ ଭାବରେ ଜାରି କରାଯାଇ ନଥିଲା। ତେଣୁ, ବିସ୍ତୃତ ତଦନ୍ତ ପାଇଁ ଆପଣଙ୍କୁ ‌ଭୋଟର କାର୍ଡର ମୂଳ କପି ଦାଖଲ କରିବାକୁ ଅନୁରୋଧ କରାଯାଉଛି।’ ପାଟନା ଜିଲ୍ଲା ମାଜିଷ୍ଟ୍ରେଟ୍ ତ୍ୟାଗରାଜ ଏସ୍.ଏମ୍. ତେଜସ୍ୱୀଙ୍କ ଦାବିକୁ ଖଣ୍ଡନ କରି କହିଛନ୍ତି ଯେ, ଭୋଟର ତାଲିକାରେ ତାଙ୍କର EPIC ନମ୍ବର ୨୦୨୦ ବିଧାନସଭା ନିର୍ବାଚନ ଶପଥ ପତ୍ରରେ ଦେଇଥିବା ନମ୍ବର ସହିତ ସମାନ । ସେ ଏହା ମଧ୍ୟ କହିଛନ୍ତି ଯେ ଯଦି ତେଜସ୍ୱୀଙ୍କ ପାଖରେ ଅନ୍ୟ କୌଣସି EPIC ନମ୍ବର ଅଛି, ତେବେ ଏହା ତଦନ୍ତର ବିଷୟ । ଜଣେ ବ୍ୟକ୍ତିଙ୍କ ପାଇଁ ୨ଟି ଭୋଟର ପରିଚୟପତ୍ର ରଖିବା ବେଆଇନ।